ကၠီ(န) စထရီး (John Stroup) ကွဲးဝဲဒၣ်လံာ်လၢ အမံၤမ့ၢ်ဝဲ “လၢဟီၣ်ခိၣ်အတၢ်ပူၤဃိာ်ဆူပျဲၢ်စီၤခိၣ်” (From the Pit to the Pulpit) အပူၤန့ၣ်, ၦၤကွဲးလံာ် ဟ့ၣ်ခီဟ့ၣ်နီၤဝဲဒၣ်သးသမူအစိအကမီၤတဖၣ်လၢအဆူၣ်, ဒီးအတသ့ၣ်ညါဝဲတဖၣ် မၤဘၣ်ဒိဆါအီၤ လၢနီၢ်ခိႇ လၢမုၣ်ခွါအတၢ်ရ့လိာ်ဘၣ်ထွဲလိာ်သး, ဒီးလၢသးအတၢ်ဟူးတၢ်ဂဲၤတဖၣ်အပူၤန့ၣ်လီၤ. ကၠီ(န) ကွဲးပာ်ဖျါဝဲလၢ “တချုးလၢယနီၣ်သိလ့ၣ်သ့ဒံးဘၣ်န့ၣ် ယစူးကါကသံၣ်မူၤဘှီး, ယဟးထီၣ်လၢကၠိအတၢ်မၤလိ, ယအိၣ်မူအိၣ်ဂဲၤယံာ်ထီၣ်အါထီၣ်ယဲ ဒ်ပှၤမၤအၢမၤသီတၢ်တဂၤအသိးန့ၣ်လီၤ.” အကတၢၢ်န့ၣ်, ခီဖျိလၢအမၤကမၣ်တၢ်တဖၣ်အဃိ, ဘၣ်လီၤဝဲလၢ ဃိာ်ပူၤန့ၣ်လီၤ. ဖဲအဘၣ်လီၤဃိာ် ယဲၢ်နံၣ်အတီၢ်ပူၤန့ၣ် လံာ်စီဆှံ ကဲထီၣ်တၢ်မ့ၢ်တၢ်တီလၢအဂီၢ်, ဒီးအဝဲဆီၣ်လီၤက့ၤအသးလၢကစၢ်ယွၤအမဲာ်ညါန့ၣ်လီၤ. ခီဖျိလၢကစၢ်ယွၤအဘျုးအဖှိၣ်အဃိ, ပူၤဖျဲးထီၣ်ဝဲလၢ အပူၤကွံာ်လုၢ်လၢ်တဖၣ်လၢ အစိအကမီၤဒိၣ်န့ၢ်ဆူၣ်န့ၢ်အီၤတဖၣ်န့ၣ်လီၤ.

လၢပျၢၤၦၤအံၣ်စရ့လးဖိတဖၣ် ဘၣ်လဲၤခီဖျိတၢ်ဆီၣ်သနံးတဖၣ်တလီၢ်လီၢ်, ဒီးဘၣ်တဘျီဘျီန့ၣ် ဘၣ်တၢ်စိာ်မၢကဲကုၢ်လၢ “ၦၤလၢအဆူၣ်န့ၢ်အီၤ” တဖၣ် (ယံး ၃၁:၁၁) န့ၣ်လီၤ. ခီဖျိလၢအဝဲသ့ၣ်မၤအၢမၤသီတၢ်အဃိ, တူၢ်ဘၣ်တၢ်နးတၢ်ဖှီၣ်ဒၣ်လဲာ်, ကစၢ်ယွၤ ပာ်ဖျါထီၣ် အတၢ်သးကညီၤ, ဒီးအတၢ်စိတၢ်ကမီၤဆူ အၦၤဂီၢ်မုၢ်လၢ အတပိာ်ကျဲတဖၣ်န့ၣ်လီၤ. ပှၤဂီၢ်မုၢ်တဖၣ် အတၢ်ဂ့ၢ်တၢ်ဝါအဂီၢ်, ဖဲကစၢ်ယွၤ စူးကါဝဲဒၣ် အဂံၢ်ဆူၣ်အဘါဆူၣ်အကတီၢ်န့ၣ်ဒီး, ပှၤဂီၢ်မုၢ်တဖၣ် ကမုၢ်လၢ်ကွၢ်စိဝဲဒၣ် “တၢ်မၤသီထီၣ်က့ၤတၢ်” လၢအပာ်ဃုာ်ဒီးတၢ်သူၣ်ဝံၣ်သးဆၢတဖၣ်လၢအၦဲၤဒီးတၢ်သူၣ်ခုသးခု, တၢ်ထၢဖှိၣ်ပှဲၤလုၢ်ကွံာ်ဝဲဒၣ် တၤသူၣ်တၤသၣ်တဖၣ်, ဒီးတၢ်မၤမူးသးဖှံတဖၣ် (:၁၂-၁၄) န့ၣ်လီၤ.

ၦၤလၢအစူၢ်က့ၤနာ်က့ၤ ကစၢ်ယွၤအဖိခွါ ကစၢ်ယ့ၣ်ၡူးတဖၣ် အခၢၣ်စးန့ၣ် ကၠီ(န) စထရီး အတၢ်အိၣ်မူ မ့ၢ်ဝဲဒၣ် တၢ်အုၣ်အသးတမံၤလၢ အပာ်ဖျါထီၣ် ကစၢ်ယွၤအဂံၢ် အဘါလၢအဆူၣ်န့ၣ်လီၤ. ဒ်သိးကတြီဆၢထီဒါ တၢ်အၢတၢ်သီအစိကမီၤ, လၢအမၤဘၣ်အၢ ပှၤဟီၣ်ခိၣ်ဖိတဖၣ်အတၢ်အိၣ်မူအဂီၢ်, လံာ်တၢ်သးခုကစီၣ်တဖၣ် အုၣ်အသးလၢကစၢ်ခရံာ်အစိအကမီၤန့ၣ်လီၤ. မုၢ်မဆါတနံၤအံၤ, “ဖဲဒၣ်ၦၤလၢအကကိးထီၣ်ကစၢ်အမံၤတဂၤလၢ်လၢ်,” (မၤတၢ် ၂:၂၁) ခီဖျိလၢတၢ်သူၣ်တီသးတီ, တၢ်ထုကဖၣ်လၢ အပှဲၤဒီးတၢ်နာ်, ဒီးတၢ်ဟ့ၣ်လီၤပသးလၢသူၣ်ဒီဖျၢၣ်သးဒီဖျၢၣ်န့ၣ်ဒီး, ကစၢ်ယ့ၣ်ၡူးအဂံၢ်အဘါ, ဒီးအစိအကမီၤန့ၣ် ပဒိးန့ၢ်အီၤသ့ဝဲဒၣ်န့ၣ်လီၤ.