ဒ်ယမ့ၢ်ဖိသၣ် ဒိၣ်ထီၣ်လၢ ၁၉၅၀ နံၣ်, ဒီး ၁၉၆၀ နံၣ်အဘၢၣ်စၢၤတဖၣ်အသိး, ယဒိၣ်ထီၣ်ဘၣ်ယဲ ဖဲ “ပှၤအမဲရကၤဖိတဖၣ်အတၢ်သးစဲ” ဘ့း(စ)ဘီ (baseball) အစိၤအဆၢကတီၢ်န့ၣ်လီၤ. ယကဘၣ်လဲၤလိာ်ကွဲ ဘ့း(စ)ဘီ လၢတၢ်လိာ်ကွဲပျီအဂီၢ် ယသူၣ်ဟူးသးဂဲၤယဲ, ဒီးတၢ်လၢယသူၣ်ပိၢ်သးဝးဒိၣ်ဒိၣ်ကလဲာ်တမံၤန့ၣ် မ့ၢ်ဝဲဒၣ်ဖဲယဒိးန့ၢ် “တၢ်လိာ်ကွဲ ဘ့းစ်ဘီ ဆ့ကၤ, ဒီးအလိၤန့ၣ် ပပှၤလိာ်ကွဲတၢ်ကရၢကရိအမံၤ “ကၠါယဲး(စ)” (Giants) န့ၣ်လီၤ. လၢယချၢ နီၣ်ဂံၢ် ၉ န့ၣ် ပာ်ဖျါနီၤဖးယၤဒီးပှၤအဂၤတဖၣ်ဘၣ်ဆၣ်, ဆ့ကၤတမံၤဃီ (uniform) န့ၣ် ပာ်ဖျါထီၣ်ပှၤလၢ ပမ့ၢ်ပှၤလိာ်ကွဲတၢ်တဖုဃီန့ၣ်လီၤ.

တၢ်သ့ၣ်ညါ လံာ်မးသဲ ၅:၃-၁၀ လၢ တၢ်ဆိၣ်ဂ့ၤ ဃိးထံၣ် (Beatitudes),ဒီးအပူၤန့ၣ်, ကစၢ်ယ့ၣ်ရှူး ပာ်ဖျါထီၣ် ပှၤမူခိၣ်ဘီမုၢ်ဖိတဖၣ် ဒ်ပှၤလၢ “အကူသိးဆ့ကၤ” လၢအလီၤဂာ်ဒီးကစၢ်ခရံာ်အက့ၢ်အဂီၤအသိးန့ၣ်လီၤ. မူခိၣ်ဘီမုၢ်န့ၣ်ဘၣ်တၢ်သူၣ်ထီၣ် ပာ်ဖှိၣ်အီၤလၢ ပှၤအိၣ်ဒီးက့ၢ်ဂီၤ, ဒီးသူးသ့ၣ်ကံၢ်စီ ဒ်အဝဲသ့ၣ်အစီၤပၤအသိးတဖၣ်န့ၣ်လီၤ. ကစၢ်ယ့ၣ်ရှူး စံးကတိၤပာ်ဖျါဝဲဒၣ် ပှၤ “ဘၣ်ဆိၣ်ဂ့ၤ” တဖၣ်စံးတၢ်န့ၣ် တမ့ၢ်တၢ်ပာ်ပနီၣ်အီၤ ခီဖျိလၢတၢ်အက့ၢ်အဂီၤအိၣ်ဖျါလၢခိ,တၢ်အိၣ်ဆူၣ်အိၣ်ချ့, (မ့) အတၢ်ထူးတၢ်တီၤတဖၣ်ဘၣ်. ပှၤကညီတဂၤအဂီၢ်, တၢ်လၢအကါဒိၣ်ဝဲန့ၣ် မ့ၢ်ဒၣ်တၢ်အိၣ်လၢအညါပူၤ, (မ့) အသူၣ်ကံၢ်သးလဲန့ၣ်လီၤ. “ပှၤလၢအသးဖှီၣ်တဖၣ်န့ၣ်ဘၣ်ဆိၣ်ဂ့ၤဝဲလီၤ” (:၃) စံးတၢ်န့ၣ် မ့ၢ်ပှၤလၢအဆီၣ်လီအသး-လၢအအိၣ်ဒီးနီၢ်သးအတၢ်လိၣ်, ဒီးသ့ၣ်ညါလီၤအသးတဖၣ်န့ၣ်လီၤ. “ပှၤလၢတၢ်သၣ်ဝံၤအသးဒီး တၢ်သူအသးလၢတၢ်တီတၢ်လိၤတဖၣ်န့ၣ် ဘၣ်ဆိၣ်ဂ့ၤဝဲလီၤ” (:၆) စံးတၢ်န့ၣ် မ့ၢ်ပှၤတဖၣ်လၢအသးဆၢမိၣ်န့ၢ် မၤမံသူၣ်မံသး, ဒီးမၤလၤကပီၤကစၢ်ယွၤန့ၣ်လီၤ. “ပှၤလၢအမၤဃူမၤဖိးတၢ်တဖၣ်န့ၣ် ဘၣ်ဆိၣ်ဂ့ၤဝဲလီၤ” (:၉) စံးတၢ်န့ၣ် မ့ၢ်ပှၤတဖၣ်လၢ အမၤသကိးတၢ်ဒီးကစၢ်ယ့ၣ်ရှူး, လၢအဂုာ်ကျဲးစဲးအိၣ်ဃူအိၣ်ဖိးဒီးပှၤဂၤတဖၣ်န့ၣ်လီၤ.

ခီဖျိသးစီဆှံကစၢ် အတၢ်မၤစၢၤပှၤန့ၣ်, ပကူသိးထီၣ် ဆ့ကူဆ့ကၤလၢအလီၤဂာ်ဒီးကစၢ်ခရံာ် သ့ဝဲ, တၢ်လၢအကပာ်ဖျါထီၣ်ပှၤ ဒ်ပှၤစူၢ်က့ၤနာ်က့ၤ ကစၢ်ယ့ၣ်ရှူး, ဒီးပမ့ၢ်ပှၤတဖုဃီလၢ ကစၢ်ယ့ၣ်ရှူး အတၢ်ကရၢကရိန့ၣ်လီၤ. တၢ်ဂ့ၢ်တဖၣ်အံၤအဃိ, ပမ့ၢ်ပှၤလၢအဘၣ်ဆိၣ်ဂ့ၤနီၢ်နီၢ်န့ၣ်လီၤ.