နံၣ်လၢအပူၤကွံာ်, တယံာ်ဒံးဘၣ်န့ၣ် ယစံးဆၢတၢ်အထူအထံးအတၢ်ဒိးစဲးဝံၤ, ယအဲၣ်ဒိးသ့ၣ်ညါအါထီၣ် တၢ်ဟဲလီၤစၢၤလၢယဖံယဖုသ့ၣ်တဖၣ်အဂ့ၢ်န့ၣ်လီၤ. ယသးခုဘၣ်ယဲလၢ ယနၢ်ဟူဘၣ် ယဘူးယတံၢ်စှၤဂၤတဖၣ်အဂ့ၢ်အကျိၤ, ခီဖျိယပၢ်လၢအလဲၤပူၤကွံာ်ဟီၣ်ခိၣ်, ဒီးယမိၢ်အအိၣ်န့ၣ်လီၤ. ယနၢ်ဟူဘၣ်ယဲ ဖံဖုတဖၣ်အဂ့ၢ်န့ၣ် မၤစၢၤယၤလၢ ယတၢ်သးကလၢၢ်ဘၣ် ဒ်သိးယဒိးန့ၢ်က့ၤတၢ်ဘၣ်ထွဲဒီးယဒူၣ်ဖိထၢဖိအဂံၢ်ထံး, ဒီးမၤစၢၤယၤ, ဒ်သိးဒီးယကမၤလိန့ၢ်တၢ် လၢအဝဲသ့ၣ်အတၢ်လဲၤခီဖျိသ့ၣ်တဖၣ်န့ၣ်လီၤ.
ဘၣ်ဃးဒီးပသူၣ်ဂ့ၢ်သးကျိၤအဂံၢ်ထံးန့ၣ်, လံာ်မးသဲ ၁:၁-၁၇ ဒီး လံာ်လူၤကၣ် ၃:၂၃-၃၈ ကွဲးနီၣ်ပာ်ဖျါဝဲ ကစၢ်ယ့ၣ်ၡူးအဟီၣ်ခိၣ်အထူအထံးန့ၣ် မ့ၢ်တၢ်ဟ့ၣ်ကနၢၤတမံၤန့ၣ်လီၤ. ကစၢ်ယ့ၣ်ၡူးအထူအထံးန့ၣ် ဒုးသ့ၣ်ညါပှၤလၢ အဝဲမ့ၢ် မ့းၡံအၤ, ဒီးဟဲလီၤစၢၤဝဲလၢ စီၤအၤဘြၤဟၣ်လိၤလိၤန့ၣ်လီၤ.
ဖဲပဖးဘၣ် ကစၢ်ယ့ၣ်ၡူးအထူအထံးအဂ့ၢ်န့ၣ်ဒီး, ပကထံၣ်ဘၣ် ကစၢ်ယွၤ အတၢ်တီတၢ်လိၤ လၢအဟံးဃာ်ပၢၤဃာ်ဝဲ အတၢ်အၢၣ်လီၤအီလီၤဒီးစီၤအၤဘြၤဟၣ်, “နကကဲထီၣ် ၦၤအါကလုာ်အပၢ်” (၁မိၤ ၁၇:၁-၈) န့ၣ်လီၤ. အနံၣ်ခံကထိ လဲၤပူၤကွံာ်, ဒီးတၢ်အၢၣ်လီၤအီလီၤအံၤ လၢထီၣ်ၦဲၤထီၣ်ဝံၤန့ၣ်ဒီး, မး ၁:၁ န့ၣ် ပှၤတၢ်မၢဖိ စီၤမးသဲ ကွဲးပာ်ဖျါတ့ၢ်ဝဲလၢ “လံာ်ယ့ၣ်ၡူးခရံာ်အထူအထံးႇ စီၤဒၤဝံးအဖိခွါႇ စီၤအၤဘြၤဟၣ်အဖိခွါ” န့ၣ်လီၤ.
လံာ်စီဆှံအထူအထံးန့ၣ် ဒုးနဲၣ်ဝဲဒၣ် ကစၢ်ယ့ၣ်ၡူးအစၢၤအသွဲၣ်အဂ့ၢ်န့ၣ်လီၤ. ပထံၣ်ဘၣ် အမံၤအသၣ်တဖၣ်, လၢအမ့ၢ် စီၤလိၣ်စီၤပၤ စီၤဒၤဝံး, ဒီးၦၤပတီၢ်မုၣ်ဖိ ဒ်အမ့ၢ် ၦၤစုသ့ စီၤယိၤသးန့ၣ်လီၤ. ဒီးစီၤမးသဲ ဒၢနုာ်ဃုာ်ဝဲဒၣ် ပိာ်မုၣ်ယဲၢ်ဂၤအမံၤ လၢအမ့ၢ်, နီၢ်တၤမၢ်, နီၢ်ဘၤသရှ့ဘၤ (စီၤအူၤရံယၤအမါ), နီၢ်ရၤဃးႇ နီၢ်ရူၤသး (ယွၤဂ့ၢ်ပီညါအၦၤကူၣ်သ့ကူၣ်ဘၣ်တနီၤနီၤနာ်ဝဲလၢ အဝဲသ့ၣ်ခဲလၢာ်မ့ၢ်ၦၤတခီဘီမုၢ်ဖိ) ဒီးနီၢ်မၤရံန့ၣ်လီၤ.
ဘၣ်ဃးဒီးပသွံၣ်ထံ အတၢ်ဟဲလီၤစၢၤအဂ့ၢ်န့ၣ် ပသ့ၣ်ညါဂ့ၤ, ပတသ့ၣ်ညါဂ့ၤ, မ့ၢ်လၢပမ့ၢ်ယွၤအဒူၣ်ဖိထၢဖိတဖၣ်အဃိ, ခီဖျိလၢလံာ်စီဆှံန့ၣ် ပမၤလိန့ၢ် ပသူၣ်ဂ့ၢ်သးကျိၤ အတၢ်ဟဲလီၤစၢၤအဂ့ၢ်တဖၣ်သ့ဝဲဒၣ်န့ၣ်လီၤ. ဖဲပထံၣ်ဘၣ် ကစၢ်ယွၤ အတၢ်တီတၢ်လိၤလၢ အဝဲသ့ၣ်အလိၤန့ၣ်ဒီး, ပဒိးန့ၢ် တၢ်သူၣ်ဒူသးဒူန့ၣ်လီၤ.