ကၠူလယၣ် (Julia) ပၢၤဃာ်ဝဲဒၣ် တၢ်ကစီၣ်ဖိ လၢအဝၤဆှၢန့ၢ်အီၤ “ယအဲၣ်နၤလီၤ. ယတလဲၤသဒၣ်နၤနီတဘျီဘၣ်” န့ၣ် လၢအကွဲၤဒီနၢ်ပူၤ, ဒ်သိးကဖးဝဲ ဖဲအပျံၤတၢ်တဘျီလၢ်လၢ်အကတီၢ်န့ၣ်လီၤ. ဖဲအဝဲမ့ၢ်ဖိသၣ်အကတီၢ်, ဘၣ်လဲၤခီဖျိဝဲ တၢ်ကီတၢ်ခဲတဖၣ်အဃိ, အတၢ်ပျံၤတၢ်ဖုးလၢ တၢ်ကစူးကွံာ်ညိကွံာ်အီၤန့ၣ် အိၣ်ထီၣ်လၢအသးပူၤန့ၣ်လီၤ. ကၠူလယၣ် မၢအဝၤ မၤလီၤတံၢ်အီၤတလီၢ်လီၢ်, ဒီးအိၣ်ခိးကွၢ်လၢ်ဝဲ အဝၤကဟဲက့ၤလၢ အတၢ်ဖံးတၢ်မၤအလီၢ်, လၢတၢ်ဘၣ်ယိၣ်ဘၣ်ဘီအပူၤန့ၣ်လီၤ.

ဒ်သိးကၠူလယၣ် ကကွၢ်ဆၢၣ်မဲာ် အတၢ်ပျံၤတၢ်ဘၣ်ယိၣ်တဖၣ် လၢကျိၤကျဲအဘၣ်အဂီၢ်, တၢ်ထုကဖၣ်, ဒီးတၢ်စံးကတိၤဟ့ၣ်ကူၣ်အီၤတဖၣ်န့ၣ် မၤစၢၤအီၤန့ၣ်လီၤ. အဝဲစံးဝဲဒၣ်လၢ ယကွၢ်ဆၢၣ်မဲာ် ယတၢ်ပျံၤတၢ်ဖုးတဖၣ်အံၤ ခီဖျိလၢယဝၤအတၢ်အၢၣ်လီၤ, လၢအပှဲၤဒီးတၢ်အဲၣ်န့ၣ်လီၤ. ယဆိကမိၣ်တ့ၢ်ယဲလၢ အတၢ်အၢၣ်လီၤတဖၣ်န့ၣ်တီဝဲ, ဒီးမၤဝဲဒ်အစံးတ့ၢ်ဝဲအသိးန့ၣ်လီၤ.

စီၤပၤ ယၤရၤဘၣ် စ့ၢ်ကီး အိၣ်ဒီးအတၢ်ပျံၤတၢ်ဖုးလၢ အခီၣ်ထံးခီၣ်ဘိတအိၣ်န့ၣ်လီၤ. မ့ၢ်လၢ စီၤရှလိၤမိၤ တဒိကနၣ်ယွၤအဃိ, ကစၢ်ယွၤ အၢၣ်လီၤအီလီၤ စီၤယၤရၤဘၣ်လၢ,“ဒီးယကဟံးန့ၢ် ဘီမုၢ်န့ၣ်လၢ (စီၤဒၤဝံး) အဖိခွါအစုပူၤ, ဒီးယကဟ့ၣ်လီၤအီၤလၢနၤ, ပှၤဆံဆဲၣ်ဒူၣ်” (၁ စီၤ ၁၁:၃၅) န့ၣ်လီၤ. အဆၢဖိ ၃၈ န့ၣ် ကစၢ်ယွၤ မၤလီၤတံၢ် စီၤယၤရၤဘၣ်လၢ” နမ့ၢ်ဒိကနၣ် ကယဲၢ်တၢ်လၢ (ယွၤ) ယမၤလိာ်နၤန့ၣ်,… ယကဟ့ၣ် အံၣ်စရ့လးလၢနၤ” န့ၣ်လီၤ.

ဘၣ်ဆၣ်, ယၤရၤဘၣ် တဂၤပျံၤတၢ်, ဒီးဆိကမိၣ်ဝဲလၢ, “ပှၤဂီၢ်မုၢ်အံၤ မ့ၢ်လဲၤထီၣ် ဒ်သိး အကလုၢ်တၢ်လၢယွၤအဟံၣ်ပူၤလၢ ယရူၤရှလ့ၣ်န့ၣ်ဒီး, ပှၤဂီၢ်မုၢ်အံၤအသးကက့ၤကဒါက့ၤဆူ အကစၢ် (ယူၤဒၤအစီၤပၤ ရဃၤဘၣ်) အအိၣ်” (၁၂:၂၇) န့ၣ်လီၤ. အတၢ်ပျံၤဘၣ်ယိၣ်တၢ်န့ၣ် နဲၣ်ဆှၢအီၤလၢ ကသူၣ်ထီၣ် တၢ်ဂီၤတၢ်ဖီၣ်အတၢ်ဘါလီၢ် လၢအံၣ်စရ့လးအဂီၢ်, ဒ်သိးဒီးကတြီဆၢ ပှၤဂီၢ်မုၢ် လၢအသုတက့ၤကဒါဆူ စီၤရှလိၤမိၤ အဖိခွါအအိၣ် (:၂၆-၃၃) န့ၣ်လီၤ. စီၤယၤရၤဘၣ် ဘၣ်ကွၢ်ဆၢၣ်မဲာ် ယွၤအတၢ်စံၣ်ညီၣ် (၁၄:၇-၁၆) န့ၣ် မ့ၢ်တၢ်အစၢလၢပိာ်ထွဲထီၣ်အခံ န့ၣ်လီၤ. အဝဲမ့ၢ်နာ်န့ၢ်ဝဲထဲ ယွၤအတၢ်အၢၣ်လီၤတမံၤဧိၤန့ၣ်ဒီး, တၢ်ကမၤအသးအဂၤတမံၤန့ၣ်လီၤ.

တၢ်ပျံၤတၢ်ဖုးလၢ အခီၣ်ထံးခီၣ်ဘိတအိၣ်တဖၣ်န့ၣ် တလိၣ်လၢ ပကဘၣ် ကွၢ်ဆၢၣ်မဲာ် ပကစၢ်ဒၣ်ဝဲဘၣ်. လၢအကလုၢ်ကထါအပူၤန့ၣ် ကစၢ်ယွၤဟ့ၣ်လီၤတ့ၢ်ပှၤ တၢ်ဘံၣ်တၢ်ဘၢ ခီဖျိလၢအတၢ်အၢၣ်လီၤတဖၣ်န့ၣ်လီၤ. မ်ပကပျဲ ယွၤအတၢ်မ့ၢ်တၢ်တီတဖၣ်, လၢအပှဲၤဒီးတၢ်အဲၣ်န့ၣ် မၤကပီၤထီၣ် ပသးအတၢ်ဆိကမိၣ်, ဒီးပခီၣ်ခါတဖၣ်န့ၣ်တက့ၢ်.