ဘရီနံၣ် ဝဲ (Bronnie Ware) မ့ၢ် သရၣ်မုၣ်ကွၢ်ထွဲပှၤဆါ, ဘူးထီၣ်လၢအမုၢ်နံၤကကတၢၢ်တဖၣ်တဂၤ, ကွဲးပာ်ဖျါတီၣ်ထီၣ်ဝဲဒၣ် ပှၤဆူးပှၤဆါတဖၣ် အတၢ်စံးကတိၤ ပီၢ်ယၢ်လီၤက့ၤသးတဖၣ်” လၢအပှာ်ယဲၤသန့ (Blog) အပူၤ, လၢတၢ်ဂ့ၢ်အခိၣ်တီၤ “တၢ်ပီၢ်ယၢ်လီၤက့ၤသးလၢတၢ်သံအဂီၢ်” န့ၣ်လီၤ. တၢ်လၢအနၢ်ဟူဘၣ်ဝဲအကျါ, ပှၤဆူးပှၤဆါတဖၣ် စံးကတိၤ ပာ်ဖျါဝဲတဖၣ်န့ၣ်, “ယဆၢလၢယတကျဲးစၢၤ ဖံးတ့ၢ်မၤတ့ၢ်တၢ်ဆူၣ်ဆူၣ်န့ၣ်လီၤ. ယဆၢလၢ ယကရ့လိာ်တ့ၢ်ယသးဘူးဘူးတံၢ်တံၢ်ဒီးယတံၤသကိးတဖၣ်” န့ၣ်လီၤ. ဒီးတၢ်လၢအလီၤကမၢကမၣ်အဒိၣ်ကတၢၢ်န့ၣ် ပှၤဆူးပှၤဆါတဖၣ် စံးဝဲလၢ, “ယဆၢလၢ ယကမုာ်လၤသးခုတ့ၢ်ယဲ ယတၢ်အိၣ်မူအါန့ၢ်အန့ၣ်လီၤ.”

ဝဲ ကွဲးဝဲဒၣ်လၢ “တၢ်ကွၢ်ဆၢၣ်မဲာ် တၢ်သံတၢ်ပှၢ်, လၢပဟးဆှဲးအီၤတသ့အံၤ မ့ၢ်ဝဲဒၣ်ပိးလီအဂ့ၤကတၢၢ်တမံၤလၢ ပကအိၣ်မူအိၣ်ဂဲၤတၢ်အိၣ်မူလၢအပှဲၤဒီးတၢ်သးခု” န့ၣ်လီၤ. တၢ်ဂ့ၢ်အံၤ ဖျါဝဲဒၣ် ဒ်တၢ်ဟ့ၣ်ကူၣ်တမံၤဘၣ်ဆၣ်, တၢ်သးခုအဂံၢ်ထံးန့ၣ် ကမ့ၢ်တၢ်မနုၤတမံၤလဲၣ်. ပကဃုထံၣ်န့ၢ် တၢ်သးခုအခီပညီအလၢအပှဲၤ ဖဲတၢ်လီၢ်မတၤလဲၣ်.

ပှၤတၢ်မၢဖိစီၤယိၤဟၣ်, ဒ်ပှၤသးစၢ်တဂၤအသိး, ထံၣ်တ့ၢ်ဝဲ တၢ်အိၣ်မူအတၢ်ပညိၣ်လၢအကမၣ်န့ၣ်လီၤ. မၢ် ၁၀:၃၇ န့ၣ် အဝဲဒီးအဒီပုၢ်ဝဲၢ်ခွါ သံကွၢ်ဝဲဒၣ် ကစၢ်ယ့ၣ်ရှူးလၢ, “ဟ့ၣ်ပှၤလၢပကဆ့ၣ်နီၤလၢ နစုထွဲတဂၤ, ဒီးလၢနစုစ့ၣ်တဂၤ, လၢနလၤကပီၤအပူၤ တက့ၢ်” န့ၣ်လီၤ. အဝဲသ့ၣ်အတၢ်ဃ့အံၤ ဒုးကဲထီၣ်ဝဲဒၣ် တၢ်အ့ၣ်လိာ်ဆိက့လိာ်သးလၢ အပျဲၢ်အဘီၣ်တဖၣ်အဘၢၣ်စၢၤန့ၣ်လီၤ.

နံၣ်လၢအဆံတဖၣ်လဲၤပူၤကွံာ်ဝံၤန့ၣ်, စီၤယိၤဟၣ် ဟံးဃာ်ဝဲ အတၢ်ထံၣ်တၢ်အိၣ်မူ အတၢ်ပညိၣ်လီၤဆီ, လၢအမ့ၢ် တၢ်အိၣ်မူလၢအပှဲၤဒီးတၢ်အဲၣ်, ဒီးတၢ်ရ့လိာ်ဘၣ်ထွဲလိာ်သးဒီးကစၢ်ယ့ၣ်ရှူးန့ၣ်လီၤ. စီၤယိၤဟၣ် ထံၣ်ဘၣ် ကစၢ်ယ့ၣ်ရှူးအသးသမူ, အတၢ်သံ, ဒီးအတၢ်ဂဲၤဆၢထၢၣ်သမူထီၣ်က့ၤန့ၣ် မ့ၢ်တၢ်ဂ့ၢ်အခီၣ်ထံးလၢတၢ်ခဲလၢာ်အဂီၢ်န့ၣ်လီၤ. ၁ ယိၤ ၁:၂ န့ၣ် စီၤယိၤဟၣ် ကွဲးပာ်ဖျါဝဲ “ပစံးဘၣ်တဲဘၣ်သုလၢ တၢ်မူအထူအယိာ်,” ဒီးစံးဘၣ်ပှၤ ကစၢ်ယ့ၣ်ရှူးအဂ့ၢ်လၢ “သုဝဲသ့ၣ်စ့ၢ်ကီး သုကရ့လိာ်သုသးဒီးပှၤ” (:၃) န့ၣ်လီၤ. စီၤယိၤဟၣ် ပာ်ဖျါအါထီၣ်ဝဲလၢ, “ဒီးပတၢ်ရ့လိာ်အံၤ, မ့ၢ်ပရ့လိာ်ပသးဒီးပၢ်, ဒီးအဖိခွါယ့ၣ်ရှူးခရံာ်လီၤ. တၢ်န့ၣ်တဖၣ် ပကွဲးန့ၢ်သု ဒ်သိးသုတၢ်သးခုကလၢထီၣ်ပှဲၤထီၣ်လီၤ” (:၃-၄).

တၢ်အိၣ်မူန့ၣ် ကဟဲစိာ် တၢ်ပီၢ်ယၢ်က့ၤသးတဖၣ် သ့ဝဲဒၣ်န့ၣ်လီၤ. ကစၢ်ယ့ၣ်ရှူးကွဲမုာ်ပှၤလၢ ပကဆီတလဲက့ၤ တၢ်ပီၢ်ယၢ်က့ၤသးတဖၣ်အံၤဆူ တၢ်သးခုအလၢအပှဲၤ, ထဲဒၣ်ကစၢ်ယ့ၣ်ရှူးတဂၤဧိၤ ဟ့ၣ်ပှၤသ့န့ၣ်လီၤ.