လၢကီၢ်အမဲရကၤဒီတကီၢ်အပူၤ, ၦၤကဲဒိၣ်ကဲၦၢ်တဖၣ် ဒ်သိးကဟ့ၣ်သဆၣ်ထီၣ်ဝဲဒၣ် ၦၤမၤလိတၢ်ဖိတဖၣ်အသးသဟီၣ်အဂီၢ်, အၢၣ်လီၤအီလီၤဝဲ ၦၤကၠိဖိတဖၣ်လၢ ဖဲအထီၣ်ကၠိ တဆံသၢနံၣ်အတီၢ်ပူၤ, လၢအအိၣ်ဆိးတၢ်အလီၢ်အကျဲဒၣ်ဝဲန့ၣ်, မ့ၢ်ဖျိထီၣ်တၢ်ဒိးစဲးလၢအပတီၢ်ဂ့ၤဂ့ၤတဖၣ်န့ၣ်ဒီး, ၦၤမၤဂ့ၤမၤစၢၤတၢ်တဖၣ် ကဟ့ၣ်မၤစၢၤဆီၣ်ထွဲ တၢ်မၤလိလီၢ်ကဝီၤကမျၢၢ် ခီလ့ၣ်ကၠိ (မ) ဖၠၣ်စိမိၤ ဆူမဲာ်ညါ လွံၢ်နံၣ်အဂီၢ်, လၢအကီၢ်စဲၣ်ဒၣ်ဝဲ အပူၤန့ၣ်လီၤ. တၢ်ကွဲးနီၣ်ကွဲးဃါတဖၣ်ပာ်ဖျါဝဲဒၣ် လၢဝ့ၢ်ဖးဒိၣ်တနီၤနီၤန့ၣ် တၢ်အၢၣ်လီၤခွဲးယာ်အဂ့ၤအဝါအံၤ ထိၣ်ဟူးထိၣ်ဂဲၤထီၣ်ဝဲ ၦၤမၤလိတၢ်ဖိတဖၣ် ပှၤကဲဒိၣ်အဖိမ့ၢ်ဂ့ၤ, ပှၤဖှီၣ်ဖိယာ်တဖၣ်အဖိမ့ၢ်ဂ့ၤ, ဖဲအဝဲသ့ၣ်နၢ်ဟူတၢ်ကစီၣ်တကီၢ်ခါန့ၣ် စးထီၣ် မၤလိန့ၢ်တၢ်ဂ့ၤဂ့ၤဘၣ်ဘၣ်န့ၣ်လီၤ. ကၠိသရၣ်တဂၤ စံးဝဲဒၣ်လၢ “တၢ်ဂ့ၢ်တမံၤအံၤ ဆီတလဲကွံာ် တၢ်ပာ်သူၣ်ပာ်သးလ့ၤတက့ၢ်န့ၣ်လီၤ. ၦၤဖိသၣ်တဖၣ်လၢ အထီၣ်တီၤဘျီကၠိတဖၣ် ဒၣ်လဲာ်, စံးဝဲလၢ ကလဲၤထီၣ် ခီလ့ၣ်ကၠိန့ၣ်လီၤ. တၢ်အံၤမ့ၢ်တၢ်မၤအသးနီၢ်နီၢ်န့ၣ်လီၤ.” တၢ်အၢၣ်လီၤအီလီၤ လၢအအိၣ်ခိးပာ်လၢအမဲာ်ညါတမံၤအံၤ, မၤဆူၣ်ထီၣ်အါထီၣ် ပှၤကၠိဖိတဖၣ် သးအတၢ်ဆၢမိၣ်န့ၢ်, ဒီးအဝဲသ့ၣ်အတၢ်မုၢ်လၢ်လၢခါဆူညါအဂီၢ်န့ၣ်လီၤ.

ဒ်သိးတၢ်ကမၤစၢၤ ထိၣ်ဟူးထိၣ်ဂဲၤထီၣ် လၢသီၦၤစူၢ်က့ၤနာ်က့ၤတၢ်ဖိတဖၣ် အတၢ်စူၢ်တၢ်နာ်အဂီၢ်, ပှၤတၢ်မၢဖိ စီၤယိၤဟၣ် စံးကတိၤပာ်ဖျါဝဲ တၢ်အၢၣ်လီၤအီလီၤဘၣ်ဃးဒီးတၢ်ကမၤအသးလၢခါဆူညါအဂ့ၢ်န့ၣ်လီၤ. ကစၢ်ယ့ၣ်ၡူး အၢၣ်လီၤတ့ၢ်ဝဲလၢ ကဟဲက့ၤကဒါက့ၤဝဲဒၣ်, ဒီးဟဲက့ၤဝဲန့ၣ်ဒီး, စီၤယိၤဟၣ် စံးဝဲဒၣ် “ပကလီၤဂာ်ဒီးအီၤလီၤ. အဂ့ၢ်ဒ်အံၤ, ပကထံၣ်အီၤဒ်အအိၣ်ဝဲအသိး” (၁ ယိၤ ၃:၂) န့ၣ်လီၤ. ၦၤလၢအဖးအတၢ်ကွဲးတဖၣ် အဂီၢ်, စီၤယိၤဟၣ် ဟ့ၣ်ဂံၢ်ဟ့ၣ်ဘါဝဲဒၣ်လၢ “ဒီးကယဲၢ်ၦၤလၢအအိၣ်ဒီးတၢ်မုၢ်လၢ်အံၤ လၢအပူၤတဂၤလၢ်လၢ်န့ၣ် မၤစီဆှံထီၣ်အသးႇ ဒ်အဝဲဒၣ်စီဆှံ အသိး” (:၃) န့ၣ်လီၤ. ပအိၣ်ဒီးတၢ်မုၢ်လၢ်အဂၢၢ်အကျၢၤလၢ မုၢ်တနံၤန့ၣ် ပကထံၣ်ဘၣ် ကစၢ်ယ့ၣ်ၡူးန့ၣ်လီၤ. မ့ၢ်လၢကစၢ်ယ့ၣ်ရှူး အဲၣ်ၦၤ, ဒီးပအဲၣ်ဆၢက့ၤအီၤအဃိ, ပသးဆၢမိၣ်န့ၢ်ဝဲလၢ ပအဲၣ်ဒိးလီၤဂာ်အါထီၣ်ဒီးကစၢ်ယ့ၣ်ရှူး ခီဖျိလၢအတၢ်အၢၣ်လီၤအီလီၤအဃိန့ၣ်လီၤ.

ဖဲပထံၣ်ဘၣ် ကစၢ်ယ့ၣ်ၡူး မဲာ်သကိးမဲာ်န့ၣ် ကမ့ၢ်တၢ်အကတီၢ်အဃံအလၤမနုၤတမံၤန့ၣ်လဲၣ်. တချုးလၢတၢ်အကတီၢ်တုၤဃီၤဝဲန့ၣ်, ပကဘၣ်လူၤပိာ် ကစၢ်ယ့ၣ်ရှူးအခံ, ဒိၣ်ထီၣ်လၢပတၢ်စူၢ်တၢ်နာ်, ဒီးမုၢ်လၢ်ကွၢ်စိအတၢ်ဟဲက့ၤလၢခံတဘျီန့ၣ်လီၤ. ကစၢ်ယွၤ ကဟံးဃာ်ပၢၤဃာ် အတၢ်အၢၣ်လီၤအီလီၤန့ၣ်လီၤ.