တနံၣ်ဘၣ်တနံၣ်, လၢပဟံၣ်အဒူၣ်လိၤန့ၣ် ယဟံၣ်ဖိဃီဖိတဖၣ် အိၣ်ဒီးလုၢ်လၢ်တမံၤ, လၢပဒုးအိၣ်ထီၣ် လံာ်နံၣ်လံာ်လါဘၣ်ဆၣ်, လၢခံတၢ်ဆၢကတီၢ်ယံာ်ထီၣ်ဝဲန့ၣ်ဒီး, တၢ်လီၢ်အိၣ်ပှဲၤကတံာ်ဝဲဒၣ်, မ့ၢ်လၢတလါဘၣ်တလါအဂီၢ်, ပကယၢကယဲဘျးထီၣ် နံၣ်လၢအပူၤကွံာ် တၢ်ဂီၤတဖၣ်လၢပဘၣ်သူၣ်ဘၣ်သးအီၤ, ဒီးကွဲးနီၣ်ကွဲးဃါ မုၢ်နံၤမုၢ်သီလၢအကါဒိၣ် တဖၣ် လၢဟံၣ်အဒူၣ်လိၤန့ၣ်လီၤ. ပဟံၣ်ဖိဃီဖိ တူၢ်လိာ်မုာ်ဘၣ် ပှၤအသီတဖၣ်, လၢအမ့ၢ် ဝၤ (မ့) မါ, ဒီးဖိဒံဖိသၣ်အသီတဖၣ်အဃိ, ဒ်သိးဟံၣ်ဖိဃီဖိကိးဂၤဒဲး ကဘၣ်တၢ်ပာ်ဖျါအီၤအဂီၢ်, ပဘၣ်မၤလီၤတံၢ် ဆွံနုာ်အါထီၣ်တၢ်ဂီၤတဖၣ်န့ၣ်လီၤ. ခဲကနံၣ်အံၤ, ပအိၣ်ဒီးမုၢ်နံၤမုၢ်သီ ခံကရူၢ်, လၢအမ့ၢ် နံၤအိၣ်ဖျဲၣ်ဆၢက့ၤလၢအဒံးသိးလိာ်အသးတကရူၢ်, ဒီးမုၢ်နံၤသဘျ့တဖၣ်, တၢ်ဒိးတ့ဒိးဖျီသး မုၢ်နံၤလီၤဆီတဖၣ်တကရူၢ်န့ၣ်လီၤ. ဘၣ်ဆၣ်, တၢ်အိၣ်အသး တမံၤအံၤ တမၤစှၤလီၤဝဲ လံာ်နံၣ်လံာ်လါအလုၢ်အၦ့ၤဘၣ်. အလီၢ်န့ၣ်, မ့ၢ်လၢဟံၣ်ဖိဃီဖိအသီ လၢအဘၣ်တၢ်ပာ်ဖျါထီၣ်အီၤတဖၣ်န့ၣ် ကဲထီၣ်တၢ်လုၢ်ဒိၣ်ၦ့ၤဒိၣ်လၢယဂီၢ်အဃိန့ၣ်လီၤ.

လၢယွၤအဘီအမုၢ်န့ၣ်, တၢ်တူၢ်လိာ်မုာ် ၦၤဟဲနုာ်လီၤအသီတဖၣ်, ထီဘိန့ၣ် မ့ၢ် တၢ်ဆိၣ်ဂ့ၤန့ၣ်လီၤ. လံာ်စီဆှံ ပာ်ဖျါဝဲဒၣ် “ၦၤလၢအအိၣ်သယုၢ်တဂၤဧိၤန့ၣ် ယွၤပာ်ဝဲလၢဟံၣ်ပူၤ” (စံး ၆၈:၆) န့ၣ်လီၤ. ဒ်ကစၢ်ယွၤမ့ၢ် “ၦၤဖိၣ်ဃဲအပၢ်, ဒီးၦၤလၢအစံၣ်ညီၣ်န့ၢ် ၦၤမုၣ်ကမဲအကွီၢ်” (:၅) တဂၤအသိး, ယွၤအတၢ်အဲၣ်ၦၤ, ဒီးအတၢ်ဒီတဒၢပှၤန့ၣ် ဘၣ်တၢ်ပာ်ဖျါ ခီဖျိလၢဟံၣ်ဖိဃီဖိအသနၢၣ်န့ၣ်လီၤ. ၦၤလၢအအိၣ်သယုၢ်, ၦၤလၢအဘၣ်တၢ်မၤမဲာ်ဆှးအီၤ (မ့) ၦၤလၢအဘၣ်တၢ်ဒုၣ်ဒွဲၣ်အီၤတဖၣ်န့ၣ် ကစၢ်ယွၤအသး တူၢ်လိာ်မုာ်အဝဲသ့ၣ်, ဒီး “ဒုးဟဲထီၣ် ၦၤလၢအဘၣ်စၢဃာ်လၢထးသွဲ” (:၆) တဖၣ်န့ၣ်လီၤ.

ဒ်ပမ့ၢ်ၦၤလၢအစူၢ်က့ၤနာ်က့ၤကစၢ်ယ့ၣ်ၡူးတဖၣ်အသိး, ဒ်သိးပကန့ၢ်ဘၣ်ဖိခွါ အလီၢ်အဂီၢ်, ပဘၣ်တၢ်လုၢ်ဖိက့ၤၦၤ (ကလၤ ၄:၅), ဒီးလၢတၢ်ဟ့ၣ်ခီနီၤလီၤ အတၢ်ကွဲမုာ်သဘျ့ဆူ ၦၤဂၤအအိၣ်အဂီၢ်န့ၣ် (၂ကရံၣ် ၅:၂ဝ) ဟ့ၣ်လီၤပှၤမူဒါတၢ်မၤအံၤန့ၣ်လီၤ. ဒ်ယဟံၣ်ဖိဃီဖိ အလံာ်နံၣ်လံာ်လါအပူၤ ပှၤကညီနီၣ်ဂံၢ်အါထီၣ်ဝဲအသိး, ၦၤတူၢ်လိာ် ယွၤအတၢ်ကွဲမုာ်ဆူ အဟံၣ်ဒူၣ်ဃီထၢပူၤ မ့ၢ်အါထီၣ်ဝဲန့ၣ်ဒီး, တၢ်ဃံတၢ်လၤတဖၣ် ကဟဲအိၣ်အါထီၣ်ဝဲဒၣ်န့ၣ်လီၤ. လၢပဂီၢ် ဒၢးတၢ်လီၢ်တၢ်ကျဲအဂံၢ်ထံးတဖၣ် ကလၢာ်ကွံာ်ဝဲန့ၣ် ပကဘၣ်ကိၢ်ဂီၤဝဲဒၣ်အလီၢ်တအိၣ်ဘၣ်. လၢၦၤကိးဂၤဒဲးအဂီၢ်, တၢ်လီၢ်တၢ်ကျဲတဖၣ် အိၣ်ဝဲဒၣ် လၢလၢၦဲၤၦဲၤ, ဒီးပှၤအသီတဖၣ် အိၣ်ဟဲအါထီၣ်အဃိ, ကစၢ်ယွၤကမုာ်လၤသးခုဝဲဒၣ်န့ၣ်လီၤ.