ဖဲနနၢ်ဟူတၢ်ကတိၤ “အသူးသ့ၣ်ကံၢ်စီ” န့ၣ်ဒီး, တၢ်ဆိကမိၣ် ဟဲနုာ်လီၤလၢနသးပူၤ အဆိကတၢၢ်တမံၤန့ၣ် ကမ့ၢ်တၢ်မနုၤလဲၣ်. နတၢ်ဆိကမိၣ် ကဆှၢနၤသ့ၣ်သ့ၣ်ဆူ တၢ်စုလီၢ်ခီၣ်ခိၣ်ဟံၣ်ဃီ, ဟီၣ်ခိၣ်တၢ်လီၢ်တၢ်ကျဲန့ၣ်လီၤ. ဘၣ်ဆၣ်, “တၢ်အသူးသ့ၣ်က့ၢ်စီ (မ့) လုၢ်လၢ်သကဲာ်ပဝးလီၤဆီ ဘၣ်ဃးဒီး ပှၤတဂၤဂၤ (မ့) ပိးလီတမံၤမံၤ” စ့ၢ်ကီးန့ၣ် ကဟဲနုာ်လီၤလၢနသးအတၢ်ဆိကမိၣ်အပူၤန့ၣ်လီၤ. ပမ့ၢ်ကွၢ်တၢ်အဒိ, သ့ၣ်တကလုာ်ဒီးတကလုာ်န့ၣ် အိၣ်ဒီးအသူးသ့ၣ်ကံၢ်စီစူၢ်စူၢ်န့ၣ်လီၤ. သ့ၣ်အညါ ကမ့ၢ်တၢ်ဒ်လဲၣ်တကလုာ်လဲၣ်, မ့ၢ်သံးလီၤအသးကန့ၢ်ဆံးအါလဲၣ်, မ့ၢ်အတူၢ်ခီၣ်ထံကန့ၢ်ဆံးအါလဲၣ်. ပမ့ၢ်စံးလၢကျဲအဂၤတဘိန့ၣ်, သ့ၣ်တကလုာ်အသူးသ့ၣ်ကံၢ်စီန့ၣ် မ့ၢ်နနာ်န့ၢ်အီၤကသ့ဝဲဒၣ်ထဲလဲၣ်န့ၣ်လီၤ.
ယၤဒီးယမၤ ပလဲၤဘါသကိးတၢ်ဒီးတၢ်အိၣ်ဖှိၣ်လၢ ပာ်ဖှိၣ်ဃ့ထုကဖၣ်သကိးတၢ်, တၢ်ဖးလံာ်စီဆှံ, တၢ်ချံးလီၤခီၣ်, ဒီးတၢ်ဟံးန့ၢ်ဘူၣ်စီဆှံ ဒ်မိၢ်ပၢ်ဖံဖုအစိၤအသိးန့ၣ်လီၤ. တၢ်ဘါကိးနွံဒဲးန့ၣ် တၢ်ထုကဖၣ်အါထံၣ်အကျါ, ပဃ့ထုကဖၣ်တၢ်တထံၣ်န့ၣ် မ့ၢ်ဝဲ “ယွၤဧၢ, နမ့ၢ်ကစၢ်တဂၤဃီလၢ အိၣ်ဒီးတၢ်သူၣ်ကညီၤသးကညီၤ အသူးသ့ၣ်ကံၢ်စီထီဘိတဂၤ” န့ၣ်လီၤ. ကစၢ်ယွၤန့ၣ် တမ့ၢ်တၢ်စုလီၢ်ခီၣ်ခိၣ်ဟံၣ်ဃီ, ဟီၣ်ခိၣ်တၢ်လီၢ်တၢ်ကျဲဘၣ်. မ့မ့ၢ် တၢ်အသူးသ့ၣ်ကံၢ်စီ (မ့) လုၢ်လၢ်သကဲာ်ပဝးလီၤဆီ ဘၣ်ဃးဒီးယွၤ- ယွၤအတၢ်သူၣ်ကညီၤသးကညီၤန့ၣ် မ့ၢ်ဝဲဒၣ်တၢ်လၢထီဘိအဂီၢ်, ဒီးတမ့ၢ်ဝဲဒၣ်ထဲတဘျီဧိၤအဂီၢ်ဘၣ်န့ၣ်လီၤ.
နဃ့မယၤ အဆၢဒိၣ် ၉ ဟ့ၣ်ပှၤ တၢ်ဂီၤအက့ၢ်ဂီၤလၢ “ပှၤအံၣ်စရ့လးဖိ အိၣ်ဖှိၣ်ရိဖှိၣ်, ဒီးဒုၣ်တၢ်အီၣ်, အိၣ်ဝဲဒီးထၢၣ်အတၢ်ကံးညာ်, ဒီးဟီၣ်ခိၣ်အကမုၣ်အိၣ်ဝဲလၢအလိၤ” (:၁), ဒီးအဆၢဖိ ၂ ဒီး ၁၆ န့ၣ် “တဲလီၤကျဲၤလီၤ အတၢ်ဒဲးဘး, ဒီးအပၢ်တဖၣ် အတၢ်အၢတၢ်သီတဖၣ်” န့ၣ်လီၤ. အဆၢဖိ ၁၉ ပာ်ဖျါဝဲဒၣ်လၢ “နဲဒၣ်နတလဲၤသဒၣ်ဘၣ်အီၤလၢပှၢ်မုၢ်ကနၢ လၢနသးအိၣ်တၢ်ဒိၣ်ဒိၣ်ကလဲာ်အဃိ,” စံးထီၣ်ပတြၢၤ ကစၢ်ယွၤ အတၢ်သူၣ်စူၤသးစူၤလၢပှၤအံၣ်စရ့လးဖိ အတၢ်စံၣ်စိၤတဲစိၤအပူၤအဂ့ၢ်န့ၣ်လီၤ. ယွၤ မၤကတၢၢ် (မ့) စူးကွံာ်ညိကွံာ် အပှၤဂီၢ်မုၢ်န့ၣ် သ့ဝဲဘၣ်ဆၣ်, တမၤဝဲနီတဘျီဘၣ်. ဘၣ်မနုၤအဃိလဲၣ်. တၢ်မၤကတၢၢ် (မ့)တၢ်စူးကွံာ်ညိကွံာ်တၢ်န့ၣ် တမ့ၢ် ကစၢ်ယွၤ အသူးသ့ၣ်ကံၢ်စီဘၣ်. အဂ့ၢ်ဒ်အံၤ, ယွၤမ့ၢ် “ကစၢ်တဂၤလၢ အသူၣ်ကညီၤတၢ်သးကညီၤတၢ်, ဒီးသးအိၣ်တၢ်” အဃိ (:၃၁) န့ၣ်လီၤ.
လၢပတၢ်ထုကဖၣ် တဲလီၤကျဲၤလီၤ ပတၢ်ဒဲးဘးတဖၣ်အပူၤန့ၣ် မ်ပစံးထီၣ်ပတြၢၤ ကစၢ်ယွၤ အသူးသ့ၣ်ကံၢ်စီ, လၢအမ့ၢ်အတၢ်သူၣ်ကညီၤသးကညီၤလၢ ပနာ်န့ၢ်အီၤသ့န့ၣ်တက့ၢ်.
