တၢ်ဟ့ၣ်ကူၣ်နဲၣ်ကျဲ အဲး(ပ) (App) အပူၤန့ၣ်, တၢ်နီၣ်သိလ့ၣ်, တၢ်အိၣ်လဲၤလၢ လး(စ) ဘ့ကဲး(စ) (Las Vegas), ဒီးဆူ လီး(စ) အဲ(န)ကၠလိး(စ) (Los Angeles) အဂီၢ်, ဟ့ၣ်ကူၣ်ဒုးနဲၣ် တၢ်လဲၤကျဲဖုၣ်လၢ တၢ်ဆၢကတီၢ် ကစှၤလီၤဝဲဒၣ် တနၣ်ရံၣ်ဃၣ်ဃၣ်အဃိ, ရှဲ(လ)ဘံၣ် အဲးစလၣ် (Shelby Easler), ဒီးအဝဲၢ်ခွါန့ၣ် လူၤပိာ်ထွဲကျဲဖုၣ်လၢ တၢ်ဟ့ၣ်ကူၣ်နဲၣ်ကျဲ ဒုးနဲၣ်ဝဲအသိးန့ၣ်လီၤ. ဘၣ်ဆၣ်, တၢ်လဲၤကျဲဖုၣ် (shortcut) န့ၣ် နဲၣ်ဆှၢအဝဲသ့ၣ်ဆူ ကျဲလၢအတဘျ့, အတဂ့ၤတဖၣ်, ဒီးဘၣ်လဲၤဝဲနၣ်ရံၣ်အါမး, ဒီးအဝဲသ့ၣ် အိၣ်ကတာ်ထီဃာ်အသးလၢ ကီၢ်စဲၣ် ကဲၤလဖိနယၢၤ (California) မိၣ်ဟါဘံၣ် မဲးမုၢ်ခိၣ် (Mojave Desert) အပူၤ, ဖဲလၢဖၣ်ကမူၣ် အကလံၤမုၢ်အူသဝံးတၢ် အကတီၢ်န့ၣ်လီၤ. အဝဲသ့ၣ် ဟဲက့ၤနီၣ်ကဒါအသိလ့ၣ်သ့ဘၣ်ဆၣ်, လၢခံန့ၣ်, မ့ၢ်လၢသိလ့ၣ် ဘၣ်ဒိဘၣ်ထံးဝဲဒၣ် ခီဖျိလၢတၢ်လဲၤကျဲမုၢ်တဘိန့ၣ် နးဒိၣ်မးအဃိ, ဘၣ်တၢ်တွံၢ်က့ၤလၢပျံၤန့ၣ်လီၤ. ပှၤလၢ အတ့ဒုးအိၣ်ထီၣ် တၢ်ဟ့ၣ်ကူၣ်နဲၣ်ကျဲ အဲး(ပ) (App) တဂၤ ဘၣ်ဃ့ကညး ပှၤလဲၤတၢ်ဖိတဖၣ်, လၢအပိာ်ထွဲ တၢ်နဲၣ်ကျဲအကမၣ်တဖၣ် အါအါဂီၢ်ဂီၢ်န့ၣ်လီၤ.

လၢတၢ်ကနဲၣ်ဆှၢပှၤအဂီၢ်, ပသန့ၤထီၣ်ပသးလၢ မတၤတဂၤလဲၣ်န့ၣ် မ့ၢ်တၢ်အကါဒိၣ်တမံၤန့ၣ်လီၤ. ဒ်ပမ့ၢ် ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အသိး, လၢတၢ်မ့ၢ်တၢ်တီအဂီၢ်, တၢ်ကတဲာ်ကတီၤဟ့ၣ်လီၤပှၤလၢ သးစီဆှံကစၢ် ကနဲၣ်လိနဲၣ်ဆှၢပှၤန့ၣ်လီၤ.

တၢ်တယံာ်ဘၣ်န့ၣ် ကဘၣ်သံ, ဒီးကဘၣ်အိၣ်လီၤဖးဝဲလၢ အပျဲၢ်အဘီၣ်တဖၣ်အဂ့ၢ်န့ၣ်, ဖဲကစၢ်ယ့ၣ်ရှူး သ့ၣ်ညါဝဲဒၣ်န့ၣ်ဒီး, စံးဘၣ်အပျဲၢ်အဘီၣ်တဖၣ် လီၤတံၢ်လီၤဆဲးလၢ တစူးကွံာ်ပာ်တ့ၢ်အဝဲသ့ၣ်လ့ၤတက့ၢ်ဘၣ်န့ၣ်လီၤ. ဒီးဟ့ၣ်သဆၣ်ထီၣ်အပျဲၢ်အဘီၣ်တဖၣ်လၢ ကစူၢ်ဒိကနၣ် အကလုၢ်အကထါ, စံးကတိၤအၢၣ်လီၤတ့ၢ်ဝဲလၢသးစီဆှံကစၢ်, (မ့) တၢ်မ့ၢ်တၢ်တီအသးစီဆှံ, မ့ၢ်ပှၤလၢကအိၣ်ဒီးအဝဲသ့ၣ်လီၤထူလီၤယိာ်, ဒီးကအိၣ်ဆိးလၢ အဝဲသ့ၣ်အသးကံၢ်ပူၤတဂၤ (ယိၤ ၁၄:၁၅-၁၇) န့ၣ်လီၤ. အဆၢဖိ ၂၆ စံးဘၣ်ပှၤ “ဘၣ်ဆၣ်ဒီး ပှၤမၤစၢၤတၢ်သးစီဆှံ, လၢပၢ်မၢလီၤအီၤလၢ ယမံၤ, အဝဲဒၣ်ကသိၣ်လိသုလၢ တၢ်ခဲလၢာ်, ဒီးကဒုးသ့ၣ်နီၣ်ထီၣ်က့ၤသုလၢ တၢ်လၢ ယစံးဘၣ်တဲဘၣ်သုခဲလၢာ်” န့ၣ်လီၤ.

ဖဲပလဲၤခီဖျိ ပသးသမူအမုၢ်နံၤမုၢ်သီတဖၣ်အပူၤန့ၣ် ဒ်သးစီဆှံကစၢ် ထိၣ်ဟူးထိၣ်ဂဲၤပှၤအသိး, မ်ပကလူၤပိာ်ဆူညါတဘိယုၢ်ဃီန့ၣ်တက့ၢ်. ပသ့ၣ်ညါဝဲဒၣ်လၢ သးစီဆှံကစၢ်တပျဲပကဟးဖျိးကျဲ နီတဘျီဘၣ်န့ၣ်လီၤ.