ဒူသဝီဖိလၢ အိၣ်ဘှ့ၣ်အိၣ်ဘှီၣ်တဖျၢၣ်န့ၣ် ရှ(န)တဲ (Chantale) မၤဝဲ အနံၤအိၣ်ဖျၢၣ်ဆၢက့ၤတဆံသၢဝီတဝီ, အမူးသးဖှံအတၢ်ရဲၣ်တၢ်ကျဲၤအါနၣ်ရံၣ်ဝံၤ, ကျိအကလုၢ်တဖၣ်ပိၢ်ဖးထီၣ်, ဒီးမၤဟးဂီၤကွံာ် မုၢ်ဟါလီၤခီ အမုာ်အပၢၤန့ၣ်လီၤ. ရှ(န)တဲဒီးအဒီပုၢ်ဝဲၢ်တဖၣ် ဒ်အမိၢ်မၤလိာ်ဝဲလၢတၢ်ကနိးကစုာ်အပူၤအသိး, ဃ့ၢ်နုာ်လီၤဆူသ့ၣ်ၦၢ်အပူၤ, ဒီးအိၣ်ခူသူၣ်ဝဲဒၣ် န့ၣ်လီၤ. အဝဲသ့ၣ်ပာ်ဖှိၣ်အသး ဒီးအိၣ်ခူသူၣ်လၢသ့ၣ်တခိၣ်အဖီလာ်ဒီတနၤကျၢၤန့ၣ်လီၤ. ရှ(န)တဲ ပာ်ဖျါက့ၤဝဲဒၣ် “လၢခံတနံၤဂီၤခီတုၤဃီၤဝဲ, ဒီးမုၢ်ဟဲထီၣ်လံဘၣ်ဆၣ်, ပမိၢ်ပပၢ်တဖၣ်တဟဲတုၤဝဲဘၣ်” န့ၣ်လီၤ. ရှ(န)တဲ ဒီးအဒီပုၢ်ဝဲၢ်ဖိတဖၣ်ကဲထီၣ်ဝဲဒၣ် ပှၤဖိၣ်ဃဲဖိတဖၣ်, ဒီးၦၤဘၣ်ကီဘၣ်ခဲဖိတဖၣ်, ဒီးခဲကနံၣ်အံၤ, ပာ်ဖှိၣ်အိၣ်ဆိးဝဲလၢ ပှၤဘၣ်ကီဘၣ်ခဲ အဒဲကဝီၤ,ဃုာ်ဒီးၦၤလၢအကထိတဖၣ်န့ၣ်လီၤ.

ဖဲပနၢ်ဟူဘၣ် တၢ်ဂ့ၢ်တဖၣ် လၢအလီၤဂာ်ဒီး ရှ(န)တဲ အဂ့ၢ်န့ၣ်ဒီး, တၢ်လ့ပစီလီၤဘၣ်ၦၤလၢ ပတအဲၣ်ဒိးကနၣ်ဃုာ် တၢ်လီၤမၢ်ဖးဒိၣ်တဖၣ်အံၤန့ၣ်လီၤ. ဘၣ်ဆၣ်ၦၤလၢအစူၢ်က့ၤနာ်က့ၤ ကစၢ်ယွၤ လၢလံာ်စီဆှံအပူၤတဖၣ်န့ၣ်, နာ်ဝဲဒၣ် ကစၢ်ယွၤ လၢအတလဲၤကပာ်ကွၢ်ကပာ် ပှၤတူၢ်ဘၣ်တၢ်နးတၢ်ဖှီၣ်တဖၣ်, ကစၢ်ယွၤလၢ “အံးက့ၤကွၢ်က့ၤၦၤတမှံၤ, မၤစၢၤၦၤဖိၣ်ဃဲႇ ဒီးၦၤမုၣ်ကမဲ” (စံး ၁၄၆:၉) ဂ့ၤဂ့ၤဘၣ်ဘၣ်တဂၤန့ၣ်လီၤ.

“ၦၤလၢအတ့လီၤမူခိၣ်, ဒီးဟီၣ်ခိၣ်, ပီၣ်လဲၣ်, ဒီးကယဲၢ်တၢ်အိၣ်လၢအပူၤ, လၢအပၢၤဃာ်တၢ်မ့ၢ်တၢ်တီလီၤထူလီၤယိာ်” (:၆), “လၢအစံၣ်ညီၣ်ၦၤဘၣ် တၢ်မၤအၢအီၤအကွီၢ်, ဒီးဟ့ၣ်လီၤတၢ်အီၣ်တၢ်အီလၢ ၦၤတၢ်သၣ်ဝံၤအသး” (:၇) တဂၤန့ၣ်, မၤတၢ်ထီဘိန့ၣ်လီၤ.

ရှ(န)တဲ စူၣ်စံၣ် လံဒၢၣ် (Chantale Zuzi Leader), လၢအသူၣ်ထီၣ် တၢ်ကရၢကရိလၢ အသိၣ်လိနဲၣ်လိ ပှၤဘၣ်ကီဘၣ်ခဲ ပိာ်မုၣ်ဖိတဖၣ်န့ၣ် စံးဝဲဒၣ်, အတၢ်လဲၤခီဖျိ သိၣ်လိတ့ၢ်အီၤလၢ “ၦၤတဂၤဂ့ၤတဂၤဂ့ၤ, ပှၤလၢအလီၤမၢ်တ့ၢ်ဝဲ တၢ်လီၢ်အဘံၣ်အဘၢ, ဘၣ်ဖဲတဘျီန့ၣ် မ့ၢ်တ့ၢ်ဝဲ အတၢ်လီၢ်တၢ်ကျဲတဖၣ်, ကဲထီၣ်ၦၤဘၣ်ကီဘၣ်ခဲတဖၣ်သ့ဝဲဒၣ်န့ၣ်လီၤ.”

ၦၤလၢအလီၤမၢ်တၢ်လီၢ်အဘံၣ်အဘၢတဖၣ်အဂီၢ်, မ်ပတၢ်စံးဆၢမၤဆၢတၢ်တဖၣ်ကဆဲးကပီၤပာ်ဖျါထီၣ်က့ၤ ကစၢ်ယွၤ, လၢအကလုၢ်တီထီဘိတဂၤ, လၢအမ့ၢ် “တိာ်တဖျၢၣ်လၢ ၦၤဘၣ်တၢ်မၤအၢအီၤအဂီၢ်,” (စံး ၉:၉). ဒီးယွၤလၢ “အဒုးဆၢထၢၣ်ၦၤသကူး” (စံး ၁၄၆:၈) တဂၤအသူၣ်ကံၢ်သးလဲန့ၣ်တက့ၢ်.