ဖဲ တၢ်အိၣ်ဖှိၣ်သရၣ် ကၠဲး(ဖ) (Jeff) အတၢ်အိၣ်ဖှိၣ် မၤဝဲဒၣ် တၢ်ဂိၢ်ထီၣ်သီအကတီၢ် တၢ်ဟ့ၣ်သဆၣ်ထီၣ်ဂံၢ်ဘါတၢ်မၤလိ, ဖဲတၢ်အကပိာ်အကပၤ တၢ်အိၣ်ဘှံးအိၣ်သါအလီၢ်ခၢၣ်သးန့ၣ်ဒီး, ကၠဲး(ဖ) လဲၤဟးကသုၣ်ဒီးယဖိခွါအကတီၢ်, ယဖိခွါလဲၤကိးအီၤဆူတၢ်ချၢ, လဲၤဟးခီဖျိ သ့ၣ်ၦၢ်အကျဲ, ဒီးပှၤမၤတၢ်ရဲၣ်တၢ်ကျဲၤအတၢ်ဘါလီၢ် အိၣ်လီၤတဲာ်တ့ၢ်ဝဲလၢ တၢ်လီၢ်ခံန့ၣ်လီၤ. အဝဲသ့ၣ်ထံၣ်ဝဲဒၣ် တၢ်အၢၣ်လီၤအီလီၤအတလါသတူၢ်ကလာ်န့ၣ်လီၤ. တမ့ၢ်တၢ်အၢၣ်လီၤအီလီၤတလါ အမ့ၢ်အတီနီၢ်နီၢ်ဘၣ်ဆၣ်, နံၣ်လၢအပူၤကွံာ်တဖၣ်န့ၣ် မ့ၢ်လၢ ကၠဲး(ဖ) ဟ့ၣ်ဂံၢ်ဟ့ၣ်ဘါအီၤအဃိ, ယဝၤ ထိၣ်ဒွးဝဲ တလါစီဆှံအက့ၢ်ဂီၤဒိ ဒ်လံာ်စီဆှံပာ်ဖျါဝဲအသိး, ဒီးတ့ဒုးအိၣ်ထီၣ်ဝဲဒၣ် တလါစီဆှံလၢထူအလွဲၢ်, ဒီးတယံာ်တမီၢ်ဘၣ်န့ၣ် ယဖိခွါမၤဝံၤက့ၤဝဲန့ၣ်ဒီး, ကဲထီၣ်တၢ်လီၤကမၢကမၣ်လၢ ကၠဲး(ဖ) အဂီၢ်န့ၣ်လီၤ.

ဒ်သိးကဟဲက့ၤစိာ် တၢ်အၢၣ်လီၤအီလီၤတလါဆူ တၢ်တၢ်ရဲၣ်တၢ်ကျဲၤ အတၢ်အီၣ်မ့ၤလီၢ်အဂီၢ်, လၢသူၣ်ဟူးသးဂဲၤဒိၣ်ဒိၣ်ကလဲာ်အပူၤန့ၣ် ကၠဲး(ဖ) က့ၤဝဲဒၣ်ချ့ချ့, ဒီးဃ့တၢ်မၤစၢၤလၢပှၤဂုၤပှၤဂၤန့ၣ်လီၤ. ပိာ်ခွါတဖၣ် ဝံစိာ်တလါလၢ သ့ၣ်ပှၢ်အကျဲ,ဃုာ်ဒီး တၢ်အိၣ်ဖှိၣ်သရၣ် အလံၤဖိခံဂၤ ဟံးဖီၣ်လိာ်သးအစု, ဒီးလူၤပိာ်ဝဲလၢအလီၢ်ခံန့ၣ်, ပကွၢ်အီၤဒီးဂ့ၤဒိၣ်မးလီၤ.

၂ ၡမူၤ ၆:၁၂ အပူၤန့ၣ် လံာ်စီဆှံ ပာ်ဖျါဝဲ တၢ်သးခုအမူး ဖဲလၢတၢ်အၢၣ်လီၤအီလီၤတလါအမ့ၢ်အတီ, တၢ်ပနီၣ်တမံၤလၢ ကစၢ်ယွၤ အိၣ်ဒီးအၦၤဂီၢ်မုၢ်န့ၣ်, ဘၣ်တၢ်ဟဲက့ၤစိာ်ဆူ ဝ့ၢ်ယရူၤၡလ့ၣ်- “စီၤဒၤဝံးအဝ့ၢ်,” အတၢ်လီၢ်တၢ်ကျဲ လၢအဘၣ်န့ၣ်လီၤ. ဖဲပှၤဂီၢ်မုၢ်တဖၣ် ကိးပသူထီၣ်, ဒီးအူသီၣ်ကွဲၤ, ဒီးဟဲက့ၤစိာ် ယွၤအတလါစီဆှံအကတီၢ်, လၢတၢ်သူၣ်ခုသးခုဖးဒိၣ်အပူၤန့ၣ် စီၤပၤစီၤဒၤဝံး ဂဲၤကလံာ်ဝဲလၢ “ယွၤအမဲာ်ညါဒီးအဂံၢ်အဘါခဲလၢာ်” (:၁၄-၁၅) န့ၣ်လီၤ.

နံၣ်တဖၣ်လဲၤပူၤကွံာ်, ဒီးၦၤအံၣ်စရ့လးဖိတဖၣ် ဘၣ်တၢ်စိာ်မၢကဲကုၢ်ဆူဘၤဘူၤလိၣ်, ဒီးဝ့ၢ်ယရူၤၡလ့ၣ်န့ၣ် ဘၣ်တၢ်မၤဟးဂီၤကွံာ်ဝဲဒၣ် (၂စီၤ ၂၅) န့ၣ်လီၤ. တၢ်အၢၣ်လီၤအီလီၤ တလါအဂ့ၢ်န့ၣ် လံာ်စီဆှံ တပာ်ဖျါဝဲဒၣ် နီတမံၤဘၣ်. တၢ်တဲမုာ်နၢ်တဖၣ် အိၣ်ဝဲဒၣ်အါမးဘၣ်ဆၣ်, ဒ်သိးပကမုာ်လၤသးခုဝဲလၢ ကစၢ်ယွၤ အတၢ်အိၣ်ဒီးပှၤအဂီၢ်န့ၣ် ယိၤ ၁၄:၁၆-၁၇ စံးဘၣ်ပှၤလၢ, လၢပဂီၢ် တၢ်အၢၣ်လီၤအီလီၤ အတလါန့ၣ် တလိၣ်လၢၤဘၣ်န့ၣ်လီၤ. ခီဖျိလၢ ကစၢ်ယ့ၣ်ၡူးခရံာ် အတၢ်သံ, အတၢ်ဂဲၤဆၢထၢၣ်သမူထီၣ်က့ၤ, ဒီးဆှၢလီၤန့ၢ် သးစီဆှံအဃိ, ကစၢ်ယွၤန့ၣ် အိၣ်ဝဲဒၣ်ဒီး ကယဲၢ်ပှၤလၢ အစူၢ်က့ၤနာ်က့ၤ ကစၢ်ခရံာ်တဖၣ်ခဲလၢာ်န့ၣ်လီၤ. တၢ်အံၤမ့ၢ်ဝဲဒၣ် တၢ်ဂ့ၢ်အဂ့ၤကတၢၢ်လၢ ပကမုာ်လၤသးခုဝဲအဂီၢ်န့ၣ်လီၤ.