ဖဲ ခ.န ၃၀၄ နံၣ် (AD 304) န့ၣ် ရိမ့ၤအဘီမုၢ် စီၤပၤ မဲးကစံၣ်မံၤယၣ် (Maximian) နုာ်လီၤဆူ ဝ့ၢ်ဖးဒိၣ် နံၣ်ကိၣ်မံဒယါ (Nicomedia) အပူၤ, လၢတၢ်မၤနၢၤအပနီၣ်အဂီၢ် န့ၣ်လီၤ. သုးဖိတဖၣ် ရဲၣ်လီၤအသးဖးထီ, ဒီးလဲၤတရံးတၢ်, မ့မ့ၢ်ထံဖိကီၢ်ဖိ တဖၣ်န့ၣ် ဘၣ်ဟဲပာ်ဖှိၣ်ထီၢ်အသး, ဒ်သိးကစံးဘျုးဝဲတၢ်ဂီၤတၢ်ဖှီၣ် အကစၢ်တဖၣ်လၢတၢ်မၤနၢၤ အဂီၢ်န့ၣ်လီၤ. မ့မ့ၢ်ပှၤအိၣ်ပှဲၤဝဲလၢသရိာ်တဖျၢၣ်အပူၤ, ပှၤဂီၢ်မုၢ်တဖၣ် လၢအဘူၣ်ထီၣ်ဘါထီၣ်ဒၣ်ထဲ ယွၤအမ့ၢ်အတီတဂၤဧိၤန့ၣ် တလဲၤပာ်ဖှိၣ်ထီၣ်အသးဘၣ်. စီၤပၤ မဲးကစံၣ်မံၣ်ယၣ် နုာ်လီၤဆူ သရိာ်ပူၤ, ဒီးဟ့ၣ်လီၤအကလုၢ်လၢ ပှၤမ့ၢ်တမၤပှၤအိၣ်တသ့န့ၣ်- ပှၤလၢအစူးကွံာ်ညိကွံာ် တၢ်စူၢ်တၢ်နာ်ခရံာ်တဖၣ်န့ၣ် ကပူၤဖျဲးလၢ တၢ်စံၣ်ညီၣ်န့ၣ်လီၤ. အဝဲသ့ၣ်တတူၢ်လိာ်ဝဲဘၣ်. ဖဲလၢပှၤစူၢ်နာ်ကစၢ်ခရံာ်တဖၣ် အိၣ်ဝဲလၢသရိာ်ပူၤအဖၢမုၢ်, မဲးကစံၣ်မံၤယၣ် ဟ့ၣ်လီၤအကလုၢ်လၢ ပှၤကဘၣ်ဆူးထီၣ်ကွံာ် တၢ်ဘါသရိာ်လၢမ့ၣ်အူ, ဒီးပှၤခဲလၢာ်န့ၣ်သံဝဲဒၣ်န့ၣ်လီၤ.
ပှၤတၢ်မၢဖိ စီၤပီလူး နၢ်ပၢၢ် တၢ်လူၤပိာ် ကစၢ်ခရံာ်အခံ အလုၢ်အပှ့ၤန့ၣ်လီၤ. လံာ် ၁ ကရံၣ်သူး အဆၢဒိၣ် ၄ ပာ်ဖျါဝဲ, လၢဟ့းလ့ၣ်ကီၢ်, ဝ့ၢ်ကရံၣ်သူးန့ၣ် စီၤပီလူး စံးဘၣ် တဲဘၣ် ပှၤစူၢ်က့ၤနာ်က့ၤတၢ်ဖိတဖၣ် လၢအတၢ်အုၣ်အသးန့ၣ်လီၤ. စီၤပီလူးပာ်ဖျါဝဲလၢ ပှၤတၢ်မၢဖိတဖၣ် တူၢ်ဘၣ်တၢ်နးတၢ်ဖှီၣ်လၢ ကစၢ်ယ့ၣ်ရှူးအဂီၢ်, ဒီးအကစၢ်ဒၣ်ဝဲအဂီၢ် စ့ၢ်ကီးန့ၣ်လီၤ. မ့ၢ်လၢပှၤတၢ်မၢဖိတဖၣ် မၤဝဲဒၣ် ကစၢ်ခရံာ် အတၢ်မၤအဃိ, အဝဲသ့ၣ် ကဲထီၣ်လံ “တၢ်ကွၢ်ကီအဂီၢ်လၢဟီၣ်ခိၣ်,…တဖၣ်အမဲၣ်ညါ” (:၉) န့ၣ်လီၤ.
ဒ်န့ၣ်အသိး, ပှၤတၢ်မၢဖိ စီၤပ့းတရူး ဟ့ၣ်ပလီၢ်ပှၤလၢ ကစၢ်ယ့ၣ်ရှူး တူၢ်ဘၣ်ခီၣ်ဘၣ်တၢ် လၢပလီၢ်ဒ်လဲၣ်အဂ့ၢ်န့ၣ်, ကွဲးပာ်ဖျါဝဲလၢ ၁ ပ့း ၂:၂၃ အပူၤ, ဒီးစံးဝဲဒၣ် “ဘၣ်တၢ်ဒုၣ်ဒွဲၣ်, ဒီးတဒုၣ်ဒွဲၣ်ဆၢဘၣ်ဝဲဘၣ် ဒိးတၢ်, ဒီးတကတိၤပျံၤဘၣ်တၢ်ဘၣ်, မ့ၢ်အအးလီၤအသးလၢ ပှၤစံၣ်ညီၣ်တၢ်တီတဂၤအစုပူၤ” န့ၣ်လီၤ.
တုၤလၢမုၢ်မဆါတနံၤအံၤန့ၣ်, ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် တူၢ်ဘၣ်ခီၣ်ဘၣ် တၢ်နးတၢ်ဖှီၣ် လၢအတၢ်စူၢ်တၢ်နာ်အဂီၢ်န့ၣ်လီၤ. ဒ်လၢဝ့ၢ် နံၣ်ကိၣ်မံဒံယၤ ပှၤစူၢ်က့ၤနာ်က့ၤတၢ်ဖိတဖၣ်န့ၣ် လၢတၢ်သးခုကစီၣ်အဂီၢ်, ဃုထၢတူၢ်ခီၣ်ဝဲ တၢ်နးတၢ်ဖှီၣ် လၢတၢ်သးအိၣ် အသိး, ကယဲၢ်တၢ်တြီမၤတံာ်တာ် လၢပဘၣ်ကွၢ်ဆၢၣ်မဲာ် တမံၤလၢ်လၢ်န့ၣ်, ကမၤတၢ် ဒ်သိးပကလီၣ်ဖျါထီၣ် ပတၢ်စူၢ်တၢ်နာ် ကစၢ်ခရံာ် အတၢ်ဂံၢ်ဆူၣ်န့ၣ်လီၤ. ပဟ့ၣ်လီၤအးလီၤ ပတၢ်အိၣ်မူတဖၣ်ဆူ “ပှၤစံၣ်ညီၣ်တၢ်တီတဂၤအစုပူၤ” သ့ဝဲဒၣ်န့ၣ်လီၤ.
