လၢကီၢ်စဲၣ် ဖလီၣ်ရံၣ်ဒၣ် (Florida) န့ၣ် ၦၤသူၣ်ထီၣ်ဘှီထီၣ်တၢ်ဖိတဖု ဖံးတၢ်မၤတၢ်လၢကီၢ်အမဲရကၤ အစ့ ဒီလၣ် ၄၂ ကကွဲၢ်အဂီၢ် လၢတၢ်ခူၣ်ထံကျိၤအတၢ်မၤ, ဒီးခူၣ်န့ၢ်ဝဲတၢ်ထူးတၢ်တီၤလုၢ်ဒိၣ်ၦ့ၤဒိၣ်တဖၣ်န့ၣ်လီၤ. လၢဟီၣ်ခိၣ်အတၢ်ပူၤယိာ်ယိာ်န့ၣ်, အဝဲသ့ၣ်ထံၣ်န့ၢ်ဝဲၦၤဖီၣ်ညၣ်အကဘီတဘ့ၣ်လၢ အဘၣ်တၢ်တ့ဘှီတ့ၢ်အီၤလၢ ၁၈ဝဝ နံၣ်, ဒီးအတၢ်အိၣ်အသးန့ၣ် ဂ့ၤဝဲဒၣ်အဖၢမုၢ်န့ၣ်လီၤ. ကဘီတဘ့ၣ်အံၤ အိၣ်ဒီးပီးလီတဖၣ်လၢ အလီၤသးစဲတဖၣ်,ဃုာ်ဒီးဂာ်သဝံအထံမ့ၣ်အူဒၢအပိးလီတဖၣ်, ၦၤအိထံအလီခီလၢ ၦၤတ့အီၤလၢဃီၤသၣ်အကုတဖၣ်, ဒီးထူ/စ့ တီကါဘ့ၣ်တဖၣ်န့ၣ်လီၤ. တၢ်ဃိထံဃုသ့ၣ်ညါကွၢ် ကဘီတဘ့ၣ်အံၤ, အိၣ်ဒီးတၢ်မုၢ်လၢ်ကွၢ်စိလၢ ကဟ့ၣ်ထီၣ်ဝဲဒၣ် တၢ်ဂ့ၢ်လီၤတံၢ်လီၤဆဲး, ဘၣ်ဃးဒီးအပူၤကွံာ်အါန့ၢ်အနံၣ်တကယၤဘျဲၣ်န့ၣ် လၢတၢ်လီၢ်တတီၤအံၤ တၢ်အိၣ်မူတဖၣ် ကမ့ၢ်တၢ်ဒ်လဲၣ်န့ၣ်လီၤ. ၦၤကူၣ်သ့ကူၣ်ဘၣ် စိၤလၢညါအဂ့ၢ်တဂၤ စံးဝဲဒၣ်လၢ “ကဘီတဘ့ၣ်အံၤ အါန့ၢ်ဒံးကဘီတဘ့ၣ်, ဒုးသ့ၣ်ညါပှၤလၢ ပှၤကညီတဖၣ် အတၢ်ဟူးတၢ်ဂဲၤ တနံၤဘၣ်တနံၤအဂီၢ်န့ၣ်လီၤ. ပမ့ၢ်လူၤဃုခူၣ်တၢ်ယိာ်ယိာ်န့ၣ်ဒီး, ပကမၤန့ၢ် တၢ်သ့ၣ်ညါ, ဒီးတၢ်ကူၣ်ဘၣ်ကူၣ်သ့န့ၣ်လီၤ.

ဒ်ပမၤလိ လံာ်ၦၤစံၣ်တဲၤတဲလီၤတၢ်အပူၤန့ၣ် ပကဃုထံၣ်န့ၢ် တၢ်ကူၣ်ဘၣ်ကူၣ်သ့အထူးအတီၤတဖၣ်- လၢပျၢၤတၢ်ကူၣ်ဘၣ်ကူၣ်သ့တဖၣ်, လၢအဒုးနဲၣ်ဝဲဒၣ် စိၤအကတီၢ်ဖဲန့ၣ် တနံၤဘၣ်တနံၤ, အတၢ်ဂ့ၢ်တၢ်ကျိၤတဖၣ်,ဃုာ်ဒီးလၢပစိၤဆၢကတီၢ်အဂီၢ်စ့ၢ်ကီး န့ၣ်လီၤ. စံၣ်တဲၤ ၈:၅-၆ န့ၣ် စီၤၡလိၤမိၤ ပာ်ဖျါဝဲဒၣ်လၢ “ၦၤကူၣ်တၢ်သ့တဂၤအသးန့ၣ် သ့ၣ်ညါတၢ်အဆၢအကတီၢ်, ဒီးတၢ်စံၣ်ညီၣ်” န့ၣ်လီၤ. အဝဲကွဲးပာ်ဖျါဝဲဒၣ် တၢ်ဃုထံၣ်န့ၢ် တၢ်ကူၣ်သ့စံးတၢ်န့ၣ် မ့ၢ်တၢ်သ့ၣ်နီၣ်ထီၣ်က့ၤ “ကစၢ်ယွၤအတၢ်မၤခဲလၢာ်” (:၁၇), ဒီးကစၢ်ယွၤ မ့ၢ်မတၤတဂၤလဲၣ် (စံၣ်တဲၤ ၁၂:၁) န့ၣ်လီၤ. ထဲကစၢ်ယွၤတဂၤဧိၤ ကတဲာ်ကတီၤန့ၢ်ပှၤ တၢ်အိၣ်မူအခီပညီ- မ့တမ့ၢ်ဘၣ်လၢယွၤန့ၣ်ဒီး, တၢ်အိၣ်မူအခီပညီ ကမ့ၢ် “တၢ်ကလီကလီ” (စံၣ်တဲၤ ၈:၁၄) န့ၣ်လီၤ. ကစၢ်ယွၤအတၢ်ကူၣ်သ့ ကပျဲပလဲၤခီဖျိကလၢၢ်ဘၣ် တၢ်သူၣ်မံသးမုာ်, ဒီးသးသမူလၢအၦဲၤဒီးတၢ်သူၣ်ဖှံသးညီလၢယွၤအမဲာ်ညါ (:၁၅) န့ၣ်လီၤ.

ဒ်တၢ်ထံၣ်န့ၢ် ကဘီလၢ ဖလီၣ်ရံၣ်ဒၣ် အုၣ်အသးအသိး, လံာ်ၦၤစံၣ်တဲၤတဲလီၤတၢ်ပာ်ဖျါဝဲဒၣ်လၢ “ၦၤတစိၤလဲၤဝဲဒီးပှၤတစိၤဟဲဝဲ” (၁:၄) န့ၣ်လီၤ. ဘၣ်ဆၣ်, ကစၢ်ယွၤ အတၢ်ကူၣ်သ့န့ၣ် နဲၣ်ဆှၢၦၤဆူတၢ်အိၣ်မူအမ့ၢ်အတီ, ဒီးတၢ်အိၣ်မူလီၤထူလီၤယိာ် (ယိၤ ၁ဝး၁ဝ) န့ၣ်လီၤ. ဒ်သိးပကဃုထံၣ်န့ၢ် လၢပျၢၤတၢ်ကူၣ်သ့ လၢယွၤကတဲာ်ကတီၤန့ၢ်ပှၤအဂီၢ်, မ်ပကခူၣ်တၢ်ယိာ်ယိာ်ဆူ ယွၤအကလုၢ်ကထါအပူၤန့ၣ်တက့ၢ်.