အရံး(စ)တိၣ်တၢၣ် စံးဝဲလၢ ပှၤကကဲထီၣ် တံၤသကိးလၢ ယွၤန့ၣ် တသ့ဘၣ်န့ၣ်လီၤ. ဘၣ်မနုၤအဃိလဲၣ်. အဂ့ၢ်ဒ်အံၤ, တၢ်ရ့တံၤရ့သကိးစံးတၢ်န့ၣ် လိၣ်ဘၣ်ခွဲးယာ်အတီၤအပတီၢ်ဒ်သိးသိးအဃိ, မ့ၢ်ယွၤကအိၣ်ဝဲတဂၤဂၤ လၢကစူးကွံာ်ညိကွံာ် အလီၢ်အလၤလၢမူခိၣ်, ဒီးကကဲထီၣ် ပှၤတုၤသိးသိးဒီးပှၤဟီၣ်ခိၣ်ဖိလၢ အပတီၢ်ဖုၣ်တဖၣ်န့ၣ် ဘၣ်ကသ့ဝဲဒၣ်ဧါ.
ယဆိကမိၣ်ထီၣ်ယဲလၢ ဖဲဟါတၢ်အီၣ်လၢခံကတၢၢ်အကတီၢ်, အရ့း(စ) တိၣ်တဲၣ် မ့ၢ်ဘၣ်အီၣ်အီသကိးတၢ်ဒီးကစၢ်ခရံာ် (မး ၂၆:၂၆-၃၅) န့ၣ်ဒီး, ကမၤဝဲတၢ်မနုၤတမံၤလဲၣ်န့ၣ်လီၤ. ဖဲန့ၣ်, ကစၢ်ယ့ၣ်ရှူး- ကယဲၢ်တၢ်ဘၣ်တ့ခဲလၢာ် အကစၢ်တဂၤ, လၢအစူးကွံာ် ညိကွံာ်မူခိၣ်ဘီမုၢ်, ဒီးလိၣ်ထီၣ်အသးလၢပှၤကညီ, ဒီးဒိးန့ၢ်ကုၢ်အက့ၢ်အဂီၤ (ဖံ ၂:၆-၈, ကလီး ၁:၁၆) န့ၣ်လီၤ. ဒီးစံးဘၣ်တဲဘၣ် အပျဲၢ်အဘီၣ်တဖၣ်လၢ “ယတကိးလၢၤဘၣ်သုလၢကုၢ်လၢပှၤဘၣ်…., ယကိးက့ၤလံသု လၢတံၤလၢသကိး” (ယိၤ ၁၅:၁၅) န့ၣ်လီၤ.
ပှၤဆ့ၣ်နီၤ လၢဟါတၢ်အီၣ် အစီၢ်နီၤခိၣ်တဖၣ်အဃိ, အရ့း(စ) တိၣ်တဲၣ် စ့ၢ်ကီး ကကမၢကမၣ်ဝဲဒၣ်န့ၣ်လီၤ. ဖဲန့ၣ်, စီၤမးသဲ, ပှၤထၢန့ၢ်တၢ်အခိအသွဲ လၢပှၤရိမ့ၤဖိအဂီၢ်, ဝံၤန့ၣ်ဒီး, စီၤရှံမိၣ်, ပှၤစ့ၤလိာ်ဖိလၢ အထီဒါပှၤရိမ့ၤဖိတဖၣ် (မး ၁၀:၃-၄), ဃုာ်ဒီး, “လီသီၣ်အဖိခွါ,” စီၤယိၤဟၣ်ဒီးစီၤယၤကိာ် (မၢ် ၃:၁၇) ဆ့ၣ်နီၤသကိးဘှ့ၣ်ဘှ့ၣ်ဘှီၣ်ဘှီၣ်ဒီး စီၤဖံလံးန့ၣ်လီၤ. ယထံၣ်ဆိကမိၣ်ယဲလၢ အရံး(စ)တိၣ်တၢၣ် တဂၤ ကကွၢ်ဝဲ,ဒီးလၢ အသးပူၤန့ၣ် ကအိၣ်ပှဲၤဝဲဒီးတၢ်သံကွၢ်, ဖဲကစၢ်ယ့ၣ်ရှူး ပာ်ဖျါထီၣ် ကိၣ်ဒီးစပံးထံ, ဒ်အ “နီၢ်ခိ,” ဒီး “အသွံၣ်,” ဘၣ်တၢ်မၤလီၤကလဲ, ဒီးဘၣ်တၢ်ဂၢ်လီၤအီၤလၢ “တၢ်ပျၢ်တၢ်ဒဲးဘး” အဂီၢ် (မး ၂၆:၂၆-၂၇) န့ၣ်လီၤ. ပှၤကညီ လၢအသံသ့တဖၣ်အဂီၢ်, ဒီးတယံာ်ဘၣ်န့ၣ် ကစူးကွံာ်ညိကွံာ်အီၤဒၣ်လဲာ်, (:၅၆) မ့ၢ်ကစၢ်ယွၤ မတၤတဂၤ ကတူၢ်သံအသးန့ၣ်လဲၣ်.
တၢ်အံၤမ့ၢ် ဘူၣ်စီဆှံ (ဟါတၢ်အီၣ်) အခီပညီ အဒိၣ်အယိာ် အဂ့ၢ်အကျါတမံၤ န့ၣ်လီၤ. ခီဖျိလၢ ကစၢ်ယ့ၣ်ရှူးန့ၣ် ကစၢ်ယွၤ ကဲထီၣ်တံၤသကိး လၢပှၤကညီၤတဖၣ်အဂီၢ်, လၢထံဂ့ၢ်ကီၢ်ဂ့ၢ်အတၢ်ထံၣ်, ဒီးလုၢ်လၢ်ကံၢ်စီတဖၣ် တဒ်သိးလိာ်အသးဒၣ်လဲာ်, ဒုးအိၣ်ထီၣ် တၢ်ရ့လိာ်ဘၣ်ထွဲလိာ်သးဒီးပှၤဟီၣ်ခိၣ်ဖိတဖၣ်န့ၣ်လီၤ. ဖဲပအီၣ်အီသကိးတၢ်လၢ ကစၢ်အစီၢ်နီၤခိၣ်န့ၣ်, မ့ၢ်ဒၣ်ပမၤလၤကပီၤ ယွၤလၢအကွဲးက့ၤ ယွၤဒီးပှၤကညီ အဘၢၣ်စၢၤ, တၢ်ရ့လိာ်မုာ်လိာ်အတၢ်ဘျၢအသီတဖၣ်န့ၣ်လီၤ.
