တၢ်သူၣ်ဝံၣ်သးဆၢမုာ်သယုၢ် တၢ်ဒုးနဲၣ်ဒ့သးဝံၣ် “ဖ့ကရ့(မ)” (Pilgrim) အပူၤန့ၣ်, လံၣ်ဆၣ် (Leisa) ဆၢထၢၣ်ဝဲဒၣ်လၢ ပှၤနၢ်ဃၢတဖၣ်အဂီၢ် တၢ်ပာ်ပနီၣ်အလီၢ်တတီၤ, ဒီးစူးကါ အမဲရကၤ အတၢ်ပနီၣ်ကျိာ်တၢ်ကတိၤ (American Sign Language), ဒီးကျိာ်ထံဒုးနဲၣ်ဝဲဒၣ် တၢ်ဒုးနဲၣ်အဂ့ၢ်လၢသူၣ်လၢသးန့ၣ်လီၤ. တၢ်ဒုးနဲၣ်ဒ့သးဝံၣ်အံၤသန့ၤထီၣ်အသးလၢ ကၠီ ဘါ(န)ညၣ် (John Bunyan) အလံာ်, ပှၤစူၢ်က့ၤနာ်က့ၤတၢ်တဂၤ သးသမူအတၢ်လဲၤ (The Pilgrim’s Progress), ဘၣ်ဃးဒီးပှၤကညီတဂၤ အတၢ်စူၢ်တၢ်နာ် အတၢ်လဲၤန့ၣ် ထုးန့ၢ်သူၣ်န့ၢ်သးဒိၣ်ဒိၣ်ကလဲာ်အသိး, လံၣ်ဆၣ် ကျိာ်ထံဒုးနဲၣ်ဝဲဒၣ်န့ၣ် ဂ့ၤဒိၣ်မးစ့ၢ်ကီးန့ၣ်လီၤ.

ဖဲလၢပှၤသံကွၢ်အီၤ အတၢ်ဒုးနဲၣ်ကျိာ်ထံတၢ်အဂ့ၢ်န့ၣ်ဒီး, လံၣ်ဆၣ် စံးဝဲဒၣ်လၢ “တၢ်ဂ့ၢ်မိၢ်ပှၢ်ဘၣ်ဃးဒီး ယမၤ တၢ်ဒုးနဲၣ်ဒ့သးဝံၣ်အံၤ, ဒီးယဒုးနဲၣ်ကျိာ်ထံအီၤန့ၣ် မ့ၢ်ဝဲဒၣ် ဒ်သိးတၢ်သးခုကစီၣ် ကတုၤဃီၤဝဲဒၣ်ဆူ ပှၤကိးဂၤဒဲးအဂီၢ်န့ၣ်လီၤ. ဒီးပှၤလၢအနၢ်ဃၢတဖၣ်န့ၣ် မ့ၢ်ပှၤတဖုလၢ အဘၣ်တၢ်လဲၤကပာ်အီၤဒိၣ်မးန့ၣ်လီၤ.” အဝဲစံးကဒီးဝဲဆူညါ “လၢဟီၣ်ခိၣ်ဒီဘ့ၣ် ပှၤနၢ်ဃၢတဖၣ် နၢ်ဟူဘၣ် ကစၢ်ယ့ၣ်ရှူး အဂ့ၢ်န့ၣ် စှၤန့ၢ်ဒံး ခံ မျးကယၤအဃိ, မ့ၢ်တၢ်လီၤသးဘၣ်ဒိန့ၣ်လီၤ.” ဒ်သိးဒီး ပှၤနၢ်ဃၢတဖၣ် ကသ့ၣ်ညါ ကစၢ်ယ့ၣ်ရှူးအဂီၢ်, လံၣ်ဆၣ် စူးကါဝဲ အတၤလၣ်န့ၣ်လီၤ.

ဒ်လံၣ်ဆၣ်အသိး, ပကအုၣ်ပသးလၢ ကစၢ်ယွၤအတၢ်အဲၣ်အဂီၢ်, ကစၢ်ယွၤ ကိးပှၤလၢ ပကစူးကါ ပတၤလၣ်, ဒီးတၢ်သ့တၢ်ဘၣ်တဖၣ် ဒီးကွဲန့ၢ်က့ၤ ပှၤဂၤတဖၣ်ဆူ ကစၢ်ယ့ၣ်ရှူးအအိၣ်- လၢတၢ်ကစိၣ်ရၤလီၤ တၢ်သးခုကစီၣ်ဆူ ဟီၣ်ခိၣ်ဒီဘ့ၣ်န့ၣ်လီၤ. ၁ ပ့း ၄:၁၀ န့ၣ် ပှၤတၢ်မၢဖိ စီၤပ့းတရူး ကွဲးပာ်ဖျါဝဲလၢ “ဒ်ပှၤဂ့ၤကွၢ်ယွၤအဘျုးအဖှိၣ်အကလုာ်ကလုာ်အသိးန့ၣ်, အံးက့ၤကွၢ်က့ၤလိာ်သုသး, ဒ်သုန့ၢ်တၢ်ဘျုးတၢ်ဖှိၣ်တဂၤဒီးတဂၤအသိးန့ၣ်တက့ၢ်” န့ၣ်လီၤ. တၤလၣ်တဖၣ်အံၤအပူၤန့ၣ် ပၣ်ဃုာ်ဒီးတၢ်အဲၣ် ပှၤဂၤ, ဒီးတၢ်ထုကဖၣ်န့ၢ်တၢ်လၢ ပှၤဂၤအဂီၢ် (:၇-၈) န့ၣ်လီၤ. နကမ့ၢ်ဒၣ်ဝဲ ပှၤဟ့ၣ်ဂံၢ်ဟ့ၣ်ဘါတၢ်တဂၤမ့ၢ်ဂ့ၤ, ပှၤမၤစၢၤတၢ်, လၢအမၤဝဲလၢတၢ်လီၢ်ခံမ့ၢ်ဂ့ၤ, သရၣ်သိၣ်လိတၢ်တဂၤ, ပှၤစံးကတိၤတၢ်တဂၤ, ပှၤဃ့ထုကဖၣ်တၢ်အဒူအဃိၤတဂၤ, (မ့) နကမ့ၢ်ပှၤလၢအအိၣ်ဒီးတၤလၣ်, (မ့) တၢ်သ့တၢ်ဘၣ် အဂၤတမံၤမံၤမ့ၢ်ဂ့ၤန့ၣ်, ဒ်သိးနကမၤဂ့ၤမၤစၢၤ ပှၤဂၤအဂီၢ်, ကစၢ်ယွၤ စူးကါနၤသ့ဝဲဒၣ်န့ၣ်လီၤ. ထဲဒၣ်နကဘၣ်ဃ့တၢ်လၢယွၤ, ဒီးယွၤကဒုးနဲၣ်နၤကျဲန့ၣ်လီၤ.