လၢသမှံၤဟံၣ်ဒွဲ, ထ့(မ) (Tim) အဒၢးန့ၣ် ဖျါလၢတၢ်ခံးလီၤဆီ ဖဲမုၢ်နၤအကတီၢ် န့ၣ်လီၤ. အဝဲမ့ၢ်ပၢၢ်ထီၣ်ဝဲဒၣ်လၢမုၢ်နၤအကတီၢ်, ဒီးခီဖျိလၢတထံၣ်ဘၣ်တၢ်အဃိ. အခီၣ်မ့ၢ်လီၤတလံာ်, မ့ၢ်လီၤဃံၤန့ၣ်ဒီး, တၢ်ကမၤအသးလၢအီၤဒ်လဲၣ်. ဘၣ်ဆၣ်, ဖဲ ထ့(မ) ပၢၢ်ထီၣ်န့ၣ်ဒီး, ကမၢကမၣ်ဝဲလၢ ထံၣ်ဘၣ်တၢ်ကပီၤဆဲးကပီၤဖျါဝဲဒၣ်လၢအလီၢ်မံခးအဖီလာ်, ဒီးမၤကပီၤထီၣ်အကျဲန့ၣ်လီၤ. ပိးလီလၢ အထိၣ်ဂဲၤထီၣ်ဝဲ တၢ်ကပီၤ, ခီဖျိလၢတၢ်ဟူးတၢ်ဂဲၤအဃိန့ၣ်လီၤ. အဝဲမ့ၢ်ပၢၢ်ထီၣ်, ဒီးစးထီၣ်လဲၤက့ၤတၢ်န့ၣ်ဒီး, တၢ်ကကပီၤထီၣ်ဝဲန့ၣ်လီၤ.

လံာ်စီဆှံ ပာ်ဖျါဝဲဒၣ် ပကဘၣ်လဲၤတၢ်ကျၢၤမူဆှူ လၢယွၤအတၢ်ကပီၤပူၤန့ၣ်လီၤ. လၢဝ့ၢ် အ့းဖ့းစူးအပူၤန့ၣ်, စီၤပီလူး စံးဘၣ်တဲဘၣ် ပှၤစူၢ်က့ၤနာ်က့ၤ ကစၢ်ယ့ၣ်ရှူးသီသီဖိတဖၣ်လၢ “ကဲထီၣ်ပှၤကွၢ်လိယွၤ,… ဒီးလဲၤသုဝဲလၢ တၢ်အဲၣ်တၢ်ကွံအပူၤ” (အ့းဖ့း ၅:၁-၂) န့ၣ်လီၤ. ဘၣ်ဆၣ်, ပမ့ၢ်လဲၤဝဲ ဒ်သိးအံၤန့ၣ်ဒီး, တၢ်ကမၤအသးမနုၤတမံၤလဲၣ်.

ဖဲပယီၢ်နုာ်လီၤဆူ ကစၢ်ခရံာ် တၢ်အဲၣ်အတၢ်ကပီၤအပူၤန့ၣ်, မ့ၢ်ဒၣ်ပစူးကွံာ်ညိကွံာ် ပတၢ်ဒဲးဘး- လၢအမ့ၢ် တၢ်အိၣ်မူတတီတလိၤ, တစီတဆှံ, တၢ်ဘါတၢ်ဂီၤတၢ်ဖီၣ်, ဒီးတၢ်သူၣ်လီသးကွံတဖၣ်န့ၣ်လီၤ. စီၤပီလူး စံးဝဲဒၣ်လၢ, “မၤဃုာ်ဒီးတၢ်ခံးအတၢ်မၤလၢ အတၤသၣ်တအိၣ်ဘၣ်န့ၣ်တဂ့ၤ. အခိၣ်တလိာ် သိၣ်ဃီၣ်အီၤတက့ၢ်” (:၁၁) န့ၣ်လီၤ. လၢဝ့ၢ် အ့းဖ့းစူး န့ၣ် တၢ်ဘါတၢ်ဂီၤတၢ်ဖီၣ်တဖၣ်အါထီၣ်ဝဲဘၣ်ဆၣ်, အဆၢဖိ ၈ န့ၣ် တၢ်မၢဖိ စီၤပီလူး အတၢ်ကတိၤ, “လၢသီန့ၣ်သုမ့ၢ်တၢ်ခံး, မ့မ့ၢ်ခဲကနံၣ်အံၤ, သုမ့ၢ်တၢ်ကပီၤလၢကစၢ်အပူၤလီၤ. လဲၤတၢ်ဒ်တၢ်ကပီၤဖိအသိးန့ၣ်တက့ၢ်” အံၤ မၤလိၤက့ၤ ပှၤစူၢ်က့ၤနာ်က့ၤတၢ်သီသီဖိတဖၣ်အတၢ်အိၣ်မူန့ၣ်လီၤ. ဒီးပာ်ဖျါအါထီၣ်ဝဲလၢ “အဂ့ၢ်ဒ်အံၤ, တၢ်ကပီၤအတၤသၣ် မ့ၢ်ကယဲၢ်တၢ်မၤဂ့ၤ, ဒီးတၢ်တီတၢ်လိၤ, ဒီးတၢ်မ့ၢ်တၢ်တီလီၤ.” လၢတၢ်န့ၣ်အဃိ, “ဂုာ်ဃု သ့ၣ်ညါ တၢ်လၢအဘၣ်ကစၢ်အသးတက့ၢ်” (:၉-၁၀) န့ၣ်လီၤ.

တၢ်လၢအကဲဘျုးန့ၣ် ကမ့ၢ်တၢ်မနုၤလဲၣ်. “ခရံာ်ကဟ့ၣ်လီၤနၤတၢ်ကပီၤ” (:၁၄)ဒီးကမၤကပီၤထီၣ်နကျဲ, ဒီးအဆၢဖိ ၁၅ န့ၣ် စီၤပီလူး မၤကတၢၢ်ဝဲလၢ “မၤသးဒ်န့ၣ်ဒီးတိၢ်သုသးဒ်သိးသုကလဲၤကွၢ်ဟုၣ်ကွၢ်စုးတၢ်” န့ၣ်လီၤ. လၢတၢ်စူၢ်တၢ်နာ်အဂၢၢ်အကျၢၤအပူၤ, တၢ်လဲၤလၢ ကစၢ်ခရံာ်အတၢ်ကပီၤန့ၣ်, ဒ်ပနဲၣ်ဆှၢပှၤဂုၤပှၤဂၤတဖၣ်ဆူ ကစၢ်ခရံာ်- လၢအမ့ၢ်တၢ်ကပီၤနီၢ်နီၢ်အဂံၢ်ထံးန့ၣ်ဒီး, ပကကဲထီၣ်တၢ်ဆိၣ်ဂ့ၤလၢ အဝဲသ့ၣ် အဂီၢ်န့ၣ်လီၤ.”