ပှၤသးပှၢ်တဖၣ်လၢအအိၣ်လၢ ပှၤအံးထွဲကွၢ်ထွဲတၢ်အဟံၣ်, ဒီးအဟံၣ်ဖိဃီဖိ တဟဲအိၣ်သကိးအဝဲသ့ၣ်တဖၣ်, မုၣ်ကမဲတဂၤ မ့ၢ်လၢတအဲၣ်ဒိးအိၣ်ဆိးဝဲလၢဟံၣ်ပူၤ ထဲတဂၤဧိၤအဃိ ဘၣ်လဲၤဟးမၤလၢာ်တၢ်ဆၢကတီၢ်လၢတၢ်ချၢ, သူၣ်ဂ့ၢ်သးကျိၤခိၣ်နၢ်တဖၣ်လၢ အတအိၣ်ဒီးပှၤတဂၤဂၤလၢကနာ်န့ၢ်ဝဲ, ဒီးပှၤဟံၣ်ဃီတအိၣ် လၢပှၤတကနၣ်ဃုာ်အီၤတဖၣ်, ဒီးဘၣ်အိၣ်ဝဲထဲတဂၤဧိၤတဖၣ်န့ၣ် ဘၣ်ဂဲၤလိာ်ဝဲဒီးတၢ်အိၣ်သယုၢ်သညိတဖၣ် ခီဖျိလၢတၢ်ဂ့ၢ်အါမံၤအဖီခိၣ်န့ၣ်လီၤ. လၢအါနံၣ်အါလါအတီၢ်ပူၤန့ၣ် ယဟ့ၣ်ဂံၢ်ဟ့ၣ်ဘါ, ဒီးထုကဖၣ်န့ၢ် တၢ်လၢအဝဲသ့ၣ်တဖၣ်အဂီၢ်လီၤ.

တၢ်အိၣ်သယုၢ်သညိန့ၣ် ဟဲမၤဘၣ်ဒိဘၣ်ထံး ပှၤတဂၤဂၤ, ဖဲတၢ်အကတီၢ်တဘျီဘျီန့ၣ်လီၤ. ဖဲလါမ့ၤ, ၂၀၂၃ နံၣ်န့ၣ် ကီၢ်အမဲရကၤ ကသံၣ်သရၣ်တဖၣ်ကရၢ ထုးထီၣ်ရၤလီၤ လံာ်တၢ်ကွဲးဟ့ၣ်ပလီၢ်တဘ့ၣ် ဘၣ်ဃးဒီး တၢ်သယုၢ်သညိအဂ့ၢ်, ဒ်အမ့ၢ်တၢ်ဆါသံသတြိာ်တကလုာ်န့ၣ်လီၤ. လံာ်တၢ်ကွဲးဟ့ၣ်ပလီၢ် ပာ်ဖျါဝဲဒၣ်လၢ ကီၢ်အမဲရကၤ ပှၤသူၣ်က့သးပှၢ်တဝာ်ဃၣ်ဃၣ်န့ၣ် စံးဝဲဒၣ်လၢ အဝဲသ့ၣ် ဘၣ်အိၣ်သယုၢ်သညိ, ဒီးတၢ်အိၣ်သယုၢ်သညိန့ၣ် မၤဘၣ်ဒိဘၣ်ထံးတၢ်သ့ဝဲဒၣ်ဒ်သိးလိာ်အသးဒီးတၢ်အီ မိာ်ဝါ (cigarettes) တနံၤ တဆံခံဖျၢၣ် မၤဘၣ်ဒိဘၣ်ထံးတၢ်သ့အသိးန့ၣ်လီၤ.

ဖဲ စီၤမိၤရှ့ အိၣ်ကတဲာ်ကတီၤတ့ၢ်လံအသး ဒ်သိးကဟ့ၣ်ခီလီၤ (အတၢ်ဖံးတၢ်မၤ) ဆူ စီၤယိၤရှူ, ပှၤလၢအကထီၣ်အလီၢ်န့ၣ်ဒီး, ဒ်သိးပှၤအံၣ်စရ့လးဖိတဖၣ် ကသ့ၣ်ညါဝဲလၢ ဖဲအဝဲသ့ၣ်နုာ်လီၤဆူ ကီၢ်တၢ်စံးပာ်အကတီၢ်, တၢ်ဒုးတၢ်ယၤတဖၣ်န့ၣ် တဘၣ်ဒုးဝဲဒၣ်ထဲ အဝဲသ့ၣ်ဧိၤဘၣ်အဂ့ၢ်န့ၣ် စီၤမိၤရှ့ အသးအိၣ်မၤလီၤတံၢ်ဝဲဒၣ်အဃိ, ၅မိၤ ၃၁:၆ အပူၤန့ၣ် စံးဝဲဒၣ်လၢ “ဘၣ်ယိၣ်တၢ်တဂ့ၤ, ဒီးပျံၤအီၤတဂ့ၤ. အဂ့ၢ်ဒ်အံၤ, ယွၤနကစၢ်မ့ၢ် ပှၤလၢအလဲၤတၢ်ဒီးနၤလီၤ. တညိကွံာ်ဘၣ်နၤဘၣ်, ဒီးတလဲၤသဒၣ်ဘၣ်နၤဘၣ်” န့ၣ်လီၤ. စီၤမိၤရှ့ ဒုးသ့ၣ်နီၣ်ထီၣ်စ့ၢ်ကီး, ခိၣ်နၢ်အသီ, စီၤယိၤရှူလၢ “ယွၤမ့ၢ်ပှၤလၢ အလဲၤတၢ်လၢနမဲာ်ညါလီၤ. အဝဲဒၣ်ကအိၣ်ဒီးနၤလီၤ. တညိကွံာ်ဘၣ်နၤဘၣ်, ဒီးတလဲၤသဒၣ်ဘၣ်
နၤဘၣ်” (:၈) န့ၣ်လီၤ.

စီၤမိၤရှ့ မၤကတၢၢ် အတၢ်ကတိၤလၢ “ပျံၤတၢ်တဂ့ၤ, ဒီးဘၣ်ယိၣ်တၢ်တဂ့ၤ” တမံၤအံၤ, ဟ့ၣ်ဂံၢ်ဟ့ၣ်ဘါ ပဝဲနၤယၤ, လၢမုၢ်မဆါတနံၤအံၤ (:၈) သ့ဝဲဒၣ်န့ၣ်လီၤ.

ဖဲပတူၢ်ဘၣ်တၢ်သယုာ်သညိအကတီၢ်, ပကသ့ၣ်ညါလၢ ကစၢ်ယွၤတညိကွံာ်ပှၤဘၣ်, ဒီးတလဲၤသဒၣ်ပှၤအဂ့ၢ်န့ၣ် ကဲထီၣ်တၢ်မၤမုာ်ထီၣ်က့ၤပသးန့ၣ်တက့ၢ်.