မုၢ်ဟါလီၤခီအမုာ်အခုၣ်တနံၤန့ၣ် ယထံၣ်လိာ်သးဒီးယတံၤသကိးတဖၣ် လၢဝ့ၢ်ပူၤန့ၣ်လီၤ.ယသူၣ်ဟူးသးဂဲၤယဲလၢ ပကအီၣ်အီသကိးဘၣ်လၢ ကျးလၢအဟ့ၣ်ထီၣ် ကၠးစ် (Jazz) တၢ်ဒ့တၢ်အူလၢၦၤကညီအနီၢ်ကစၢ် ဒ့ဝဲလၢကျးအပျီပူၤဘၣ်ဆၣ်, ဖဲပလဲၤတုၤန့ၣ်, တၢ်လီၢ်တအိၣ်လၢၤဘၣ်န့ၣ်လီၤ. လၢတၢ်သးဟးဂီၤအပူၤန့ၣ်, ဒ်သိးပကအီၣ်တၢ်အဂီၢ် ပဟးထီၣ်, ဒီးလဲၤဆူတၢ်လီၢ်အဂၤတတီၤ, ယံၤဝဲဒၣ်ကျဲတဘျုးဘိန့ၣ်လီၤ.
လၢဟီၣ်ခိၣ်ချၢအံၤ တၢ်သးဟးဂီၤအဒိၣ်အဆံးတဖၣ် ဟဲတုၤဃီၤအကလုာ်ကလုာ်သ့ဝဲဒၣ်န့ၣ်လီၤ. ဆၣ်ဖိကီၢ်ဖိလၢ ပအဲၣ်ဘၣ်တဖၣ်သံဝဲဒၣ်, ပတၢ်ဖံးတၢ်မၤတဖၣ် တဘၣ်လိာ်ဘၣ်စး, ပဘၣ်ကွၢ်ဆၢၣ်မဲာ်ဒီးတၢ်အိၣ်ဆူၣ်အိၣ်ချ့အတၢ်ဂ့ၢ်ကီတဖၣ်, ပတၢ်ဘၣ်ထွဲဒီးၦၤလၢပအဲၣ်သ့ၣ်တဖၣ်န့ၣ် လီၤမၢ်ကွံာ်ဝဲဒၣ်န့ၣ်လီၤ. လၢတၢ်လီၤတူၢ်လီၤကာ်တဖၣ်အပူၤန့ၣ်, ပဒိးန့ၢ်ယွၤအတၢ်မၤမုာ်ထီၣ်က့ၤပှၤဘၣ်ဆၣ်, ပတၢ်အိၣ်မူတဖၣ်န့ၣ်
တၢ်အကတၢၢ်တဖၣ် လၢအၦဲၤဒီးတၢ်သးခုအဒိၣ်အမုာ်, တၢ်လၢပသးဆၢဒိးန့ၢ်တဖၣ်န့ၣ်တအိၣ်ဝဲထီဘိဘၣ်. ဘၣ်ဆၣ်, တၢ်မုၢ်လၢ် လၢအပှဲၤဒီးတၢ်သးခုသးမုာ်အထူအယိာ်န့ၣ် အိၣ်ဝဲဒၣ်လၢ ပှၤစူၢ်က့ၤနာ်က့ၤကစၢ်ယ့ၣ်ၡူးတဖၣ်အဂီၢ်န့ၣ်လီၤ.
လံာ်လီၣ်ဖျါ ကွဲးပာ်ဖျါဝဲ ကစၢ်ယွၤ အတၢ်ဟ့ၣ် စီၤယိၤဟၣ်လၢ တၢ်ထံၣ်ခါဆူညါ လၢအလီၤကမၢကမၣ်ဒိၣ်မးန့ၣ်လီၤ. စီၤယိၤဟၣ် ထံၣ်ဝဲဒၣ် “ဝ့ၢ်စီဆှံႇ ယရူၤၡလ့ၣ်အသီ, အိၣ်ကတဲာ်ကတီၤအသး ဒ်တလးမူးပိာ်မုၣ် ကယၢကယဲအသးလၢအဝၤအဂီၢ်အသိး” (၂၁:၂), လၢအဆဲးကပီၤဖျါထီၣ် ယွၤအလၤကပီၤန့ၣ်လီၤ. ဖဲန့ၣ်, ကစၢ်ယွၤ ကအိၣ်ဆိးဝဲဃုာ်ဒီးအၦၤဂီၢ်မုၢ်တဖၣ်န့ၣ်လီၤ. ဖဲကစၢ်ယွၤအဝ့ၢ်ပူၤန့ၣ် တၢ်မၤအၢမၤသီ, တၢ်ခံးတၢ်နၤ, ဒီးတၢ်ပျံၤတၢ်ဖုးသ့ၣ်တဖၣ် (:၂၅-၂၇) တအိၣ်ဘၣ်န့ၣ်လီၤ. တၢ်ကပီၤ, တၢ်မုာ်တၢ်ပၢၤ, ဒီးတၢ်ဂ့ၤတၢ်ဝါတဖၣ် ကပှဲၤလုာ်ကွံာ်ဝဲဒၣ်န့ၣ်လီၤ.
ဟါတၢ်အီၣ်အဂီၢ်, မုၢ်တနၤလၢ ယထံၣ်လိာ်သးဒီးယတံၤသကိးတဖၣ်န့ၣ်, ကတၢၢ်ဝဲဒၣ်လၢ ပဟဲက့ၤဟးထီၣ်ဆူလီၢ်ခံ, ဒီးလဲၤပူၤကွံာ် ကျးအခီၣ်ထံးတဖျၢၣ်န့ၣ်လီၤ. မ့ၣ်အူဖျၢၣ်အဝါဖိတဖၣ် ဘၣ်တၢ်လ့ကပီၤအီၤလၢပှၤလဲၤဟးတၢ်အကျဲဖိန့ၣ် ပဂဲၤဆၢထၢၣ်ခိးကနၣ် တၢ်ဒ့တၢ်အူ ဖဲပအီၣ်ထံလီၤသကၤအကိၣ်န့ၣ်လီၤ. ယသူၣ်မံသးမုာ်ယဲ တၢ်အကတီၢ်ဖိအံၤဘၣ်ဆၣ်, ပသ့ၣ်ညါဝဲလၢ ဟီၣ်ခိၣ်အတၢ်သူၣ်မံသးမုာ်န့ၣ် ပကထိၣ်သတြီၤအီၤဒီး တၢ်အကတၢၢ်အဒိၣ်အထီ လၢၦၤစူၢ်က့ၤနာ်က့ၤတၢ်ဖိတဖၣ် ကမုာ်လၤသးခုဘၣ်ဝဲလီၤစိၤ လီၤထီအဂီၢ်န့ၣ် တၢ်တအိၣ်ဘၣ်နီတမံၤဘၣ်န့ၣ်လီၤ.