ခ့လၣ် (Kayla) သွံးထီၣ် အမဲာ်တူၢ်ခိၣ်, ဒီးဆွံဆီၣ်နုာ် လံာ်က့ဖိအဂၤတက့ဆူ တလါတဖျၢၣ်အပူၤ, လၢအမဲာ်သၣ် အိၣ်လွံၢ်ကပၤလိာ်ဒီး ကွဲးဃာ်ဝဲ “ဟ့ၣ်ဆူယွၤအအိၣ်” န့ၣ်လီၤ. အဝဲသါသဖှိထီၣ်ဆူၣ်ဆူၣ် ဒီးဆိကမိၣ်ထီၣ်က့ၤ အတၢ်ထုကဖၣ်, လၢအဒၢနုာ်တ့ၢ်ဝဲလၢ တလါပူၤအဂ့ၢ်န့ၣ်လီၤ. ခ့လၣ် တဲဘၣ်အတံၤသကိးလၢ, “ယဃ့ထုကဖၣ် ကိးမုၢ်နံၤဒဲး, လၢယကလုၢ်ဒိၣ်ဒိၣ်, ဒီးကစၢ်ယွၤ နၢ်ဟူယတၢ်ထုကဖၣ်န့ၣ် မ့ၢ်ယကသ့ၣ်ညါ လီၤတံၢ်လီၤဆဲး ကသ့ဝဲဒၣ်ဒ်လဲၣ်.” အတံၤသကိး ခၠါထဲ(လ) (Chantel) ဟ့ၣ်လီၤ အလံာ်စီဆှံဆူ ခ့လၣ်အအိၣ်န့ၣ်လီၤ. ဒီးစံးဝဲဒၣ်, “ခီဖျိလၢတၢ်နာ်န့ၢ် ကစၢ်ယွၤ, ပှၤလၢ အကလုၢ်တီတဂၤ, ဒီးတၢ်ဟ့ၣ်လီၤအးလီၤကွံာ် တၢ်ထုကဖၣ် လၢနကွဲး, ဒီးနဖးအီၤတဘျီလၢ်လၢ်တဖၣ်ဆူ ယွၤအစုပူၤန့ၣ် မ့ၢ်ဒၣ်နပျဲပျၢ်ကွံာ်တၢ်ခဲလၢာ်ဆူ ကစၢ်အစုပူၤ” န့ၣ်လီၤ.
ပှၤတၢ်မၢဖိ စီၤပီလူး ဟ့ၣ်သဆၣ်ထီၣ် ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်လၢ “သးခုလၢကစၢ်အပူၤတက့ၢ်,” ဒီး ဖံ ၄:၄-၅ အပူၤန့ၣ် ဟ့ၣ်ထီၣ်ဝဲ တၢ်ဂ့ၢ်တၢ်ကျိၤအဂ့ၤအဘၣ်, မ့ၢ်လၢ  “ကစၢ်အိၣ်ဘူးတ့ၢ်” ဝဲဒၣ်အဃိန့ၣ်လီၤ. လၢတၢ်ဆိကမိၣ် ဘၣ်ယိၣ်ဘၣ်ဘီတၢ်တဖၣ်အလီၢ်န့ၣ် စီၤပီလူး ဟ့ၣ်ဂံၢ်ဟ့ၣ်ဘါ ယွၤအပှၤဂီၢ်မုၢ်လၢ ကဃ့ထုကဖၣ်တၢ်ထုကဖၣ်လၢ အပှဲၤဒီးတၢ်နာ်, ကဘၣ်နာ်ဝဲလၢ ကစၢ်ယွၤတူၢ်လိာ် အတၢ်ဃ့သကွံၢ်ကညးတဖၣ်ကိးမံၤဒဲး, ဒီးကစံးထီၣ်ပတြၢၤယွၤ, ဖဲအအိၣ်ကဒုဝဲဒၣ်လၢ ယွၤအိၣ်ဒီးပှၤ
တဘိယူၢ်ဃီ အတၢ်ဃူတၢ်ဖိး, တၢ်လၢပထိၣ်ဒွးတသ့တန့ၢ်အပူၤ (:၆-၇) န့ၣ်လီၤ.
ဖဲပထိၣ်လိၤက့ၤ ပသးအတၢ်ဆိကမိၣ်တဖၣ်ဆူ သူးသ့ၣ်ကံၢ်စီတဖၣ်- လၢအမ့ၢ် “တၢ်မ့ၢ်တၢ်တီ,” “တၢ်တီတၢ်လိၤ,” “တၢ်စီတၢ်ဆှံ,” ဒီး “တၢ်ဂ့ၤဝါလၤကပီၤ” (:၈), တၢ်လၢအနဲၣ်ဆှၢပှၤဆူ ကစၢ်အအိၣ်န့ၣ်ဒီး, တၢ်ဃူတၢ်ဖိးအကစၢ်, ကစၢ်ယ့ၣ်ရှူး, ကဒီတဒၢ ပသးတူၢ်ခီၣ်ဘၣ်တၢ်, ဒီးနီၢ်သးအတၢ်ဂ့ၤတၢ်ဝါအဂီၢ်န့ၣ်လီၤ.
ဖဲပနာ်သန့ၤလီၤသးလၢ တၢ်ဃူတၢ်ဖိးအကစၢ်ယွၤအိၣ်ဒီးပှၤန့ၣ်ဒီး, ယွၤအတၢ်ဃူတၢ်ဖိး ကဒီတဒၢပှၤန့ၣ်လီၤ. ပပူၤဖျဲးထီၣ်ကွံာ်ဝဲလၢ တၢ်ဝံဃၢ, တၢ်လၢအဟံးဃာ်ဖီၣ်ဃာ်ပတၢ်ဘၣ်ယိၣ်ဘၣ်ဘီတဖၣ်, မ့ၢ်လၢပဟ့ၣ်လီၤအးလီၤ ကယဲၢ်ပတၢ်ထုကဖၣ်တဖၣ်ဆူ ယွၤလၢပနာ်န့ၢ်အီၤသ့တဂၤအစုပူၤအဃိ, ပလဲၤခီဖျိကလၢၢ်ဘၣ် သးအတၢ်မုာ်တၢ်ပၢၤ
သ့ဝဲဒၣ်န့ၣ်လီၤ.