လၢကီၢ်အမဲရကၤ, သ့ၣ်ပှၢ်အမ့ၣ်အူလၢ မၤဟးဂီၤတၢ်နးနးကျံးကျံးအဒိၣ်ကတၢၢ်န့ၣ် မ့ၢ် ပဲး(ရှ)တံကိၣ် (Peshtigo) အမ့ၣ်အူအီၣ်တၢ် ဖဲ ကီၢ်စဲၣ် ဝ့းခီၣ်စ့ၣ် (Wisconsin) အကလံၤစိး-မုၢ်ထီၣ်တကပၤန့ၣ်လီၤ. ပဲး(ရှ)တံကိၣ် မ့ၣ်အူအီၣ်တၢ်န့ၣ် တကတီၢ်ဃီဒီး ရှံၣ်ကၤကိၣ် (Chicago) အမ့ၣ်အူအီၣ်တၢ်, လၢပှၤသ့ၣ်ညါအါ, (အီးကထိဘၢၣ် ၈ သီ, ၁၈၇၁) န့ၣ်လီၤ. ဘၣ်ဆၣ်, လၢ ပဲး(ရှ)တံကိၣ် မ့ၣ်အူအီၣ်တၢ်န့ၣ် ပှၤကညီအသးသမူ လီၤမၢ်ဝဲဒၣ် အါန့ၢ်နွံကယၤဘျဲၣ်န့ၣ်လီၤ. ပဲး(ရှ)တံကိၣ် အဝ့ၢ်န့ၣ် ဂုၤထီၣ်ပသီထီၣ်ဝဲဒၣ်ချ့ချ့, လၢအအိၣ်ဒီးသ့ၣ်အတၢ်သူၣ်ထီၣ်တဖၣ်, ဒီးတၢ်ထုးထီၣ် သ့ၣ်အတၢ်ဖံးတၢ်မၤတဖၣ်န့ၣ် ခီဖျိလၢကလံၤအူဆူၣ် တပျုာ်အပျီၤအဃိ, လၢတနၣ်ရံၣ်အတီၢ်ပူၤန့ၣ် မ့ၣ်အူအီၣ်ကွံာ်ဝဲ ဒ်ရာ်မ့ၣ်အူအသိးန့ၣ်လီၤ.
လီခီလ့ၢ်လၢ အကိၣ်ဃၢၣ်တဖၣ်, ဒၢးခီကုၢ်ဃိသးတဖၣ်, ဒီးပိးလီတနီၤလၢ မ့ၣ်အူအီၣ် အိၣ်တ့ၢ်ဝဲတဖၣ်အကျါ, လံာ်စီဆှံဖိတဘ့ၣ် အိၣ်တ့ၢ်ဝဲလၢ အအိးထီၣ်အသးဖိန့ၣ်လီၤ. မ့ၣ်လၣ်အီၣ်စီကွံာ်လံာ်အကု, ဒီးမ့ၣ်အူအတၢ်ကိၢ်ကဲၤဖးန့ၣ် ဒုးကိၤလံာ်အကဘျံးတဖၣ် ဘၣ်ဆၣ်, တဟးဂူာ်ဟးဂီၤဝဲဘၣ်န့ၣ်လီၤ. တၢ်ဃုထံၣ်န့ၢ် လံာ်စီဆှံတဘ့ၣ်အံၤ သ့ဝဲဒၣ် လၢဝ့ၢ်အတၢ်ဒုးနဲၣ် တၢ်သူၣ်ထီၣ်အပူၤ, တုၤမုၢ်မဆါတနံၤအံၤဒၣ်လဲာ်န့ၣ်လီၤ.
လံာ်စီဆှံဖိလၢ အတဟးဂီၤတဘ့ၣ်အံၤ ဒုးသ့ၣ်နီၣ်ထီၣ်က့ၤပှၤ တၢ်အုၣ်ကီလၢ ယွၤဟ့ၣ်လီၤဝဲဒၣ် ဖဲအပှၤဂီၢ်မုၢ်တဖၣ် ဘၣ်ဂဲၤလိာ်ဝဲလၢ တၢ်ဆၢကတီၢ်အဂၤတကတီၢ်- ဖျါဖဲ
ယရှါ ၄၀:၈ အပူၤ, ဒီးစံးဝဲ, “နီၢ်ဧိၤမံၤဧိၤ ဃ့ထီၣ်ကွံာ်, သံၣ်ဧိၤဖီဧိၤလီၤညွံးလီၤဘဲဝဲလီၤ. မ့မ့ၢ် ပကစၢ်အကလုၢ်အကထါန့ၣ် ကအိၣ်ဝဲကဆိးဝဲလီၤစိၤလီၤထီ” န့ၣ်လီၤ. “မ့ၣ်အူကလံၤမုၢ်” လၢအမ့ၢ် တၢ်ဒုးန့ၢ်ထံကီၢ်, ဒီးတၢ်စိာ်မၢကဲကုၢ်န့ၣ် ကမၤပျံၤမၤဖုးဝဲဒၣ်လဲာ်, ဖဲတၢ်ကမၤအသးတမံၤမံၤဂ့ၤန့ၣ် ကအိၣ်တီအိၣ်လိၤဝဲလၢ အတၢ်အၢၣ်လီၤအီလီၤတဖၣ်, ဒီးတစူးကွံာ်ညိကွံာ် ပှၤလၢအဟဲက့ၤဆူအအိၣ်တဖၣ်နီတဘျီဘၣ်န့ၣ် ယွၤအၢၣ်လီၤဝဲလီၤတံၢ်လီၤဆဲးန့ၣ်လီၤ.
ပဲး(ရှ)တံကိၣ် အလံာ်စီဆှံလၢ ပဖးအီၤသ့ဒံးန့ၣ် တၢ်အိးထီၣ်အလံာ်ကဘျံးပၤ ဖဲထါစံးထီၣ်ပတြၢၤအယုၢ် ၁၀၆ ဒီး ၁၀၇ န့ၣ်လီၤ. အဆၢဒိၣ် ခံဆၢဒိၣ်လိာ်အပူၤန့ၣ်, အဆၢဖိ ၁ ပာ်ဖျါဝဲလၢ, “စံးထီၣ်ပတြၢၤယွၤတက့ၢ်, အဂ့ၢ်ဒ်အံၤ, ဂ့ၤဝဲလီၤ. မ့ၢ်အဘျုးအဖှိၣ်အိၣ်ဝဲလီၤထူလီၤယိာ်အဂ့ၢ်လီၤ.” လၢပတၢ်အိၣ်မူ တၢ်မၤအကီအခဲ အဒိၣ်ကတၢၢ် အပူၤဒၣ်လဲာ် ယွၤအကလုာ်ကထါ, ဒီးအတၢ်အဲၣ်န့ၣ် တဒံဝ့ၤဒံဝီၤဘၣ်နီတဘျီအဃိ, ပကဘၣ်စံးဘျုးစံးဖှိၣ် ကစၢ်ယွၤ လီၤစိၤလီၤထီန့ၣ်လီၤ.
