ဖဲ ခၠါ(စ) ဒ့းကၢၣ်(စ) (Charles Dickens) အလံာ်တၢ်တဲပူဖးဒိၣ်, အီၣ်လ့ဘၢၣ် ထွံး(စ) (Oliver Twist) အပူၤန့ၣ် ပှၤလၢဆါဆူၣ်ဆါကဲ အီၣ်လ့ဘၢၣ် တဂၤ အိၣ်ဖျဲၣ်ထီၣ်ဝဲဒၣ် ဖဲ ပှၤမၤတၢ်ဖိ အိၣ်ဆိးတၢ်ဟံၣ်ဖှီၣ်သံတဖျၢၣ်အပူၤ, ဒီးတၢ်လီၢ်န့ၣ် အမံၤဟူသၣ်ဖျါဝဲလၢ အမၤတရီတပါ ပှၤဖှီၣ်ဖိယာ်ဖိတဖၣ်န့ၣ်လီၤ. အိၣ်ဖျဲၣ်ထီၣ်ဝဲလံၤလံၤန့ၣ် မ့ၢ်ပှၤဖိၣ်ဃဲဖိတဂၤ, ဒီးအကတၢၢ်န့ၣ်, မ့ၢ်လၢတၢ်မၤဆူၣ်မၤစိးအီၤအဃိ, ပှၤဖိသၣ်ပိာ်ခွါတဂၤအံၤ ဃ့ၢ်ဟးထီၣ်ကွံာ်ဝဲလၢတၢ်လီၢ်အံၤန့ၣ်လီၤ. လၢတၢ်လီၤကမၢကမၣ်အပူၤန့ၣ် ဘၣ်အိၣ်မူလဲၤခီဖျိ တၢ်အိၣ်မူ အတၢ်လဲၤတရံးအသး, ဒီးသ့ၣ်ညါထွဲဝဲဒၣ်လၢ ကန့ၢ်ဘၣ်သါ တၢ်ဘူၣ်တၢ်တီၣ်ဒိၣ်ဒိၣ် အါအါန့ၣ်လီၤ. ဒ့းကၢၣ် မ့ၢ်ပှၤလၢအဲၣ်မၤကတၢၢ် အတၢ်တဲပူလၢတၢ်သးခုတဂၤ, ပာ်ဖျါမၤလီၤတံၢ်ဝဲဒၣ် ပှၤလၢအမၤအၢမၤသီတ့ၢ် အီၣ်လ့ဘၢၣ် လၢတၢ်အါနံၣ်အါလါသ့ၣ်တဖၣ်. ကဒိးန့ၢ်က့ၤ တၢ်စံၣ်ညီၣ်တီ, ဒီးတၢ်ပီၢ်ယၢ်လီၤက့ၤသးအဂီၢ်န့ၣ်လီၤ. ဖဲလၢ အီၣ်လ့ဘၢၣ် တဂၤ “န့ၢ်ဘၣ်သါဟီၣ်ခိၣ်လီၢ်” အကတီၢ်, ပှၤလၢအမၤအၢအီၤတဖၣ် ဒိးန့ၢ်ဝဲဒၣ် အတၢ်မၤအၢ အဘူးအလဲန့ၣ်လီၤ. ဒ် ဒ့းကၢၣ်(စ) အလံာ်တၢ်တဲပူ ပာ်ဖျါဝဲအသိး, တၢ်အိၣ်မူ မ့ၢ်ကတၢၢ်ဝဲဒၣ် ဃံဃံလၤလၤန့ၣ် ကမ့ၢ်တၢ်လၢအဂ့ၤန့ၣ်လီၤ.
လံာ်စီဆှံအပူၤန့ၣ် ပှၤတဂၤ ကွဲးပာ်ဖျါ တၢ်သးဝံၣ်အဖျၢၣ်လၢအတၢ်ခိးကွၢ်လၢ် မုၢ်နံၤမုၢ်သီလၢ တၢ်ကဒုးအိၣ်ထီၣ် တၢ်စံၣ်ညီၣ်တီ, ဒီးပှၤလၢအဘၣ်တၢ်ဆီၣ်သနံးတဖၣ် “ကန့ၢ်ဘၣ်သါ ထံဧိၤကီၢ်ဧိၤ” (စံး ၃၇:၉) န့ၣ်လီၤ. အနီၢ်ကစၢ်ဒၣ်ဝဲ ဘၣ်လဲၤခီဖျိကွၢ်ဆၢၣ်မဲာ် တၢ်မၤအၢမၤသီအီၤဘၣ်ဆၣ်, အဆၢဖိ ၇ န့ၣ် ပှၤကွဲးထါ စီၤဒၤဝံး ဟ့ၣ်သဆၣ်ထီၣ် တၢ်သူၣ်စူၤသးစူၤ ဒီးကွဲးပာ်ဖျါဝဲဒၣ်, “အိၣ်ဘှီၣ်ကလာ်လၢယွၤအပူၤ, ဒီးကွၢ်လၢ်အကျဲတက့ၢ်. မၤကိၢ်ထီၣ်နသးလၢ ပှၤလၢအဘိၣ်ထီၣ်ညီထီၣ်လၢကျဲအၢသီ, လၢပှၤလၢအမၤပှဲၤထီၣ် တၢ်ကူၣ်ထီၣ်အအၢအဃိန့ၣ်တဂ့ၤ” န့ၣ်လီၤ. အဆၢဖိ ၉ န့ၣ် ပာ်ဖျါကဒီးဝဲလၢ, “ပှၤမၤအၢတၢ်တဖၣ် ကဘၣ်တၢ်ဒီၣ်တဲာ်ကွံာ်အီၤလီၤ. မ့မ့ၢ် ပှၤလၢအမုၢ်လၢ်တၢ်လၢယွၤန့ၣ် ကန့ၢ်ဘၣ်သါ ထံဧိၤကီၢ်ဧိၤ” န့ၣ်လီၤ. စီၤဒၤဝံး ထံၣ်ဝဲ ပှၤတတီတလိၤဘီၣ်ထီၣ်အနး, ဒ်သိးကမၤလီၤဃံၤ ပှၤဘၣ်နးဘၣ်ဖှီၣ်, ဒီးပှၤဖှီၣ်ဖိယာ်ဖိဒၣ်လဲာ် (:၁၄), နာ်ဝဲဒၣ်လၢ ကစၢ်ယွၤ ကမၤဘၣ်လိာ်ဖိးဒ့က့ၤတၢ် (:၁၅) န့ၣ်လီၤ.
တၢ်အိၣ်မူန့ၣ် ကီခဲ, ဒီးတတီတလိၤတလီၢ်လီၢ်ဘၣ်ဆၣ်, မး ၅:၅ န့ၣ် ပကနၢ်ဟူဘၣ် ကစၢ်ယ့ၣ်ရှူး စံးကတိၤပာ်ဖျါဝဲ “ပှၤလၢအသးစူၤတဖၣ်န့ၣ် ဘၣ်ဆိၣ်ဂ့ၤဝဲလီၤ. အဂ့ၢ်ဒ်အံၤ အဝဲသ့ၣ်တဖၣ်န့ၣ် ကန့ၢ်ဘၣ်သါ ထံဧိၤကီၢ်ဧိၤ” လၢအသီၣ်ကဒါက့ၤ စံးထီၣ်ပတြၢၤ ၄၇ န့ၣ်လီၤ.
