ပှၤကူၣ်သ့ လၢအတ့ဟီၣ်ခိၣ်မဲာ်သၣ်က့ၢ်ဂီၤတဖု, ဃုသ့ၣ်ညါဝဲလၢ ဖဲတၢ်တ့ဒုးအိၣ်ထီၣ် တီၤဘျီကၠိတၢ်လိာ်ကွဲလီၢ်အဒူၣ်အဆၢန့ၣ်ဒီး, တၢ်ဘၣ်ဒိဘၣ်ထံးအစၢမနုၤတမံၤ ကပိာ်ထွဲထီၣ်အခံလဲၣ်န့ၣ်လီၤ. တၢ်လိာ်ကွဲလီၢ်လၢ တၢ်အဒူၣ်တအိၣ်ဒံးဘၣ်န့ၣ်, ကၠိဖိဖိသၣ်တဖၣ် ဂဲၤလိာ်ကွဲဝဲလၢ ကၠိအတၢ်သူၣ်ထီၣ်, ဒီးကၠိသရၣ်/သရၣ်မုၣ်တဖၣ်အကပၤ, ဒီးတဃ့ၢ်ဟးဖျိးဆူ တၢ်လီၢ်အဂၤဘၣ်န့ၣ်လီၤ. ဘၣ်ဆၣ်, တၢ်လိာ်ကွဲလီၢ်န့ၣ် မ့ၢ်အိၣ်ဝဲဒီးတၢ်အဒူၣ်န့ၣ်ဒီး, ပှၤဖိသၣ်ကၠိဖိတဖၣ် ကမုာ်လၤသးခုလိာ်ကွဲဘၣ်ဝဲလၢ ကရၢၢ်အတၢ်ဒူၣ်အပူၤ, လၢတၢ်လီၢ်ကိးပူၤဒဲးန့ၣ်လီၤ. ပှၤဃုသ့ၣ်ညါတၢ်တဖၣ်အံၤ ထုးထီၣ်ဝဲဒၣ်တၢ်အစၢလၢ တၢ်ဒူၣ်တဖၣ် ကဒုးအိၣ်အါထီၣ် သးအတၢ်သဘျ့လၢ ကၠိဖိတဖၣ်အဂီၢ်န့ၣ်လီၤ. ဖျါလၢတၢ်ထံၣ်အံၤ ထီဒါလိာ်အသးဒီးပှၤအါဒံအါဂၤ ထံၣ်သ့ၣ်ညါတ့ၢ်ဝဲလၢ, တၢ်အဒူၣ်တဖၣ် မၤဃံးမၤအံၣ် ပတၢ်သးခုန့ၣ်လီၤ. ဘၣ်ဆၣ်, တၢ်အဒူၣ်အဆၢတဖၣ်န့ၣ် ဒုးအိၣ်ထီၣ် တၢ်သဘျ့သ့ဝဲဒၣ်န့ၣ်လီၤ.

တၢ်အဒူၣ်အဆၢလၢ ယွၤကတဲာ်ကတီၤန့ၢ်ပှၤတဖၣ်အပူၤန့ၣ် နဲၣ်ဖျါတ့ၢ်ဝဲတၢ်သဘျ့န့ၣ်လီၤ. ဖဲကစၢ်ယွၤ ဟ့ၣ်လီၤဝဲ တၢ်မၤလိာ် အထံၣ်တဆံဆူ ပှၤအံၣ်စရ့လးဖိတဖၣ်န့ၣ်, အဝဲသ့ၣ်မ့ၢ်အိၣ်မူဝဲလၢ အတၢ်မၤလိာ်အပူၤန့ၣ်ဒီး, ကစၢ်ယွၤ အၢၣ်လီၤဝဲ “တၢ်အိၣ်မူ အဘီၣ်အညီ” န့ၣ်လီၤ. ၅မိၤ ၅:၃၃ ပာ်ဖျါဝဲ “သုဘၣ်လဲၤပိာ်ကယဲၢ်အကျဲလၢယွၤသုကစၢ်မၤလိာ်သုခဲလၢာ်, ဒ်သိးသုကမူ, ဒီးတၢ်ကဂ့ၤထီၣ်လၢသုဂီၢ်, ဒီးသုကထုးထီထီၣ် သုမုၢ်နံၤတဖၣ်လၢ ကီၢ်ပူၤလၢသုကမၤန့ၢ်အီၤ” န့ၣ်လီၤ. ဖဲအံၤ, တၢ်အိၣ်မူအဘီၣ်အညီစံးတၢ်န့ၣ် မ့ၢ်တၢ်အိၣ်မူလၢ အိၣ်ဒီးတၢ်အစၢလၢအဂ့ၤ- တၢ်အိၣ်မူသူးသ့ၣ်ကံၢ်စီလၢအဂ့ၤန့ၣ်လီၤ.

ကစၢ်ယ့ၣ်ရှူး, မ့ၢ်ပှၤလၢ အမၤလၢထီၣ်ပှဲၤထီၣ် ယွၤအတၢ်သိၣ်တၢ်သီတဖၣ်, ခီဖျိတူၢ်သံအသးလၢထူၣ်စုညါအလိၤ, ဒီးဘိးဘၣ်သ့ၣ်ညါဝဲဒၣ်လၢ, “သုမ့ၢ်အိၣ်မ့ၢ်ဆိးလၢယကလုၢ်ကထါအပူၤဒီး သုမ့ၢ်ယပျဲၢ်အနီၢ်အသံးလီၤ. ဒီးသုကသ့ၣ်ညါ တၢ်မ့ၢ်တၢ်တီ, ဒီးတၢ်မ့ၢ်တၢ်တီန့ၣ် ကမၤထူၣ်ဖျဲးသု” (ယိၤ ၈:၃၁-၃၂) န့ၣ်လီၤ. နီၢ်နီၢ်န့ၣ်, ကစၢ်ယွၤ အတၢ်ဒူၣ်တၢ်အဆၢတဖၣ်အံၤ မ့ၢ်ဝဲလၢ ပတၢ်ဂ့ၤတၢ်ဝါအဂီၢ်န့ၣ်လီၤ. တၢ်အိၣ်မူလၢ ယွၤတ့လီၤန့ၢ်ပှၤန့ၣ် ဒ်သိးပကလဲၤခီဖျိန့ၢ်ဘၣ်ဝဲ, ဒီးပကမုာ်လၤသးခုဃုာ်ဒီးယွၤအဂီၢ်, “တၢ်အဒူၣ်တဖၣ်” ဟ့ၣ်ပှၤ တၢ်သဘျ့ သ့ဝဲဒၣ်န့ၣ်လီၤ.