ကၠိစဖံ ဘၢးတလၢၢ် (Josephine Butler) မ့ၢ်ကိတိာ်အမါ, ပိာ်မုၣ်လၢ အမံၤဟူသၣ်ဖျါ တဂၤအံၤ, ထံၣ်လီၤက့ၤအသး ဒ်အမ့ၢ် ပှၤဂဲၤပျုၢ်ဃ့န့ၢ် ပိာ်မုၣ်တဖၣ် အတၢ်ခွဲးတၢ်ယာ်အဂီၢ်, လၢတဒိးန့ၢ်တၢ်စံၣ်ညီၣ်တီ, ဘၣ်တၢ်ပာ်ဖျါအဝဲသ့ၣ် ဒ်အမ့ၢ် “ပိာ်မုၣ်တဖၣ် မၤတၢ်လၢမုၢ်နၤအကတီၢ်” (Ladies of the night), ဒီးပှၤတဝၢဖိတဖၣ် ထံၣ်အဝဲသ့ၣ်လၢ “ပှၤတဘၣ်သူၣ်ဘၣ်သးအဒိၣ်ကတၢၢ်တဖၣ်” (Least desirables) န့ၣ်လီၤ. တၢ်လၢအါနံၣ်အါလါအတီၢ်ပူၤ, အတၢ်စူၢ်တၢ်နာ် ယွၤအဒိၣ်အယိာ်န့ၣ် သဆၣ်ထီၣ်အီၤ ဒ်သိးကကျဲးစၢးထီဒါ ကီၢ်အဲကလံး အတၢ်ဘျၢသဲစး ဘၣ်ဃးဒီးတၢ်ဆါဘၣ်ကူဘၣ်ဂာ်အဂ့ၢ်, ဘၣ်တၢ်ပာ်ဂၢၢ်အီၤ ဖဲ ၁၈၆၀ နံၣ်န့ၣ်လီၤ. တၢ်ဘျၢသဲစးပာ်ဖျါဝဲ ပိာ်မုၣ်တဖၣ် တၢ်ဆါဘၣ်ကူဘၣ်ဂာ် မ့ၢ်အိၣ်-တအိၣ်, ဒ်သိးတၢ်ကသ့ၣ်ညါအီၤအဂီၢ် ကဘၣ်တၢ်မၤကွၢ် နးနးကျံးကျံး, ဒီးတၢ်လၢအလီၤဘၣ်ယိၣ်အိၣ်ဝဲတဖၣ်န့ၣ်လီၤ.

ဖဲ ၁၈၈၃ နံၣ် တၢ်ကဘှီက့ၤ တၢ်ဘျၢသဲစးအဂီၢ်န့ၣ် ဖါလ့မဲာ် (parliamentary) တၢ်တဲလိာ်ဃိလိာ်သးအကတီၢ်, အဝဲလဲၤဃ့ဘါထုကဖၣ်သကိးတၢ်ဒီးပိာ်မုၣ်အဂၤတဖၣ်လၢ ဝဲး(စ)မ့စတၢၣ် (Westminster) တၢ်ဘါသရိၣ်န့ၣ်လီၤ. ဖဲ ကၠိစဖံ ထံၣ်ဘၣ်ဝဲ ပိာ်မုၣ်ကူကၤဝဲ ယာ်မုၣ်ယာ်ဖျ့တဖၣ် အိၣ်ဟဲလၢ ဝ့ၢ်ကပိာ်ကပၤ, ဒီးပိာ်မုၣ်တူၢ်ဒိၣ်မုၣ်လၢ လီၤဒိၣ်လၤထီတဖၣ် ပာ်ဖှိၣ်ထီၣ်အသး, ဒီးလၢမဲာ်ထံမဲာ်နိအပူၤ ဃ့ထုကဖၣ်တၢ်လၢ ပှၤဂံၢ်စၢ်တဖၣ် ကပူၤဖျဲးထီၣ်ဝဲအဂီၢ်န့ၣ်ဒီး, အသူၣ်ဟူးသးဂဲၤဝဲဒၣ်ဒိၣ်မးန့ၣ်လီၤ. မ့ၢ်လၢတၢ်တူၢ်လိာ်တၢ်ဘျၢသဲစးအသီအဃိ, အဝဲသ့ၣ်အသူၣ်သးခုဝဲဒၣ်ဒိၣ်မးန့ၣ်လီၤ.

ဒ်သိး ကၠိစဖံ ကမၤတၢ်တီတီလိၤလီၤတမံၤအံၤန့ၣ် ပာ်ဖျါထီၣ်က့ၤ ဝံယံးရမံယၤ အတၢ်ကတိၤ, လၢအလဲၤစိာ်ဝဲ ယွၤအတၢ်ကစီၣ်ဆူ စီၤပၤ အအၢအသီတဖၣ်အအိၣ်န့ၣ်လီၤ. ယံးရမံယၤ စံးဝဲဒၣ်, “ယွၤစံးဒ်အံၤ, မၤတၢ်စံၣ်ညီၣ်, ဒီးတၢ်တီတၢ်လိၤ, ဒီးမၤပူၤမၤဖျဲးပှၤလၢ အဘၣ်တၢ်ဂုာ်န့ၢ်အီၤလၢ ပှၤမၤအၢတၢ်အစုပူၤတက့ၢ်. ဒီးတၢ်တတီဘၣ်မ့ၢ်ဂ့ၤ, တၢ်မၤန့ၢ်ဆူၣ်မ့ၢ်ဂ့ၤ မၤပှၤတခီဘီမုၢ်ဖိ, ပှၤဖိၣ်ဃဲ, ပှၤမုၣ်ကမဲန့ၣ်တဂ့ၤ” (ယံး ၂၂:၃) န့ၣ်လီၤ. ယွၤအသးအိၣ်ဒီတဒၢ ပှၤလၢမၤစၢၤလီၤအသးတသ့တဖၣ်, ဒီးထီဒါ ပှၤန့ၢ်စိန့ၢ်ကမီၤတဖၣ်န့ၣ်လီၤ.

ပကမၤတၢ်အဂီၢ်, ယွၤ ထိၣ်ဟူးထိၣ်ဂဲၤထီၣ်ပှၤ သ့ဝဲစ့ၢ်ကီးန့ၣ်လီၤ. ယွၤမၤစၢၤပှၤ ဒ်သိးပကသ့ၣ်ညါနီၤဖး တၢ်တတီတလိၤ, ဒီးစံးကတိၤထီဒါ, မၤတၢ်လၢ ပှၤတဒိးန့ၢ်ခွဲးန့ၢ်ယာ် တုၤသိးသိးတဖၣ်အဂီၢ်န့ၣ်လီၤ. ဒ်သိးပကဟံးဃာ်ဂၢၢ်ကျၢၤ တၢ်စံၣ်ညီၣ်တီ, ဒီးဒီတဒၢ ပှၤဂံၢ်စၢ်တဖၣ်အဂီၢ်, ယွၤလၢအသးဟ့ တၢ်မၤတရီတပါတဂၤအံၤ ဟ့ၣ်စိဟ့ၣ်ကမီၤပှၤန့ၣ်လီၤ.