ဖဲတၢ်ဟ့ၣ်လီၤ ကၠ့နံၣ် ဟ့း(စ)လီး (Ginnie Hislop) လၢ မံၤလၤဒိၣ်စိတီၤဒိၣ် အလံာ်အုၣ်သး (Master Degree Diploma) ဒိးန့ၢ်ဝဲဒၣ် ကမျၢၢ်အတၢ်ဟ့ၣ်ဂံၢ်ဟ့ၣ်ဘါ ကိးပသူကိးပသီ, ဖဲ ၂၀၂၄ နံၣ်န့ၣ်လီၤ. ဘၣ်မနုၤအဃိလဲၣ်. ဒ်သိးကမၤဝံၤဝဲတၢ်မၤလိအံၤအဂီၢ်, မ့ၢ်လၢတၢ်ဆၢကတီၢ်ယံာ်ဝဲဒၣ် ၈၄ နံၣ်အဃိန့ၣ်လီၤ. ဖဲ ၁၉၄၁ နံၣ်န့ၣ်, ဒ်သိးကမၤဝံၤ အတၢ်မၤလိအဂီၢ် လိၣ်ဝဲဒၣ်ထဲ ကဘၣ်တီၢ်ထီၣ် တၢ်ကွဲးဃိထံ (thesis) န့ၣ်လီၤ. ဘၣ်ဆၣ်, အတၢ်အဲၣ်တီ ကၠီး (George) တဂၤ ထံကီၢ်လိၣ်ဘၣ်အီၤ သတူၢ်ကလာ်, ဒီးကဘၣ်လဲၤ ဟီၣ်ခိၣ်ဒီဘ့ၣ် တၢ်ဒုးတၢ်ယၤဖးဒိၣ် ခံဘျီတဘျီအဂီၢ်န့ၣ်လီၤ. အဝဲသ့ၣ်ခံဂၤ ဒိးတ့ဒိးဖျီအသးအဆိအချ့, ဒီးလဲၤဝဲဆူ အဝၤအတၢ်မၤလီၢ်, ပှၤသုးဖိတဖၣ်အိၣ်ဆိးတၢ်အလီၢ်အကျဲ, ဒီးဘၣ်ပာ်လီၤတဲာ်တ့ၢ် ကၠ့နံၣ် အတၢ်မၤလိ, တချုးလၢအမၤဝံၤဝဲဒၣ်န့ၣ်လီၤ. ဘၣ်ဆၣ်, တၢ်ဆိကတီၢ် အတၢ်မၤလိဖးယံာ်ဖးထီအံၤ ဝံၤအလီၢ်ခံန့ၣ် ကၠ့နံၣ် မၤဝံၤမၤလၢပှဲၤဝဲဒၣ် တၢ်လၢအစးထီၣ်မၤတ့ၢ်ဝဲတမံၤန့ၣ်လီၤ.
စီၤဧ့စြၤ မ့ၢ်ပှၤမၤလိ ယွၤအကလုၢ်ကထါတဂၤ, လၢအဒိးန့ၢ် “တီၤလၢအဒိၣ်အထီ” ဘၣ်ဃးဒီးယွၤအတၢ်သိၣ်တၢ်သီ-ဒီးအါနံၣ်အါလါန့ၣ် အိၣ်ခိးကွၢ်လၢ်ဝဲလၢ တၢ်က့ၤကဒါဆူ ဝ့ၢ်ယရူၤရှလ့ၣ်, လၢဘၤဘူၤလိၣ်တၢ်စိာ်မၢကဲကုၢ်အလီၢ်န့ၣ်လီၤ. ဧ့စြၤ ၇:၁၀ ပာ်ဖျါဝဲလၢ “စီၤဧ့စြၤ ကတဲာ်ကတီၤတ့ၢ်အသး ဒ်သိးအကဃုယွၤအတၢ်သိၣ်တၢ်သီ, ဒီးတိၢ်န့ၢ်ဝဲ, ဒီးဒ်သိးအကသိၣ်လိတၢ်မၤလိာ်, ဒီးတၢ်စံၣ်ညီၣ်လၢ အံၣ်စရ့လးအပူၤ” န့ၣ်လီၤ. တချုးနံၣ်လၢအဆံတဖၣ်အမဲာ်ညါန့ၣ် စီၤစရူဘၤဘ့လးဒီးပှၤအံၣ်စရ့လးဖိတဖု, လၢအဘၣ်တၢ်စိာ်မၢကဲကုၢ်တဖၣ် ဒိးန့ၢ်တၢ်ပျဲလၢ အကက့ၤဝဲဆူ ဝ့ၢ်ယရူၤရှလ့ၣ်, ဒီးသူၣ်ထီၣ်ဘှီထီၣ်က့ၤ တၢ်လုၢ်ဟံၣ် (ဧ့ ၂:၁-၂) န့ၣ်လီၤ. ဒီးခဲကနံၣ်အံၤ, စီၤဧ့စြၤ တဂၤ “ဒ်အကစၢ်အစုဂ့ၤ အိၣ်ဝဲလၢအလိၤ” (ဧ့ ၇,၉) အသိး, ဘၣ်ဆှၢက့ၤ ပှၤဘၣ်တၢ်စိာ်မၢ ကဲကုၢ်ဖိတဖၣ်ဆူ ဝ့ၢ် ယရူရှလ့ၣ်န့ၣ်လီၤ. ကစၢ်ယွၤ စူးကါအီၤလၢ ကမၤဂ့ၤထီၣ်က့ၤတၢ်, ဘှီဂ့ၤထီၣ်က့ၤ တၢ်ဘူၣ်ထီၣ်ဘါထီၣ် ကစၢ်ယွၤ ဂ့ၤဂ့ၤဘၣ်ဘၣ်, ဒ်လံာ်စီဆှံပာ်ဖျါဝဲအသိးန့ၣ်လီၤ. “ဒီးစီၤဧ့စြၤ အိးထီၣ်လံာ်လၢ ပှၤဂီၢ်မုၢ်ခဲလၢာ်အမဲာ်ညါ…….., ဒီးပှၤဂီၢ်မုၢ်ခဲလၢာ်, တီၤလီၤကဒွံကျိာ်, ဒီးဘူၣ်ထီၣ်ဘၣ်ထီၣ်တၢ်” (နဃ့ ၈:၅-၆) န့ၣ်လီၤ.
စီၤဧ့စြၤ ဘၣ်အိၣ်ခိးဝဲနံၣ်လၢအဆံတဖၣ်ဘၣ်ဆၣ်, လၢယွၤအဂံၢ်အဘါအပူၤန့ၣ် မၤလၢပှဲၤဝဲအမူဒါန့ၣ်လီၤ. လၢတၢ်ပာ်သးစွံကတုၤအပူၤန့ၣ် မ်ပကမၤဝံၤက့ၤမူဒါတၢ်ဖံးတၢ်မၤလၢ ယွၤဟ့ၣ်လီၤပှၤ ခီဖျိလၢယွၤအတၢ်စိတၢ်ကမီၤအပူၤန့ၣ်တက့ၢ်.
