လၢဟီၣ်ခိၣ်ဖျၢၣ် ကလံၤစိးအထိးနါ (South Pole), အမၢ(န)စၢၣ်-စကီး (Amundsen-Scott) တၢ်ဖံးတၢ်မၤအလီၢ်န့ၣ် ၦၤမၤတၢ်ဖိခံဂၤ လိၣ်ဘၣ်ဝဲ ဂ့ၢ်ဂီၢ်အူအတၢ်ကူစါယါဘျါ အဂီၢ်န့ၣ်လီၤ. ပှၤမၤတၢ်ဖိတဂၤ တူၢ်ဘၣ်ခီၣ်ဘၣ် သးဖျၢၣ်အတၢ်ဆါ, ဒီးအတဂၤန့ၣ် တူၢ်ဘၣ်ဝဲဒၣ် ကဖုအတၢ်ဆါလၢအလီၤဘၣ်ယိၣ်, တုၤလၢအသးသမူလီၤမၢ်ကွံာ်သ့ဝဲဒၣ်န့ၣ်လီၤ. လၢတၢ်ကက့ၤကိး ကူစါယါဘျါအဝဲသ့ၣ်အဂီၢ်, ကျိၤကျဲအိၣ်ဒၣ်ထဲတဘိ, ဒီးမ့ၢ်ဝဲဒၣ် တၢ်ကဆှၢလီၤ ၦၤမၤစၢၤမၤပူၤဖျဲးတၢ်ဖိတဖုန့ၣ်လီၤ. ဘၣ်ဆၣ်, လၢတၢ်အိၣ်အသးအကီအခဲ နးနးကျံးကျံး, တကးဒ်ဘၣ်န့ၣ် တၢ်ခံးသူ, ဒီးတၢ်ဂိၢ်ခါအဆၢကတီၢ်, ဖဲလါဖ့းဘြူၤအါရံၤတုၤလၢလါအီးကထိဘၢၣ်န့ၣ် တၢ်ခုၣ်တုၤဒၣ်လဲာ် မဲနၢး နွံဆံယဲၢ် ဒံၣ်ကရံၣ် စဲ(လ)စံယၢး (-75°C) (မ့) မဲနၢး တကယၤသၢဒံၣ်ကရံၣ် ဖၣ်ရ့ၣ်ဟဲး (-103°F) အဃိ, ပှၤနီၣ်ကဘီယူၤတဖၣ် တညီနုၢ်ဟ့ၣ်လီၤအသးသမူ, ဒီးလဲၤနီၣ်ယူၤဝဲဒၣ်ဆူတၢ်လီၢ်ဒ်သိးအံၤန့ၣ်ဘၣ်. ဘၣ်ဆၣ်, ၦၤနီၣ်ကဘီယူၤတဖၣ် ပာ်လီၤအသးလၢကလဲၤမၤစၢၤမၤပူၤဖျဲး ၦၤမၤတၢ်ဖိခံဂၤ, ဒီးလၢခံသီအတီၢ်ပူၤ, ဘၣ်လဲၤနီၣ်ကဘီယူၤကီကီခဲခဲဒၣ်လဲာ်န့ၣ် လဲၤမၤစၢၤတ့ၢ်ဝဲဒၣ်န့ၣ်လီၤ.
တၢ်မၤစၢၤမၤပူၤဖျဲးတၢ် အဂ့ၢ်အကျိၤတဖၣ်န့ၣ် ဒ်သိးပကမၤပိာ်ထွဲအီၤအဂီၢ်, ထိၣ်ဟူးထိၣ်ဂဲၤပသးန့ၣ်လီၤ. တၢ်မၤပူၤဖျဲးပှၤ အဂ့ၢ်အကျိၤအဒိၣ်ကတၢၢ်န့ၣ် မ့ၢ်ဝဲဒၣ် ကစၢ်ယ့ၣ်ၡူး ပှ့ၤက့ၤပှၤလၢ ပတၢ်ဒဲးဘးအဂ့ၢ်န့ၣ်လီၤ. ၁ ပ့း ၂:၂၄ န့ၣ် ပှၤတၢ်မၢဖိ စီၤပ့းတရူး ကွဲးပာ်ဖျါတ့ၢ်ဝဲလၢ “အဝဲဒၣ်အကစၢ်ဒၣ်ဝဲဒိးပတၢ်ဒဲးဘးလၢသ့ၣ်အလိၤလၢအနီၢ်ခိဒၣ်ဝဲအပူၤ, ဒ်သိး ပကသံကွံာ်လၢတၢ်ဒဲးဘးႇ ဒီးပကမူထီၣ်လၢတၢ်တီတၢ်လိၤအပူၤ” န့ၣ်လီၤ. ကစၢ်ယ့ၣ်ရှူး ဟံးထီၣ်ဒိးထီၣ် ပတၢ်ဒဲးဘး, ဒ်တၢ်လုၢ်တၢ်ပာ်တမံၤအသိး, တၢ်လုၢ်တၢ်ပာ်လၢအမ့ၢ် “ခရံာ်ဒိးတၢ်” လၢနဃိ, ဒီးလၢယဃိ (:၂၁) န့ၣ်လီၤ. လၢထူၣ်စူညါအလိၤန့ၣ် “ခရံာ်ပှ့ၤက့ၤပှၤလၢ တၢ်ဆိၣ်အၢဘၣ်ဃးဒီးတၢ်သိၣ်တၢ်သီ” (ကလၤ ၃:၁၃), ဒီးတူၢ်ခီၣ်ပတၢ်ဒဲးဘး လၢအလီၤမဲာ်ဆှးန့ၣ်လီၤ. ဒ်သိးပကဘျါဂ့ၤထီၣ်က့ၤအဂီၢ်, တၢ်ဘၣ်တီၢ် ကစၢ်ခရံာ်, ဒ်သိးပကပူၤဖျဲးလၢ တၢ်စံၣ်ညီၣ်, ဒီးလၢတၢ်ဒဲးဘးအစိအကမီၤအဂီၢ်, ခရံာ်ဘၣ်တူၢ်သံအသး (၁ပ့း ၂:၂၄, ယၡါ ၅၃:၅) န့ၣ်လီၤ.
ပသ့ၣ်ညါလၢ ပတၢ်အိၣ်သးကီကီခဲခဲအပူၤန့ၣ် တၢ်အုၣ်က့ၤခီၣ်က့ၤၦၤ ခီဖျိလၢ ကစၢ်တဂၤ, လၢအသးအိၣ်တူၢ်ဘၣ်ခီၣ်ဘၣ် ပတၢ်နးတၢ်ဖှီၣ်အဒိၣ်အယိာ်ကတၢၢ်အံၤ လၢပဂီၢ်န့ၣ် မ့ၢ်တၢ်လၢအလီၤကမၢကမၣ်ဒိၣ်မးန့ၣ်လီၤ.
