ပှၤအံးထွဲကွၢ်ထွဲ ပှၤဆူးပှၤဆါတဖၣ် အတၢ်အိၣ်ဖှိၣ်ဖးဒိၣ်န့ၣ် ဘၣ်တၢ်မၤအီၤ ဖဲသမှံၤဟံၣ်ဒွဲ (Hotel) တဖျၢၣ်အကတီၢ်, ပှၤတမှံၤတဂၤ တူၢ်ဘၣ်ခီၣ်ဘၣ် သးဖျၢၣ်အတၢ်ဆါ သတူၢ်ကလာ်, ဖဲပှၤတမှံၤအိၣ်ဘှံးလီၢ် ဒၢးဖးဒိၣ်န့ၣ်လီၤ. တကီၢ်ခါန့ၣ်, ဒ်သိးဒီးအသုတသံဝဲအဂီၢ်, ပှၤအံးထွဲကွၢ်ထွဲတၢ်ဖိ အါန့ၢ် ခံဒၢ်စ့ၢ် (dozen) ဟဲဆူအကပၤ, ဒီးမၤစၢၤအီၤန့ၣ်လီၤ. ပှၤလၢအံးထွဲကွၢ်ထွဲ ပှၤဆူးပှၤဆါသရၣ်,သရၣ်မုၣ်တဖၣ် ဟဲတုၤဝဲဆူ တၢ်လီၢ်လၢအဘၣ်, ဒီးတၢ်ဆၢကတီၢ်လၢအဘၣ်အဃိ, ပှၤတမှံၤတဂၤအံၤ စံးဘျုးစံးဖှိၣ်အဝဲသ့ၣ်ဒိၣ်ဒိၣ် ကလဲာ်န့ၣ်လီၤ.

နီၢ်အ့ၤစတၢ် ဘၣ်အိၣ်စ့ၢ်ကီးဝဲလၢ တၢ်လီၢ်လၢအဘၣ်, တၢ်ဆၢကတီၢ်လၢအဘၣ်န့ၣ်လီၤ. ဖဲလၢစီၤပၤဘၣ်သူၣ်ဘၣ်သး, ဒီးအၢၣ်လီၤတူၢ်လိာ်အီၤဝံၤ, နီၢ်အ့ၤစတၢ်တဂၤ ဘၣ်တၢ်ဃုထၢအီၤ ဒ် နီၢ်ပၤမုၣ် (အ့ၤ ၂:၁၇) တဂၤအသိးန့ၣ်လီၤ. ဘၣ်ဆၣ်, စီၤပၤ ဟ့ၣ်လီၤအကလုၢ်တထံၣ်န့ၣ် မၤပျံၤမၤဖုးအပှၤကလုာ်, ပှၤယူဒၤဖိတဖၣ်အဃိ, အတခွါ စီၤမၢ်ဒကဲၤ ဟ့ၣ်သဆၣ်ထီၣ်အီၤ, ဒ်သိးကစူးကါအလီၢ်အလၤလၢ ကဃ့သကွံၢ်ကညး စီၤပၤ, ဒီးဖဲ အ့ၤ ၄:၁၄ အပူၤန့ၣ်, ဒ်သိးကအုၣ်က့ၤခီၣ်က့ၤ အပှၤကလုာ်တဖၣ်လၢ တၢ်သံအဂီၢ်, တၤဝဲဒၣ် နီၢ်အ့ၤစတၢ် လၢ “နဟဲထီၣ်လၢဘီမုၢ်အလီၢ် လၢအဆၢအကတီၢ်အံၤ အဂီၢ်ဧါန့ၣ် မ့ၢ်မတၤသ့ၣ်ညါတဂၤလဲၣ်” န့ၣ်လီၤ. နီၢ်အ့ၤစတၢ် ဆၢတဲာ်ဝဲလၢ ကဟ့ၣ်လီၤအသးသမူ, ဒီး “လဲၤဆူ စီၤပၤအအိၣ်” (:၁၆), ဒ်သိးကပာ်ဖျါထီၣ် တၢ်ကူၣ်အၢတမံၤအံၤ, ဒီးကအုၣ်က့ၤခီၣ်က့ၤ ပှၤယူၤဒၤဖိလၢ တၢ်သံအံၤ (အဆၢဒိၣ် ၈) အဂီၢ်န့ၣ်လီၤ. တၢ်မၤအံၤဖျါလၢ နီၢ်ပၤမုၣ် အ့ၤစတၢ် နၢ်ပၢၢ်ဝဲဒၣ် ကစၢ်ယွၤ ပာ်အီၤလၢ တၢ်လီၢ်တၢ်လၤအံၤ ဘၣ်ဆၢဘၣ်ကတီၢ်န့ၣ်လီၤ.

ဘၣ်တဘျီဘျီန့ၣ်, ဘၣ်မနုၤအဃိ, တၢ်အိၣ်သးတဖၣ် ကဲထီၣ်လိၣ်ထီၣ်ဝဲဒၣ် (မ့) ဘၣ်မနုၤအဃိ, တၢ်မၤအသးတဖၣ် ဆီတလဲအသးလဲၣ်န့ၣ် ပကဆိကမိၣ်ကမၢကမၣ်သ့ၣ်သ့ၣ်န့ၣ်လီၤ. ဘၣ်သ့ၣ်သ့ၣ်, ပသးကဟးဂီၤ, ဒီးဂုာ်ကျဲးစၢး မၤဂ့ၤထီၣ်တၢ်အိၣ်အသး ဒ်ညီနုာ်အသိးန့ၣ်လီၤ. လၢတၢ်ဂ့ၢ်လီၤတံၢ်လီၤဆဲးတမံၤမံၤအဂီၢ်, ကစၢ်ယွၤ ပာ်ပှၤ ဖဲတၢ်လီၢ်လၢပအိၣ်ဆိးဘၣ်ခဲအံၤန့ၣ်လီၤ. တနံၤအံၤ, ဖဲပဘၣ်ကွၢ်ဆၢၣ်မဲာ် တၢ်မၤကီမၤခဲပှၤ (မ့) တၢ်ဆီတလဲတဖၣ်န့ၣ်ဒီး, ဒ်ယွၤကူၣ်ပာ်ဝဲအဂ့ၤကတၢၢ်အသိး, တၢ်ဂ့ၢ်လီၤဆီတမံၤမံၤလၢယွၤအဲၣ်ဒိးမၢပကမၤ မ့ၢ်အိၣ်ဧါန့ၣ်, ဒ်သိးကဒုးနဲၣ်ပှၤအဂီၢ်, မ်ပကသံကွၢ် ယွၤတက့ၢ်.