တၢ်အိၣ်ဖှိၣ်ဖိတဖၣ် သံကွၢ်ဝဲဒၣ်လၢ ဘၣ်မနုၤအဃိ, တၢ်အိၣ်ဖှိၣ် ပှ့ၤဝဲဒၣ်သရိာ်အပျိာ်တခါလဲၣ်န့ၣ်လီၤ. တၢ်မၤအံၤ မ့ၢ်တၢ်စူးကါ ကစၢ်ယွၤ အစုလီၢ်ခီၣ်ခိၣ်တဖၣ် အဂ့ၤကတၢၢ်နီၢ်နီၢ်ဧါ. တၢ်မ့ၢ်လုၢ်အီၣ်လုၢ်အီ ပှၤဖှီၣ်ဖိယာ်ဖိန့ၣ် တဂ့ၤဒိၣ်န့ၢ်ဒံး တၢ်ပှ့ၤသရိာ်အပျိာ်ဘၣ်ဧါ. တၢ်အိၣ်ဖှိၣ်သရၣ် စံးဆၢဝဲဒၣ်လၢ စ့ပာ်ဖှိၣ်အံၤ အိၣ်ဟဲလၢ ပှၤမၤဘူၣ်တၢ်ဖိတဖၣ်အဃိ, အလီၢ်အိၣ်လၢ ပကဘၣ်စူးကါအီၤ ဒ်အဝဲသ့ၣ်အတၢ်ဘၣ်သးအသိးန့ၣ်လီၤ. “တကးဒံးဘၣ်န့ၣ်” စံးကတိၤဟ့ၣ်ဒိဝဲဒၣ်လၢ ကစၢ်ယ့ၣ်ရှူး အတၢ်ကတိၤ ဖျါဖဲယိၤ ၁၂:၈ အပူၤ, “အဂ့ၢ်ဒ်အံၤ, ပှၤဖှီၣ်ဖိယာ်ဖိတဖၣ်န့ၣ် အိၣ်ဒီးသုတထံၣ်ဃီလီၤ” န့ၣ်လီၤ.

လၢတၢ်ဂ့ၢ်တၢ်ကျိၤ အတဘၣ်ထွဲလိာ်သးအပူၤ, တၢ်အိၣ်ဖှိၣ်သရၣ် ဃ့ကညးက့ၤတၢ်ချ့ချ့န့ၣ်ဒီး, လၢယသးပူၤယဆိကမိၣ်ထီၣ်ယဲန့ၣ်, ကစၢ်ယ့ၣ်ရှူး အဲၣ်ဒိးစံးကတိၤဝဲဒၣ်လၢတၢ်အိၣ်အသးမနုၤတမံၤအဖီခိၣ်လဲၣ်န့ၣ်လီၤ. တချုးလၢကစၢ်ယ့ၣ်ရှူး သံ ဃုသီ အနံၤန့ၣ်, ပိာ်မုၣ်တဂၤ ဖှူ ကစၢ်ယ့ၣ်ရှူးအခီၣ်လၢ တၢ်နၢမူ အလုၢ်ဒိၣ်ပှ့ၤဒိၣ်, ဒီးအပျဲၢ်အဘီၣ်တဖၣ် တဘၣ်သူၣ်ဘၣ်သးအဃိ, စံးဝဲဒၣ် “သိနၢမူအံၤ ဘၣ်မနုၤလၢပှၤတဆါကွံာ်.., ဒီးဟ့ၣ်လီၤလၢပှၤဖှီၣ်ဖိယာ်ဖိန့ၣ်လဲၣ်” လီၤ. ယိၤ ၁၂:၈ န့ၣ် ကစၢ်ယ့ၣ်ရှူး စံးဆၢဟ့ၣ်ဒိဝဲ ၅ မိၤ ၁၅:၁၁, “အဂ့ၢ်ဒ်အံၤ, ပှၤဖှီၣ်ဖိယာ်ဖိတဖၣ်န့ၣ် အိၣ်ဒီးသုတထံၣ်ဃီလီၤ. မ့မ့ၢ်ယဲဒၣ်အံၤ ယတအိၣ်ဒီးသုတထံၣ်ဃီဘၣ်” န့ၣ်လီၤ.

ကစၢ်ယ့ၣ်ရှူး ယၢၤထီၣ်ပာ်ဖျါ လံာ် ၅ မိၤရှ့ တလီၢ်လီၢ်အဃိ, သ့ၣ်ညါဝဲ တၢ်ကွဲးတဖၣ်လၢ လံာ်ကျိၤစှၤကျိၤ အိၣ်ဟဲလၢအမဲာ်ညါအဂ့ၢ်- “ပှၤဖှီၣ်ဖိယာ်ဖိတအိၣ်ဘၣ်လၢသုကျါဘၣ်. အဂ့ၢ်ဒ်အံၤ, ယွၤကဆိၣ်ဂ့ၤ နၤသပှၢ်တၢၢ်လၢ ထံဧိၤကီၢ်ဧိၤအပူၤ လၢယွၤနကစၢ်ဟ့ၣ်လီၤနၤ လၢတၢ်န့ၢ်သါလၢ နကမၤန့ၢ်အီၤ… ဒ်သိးနကပလီၢ်နသးလၢ နကမၤကယဲၢ်
တၢ်မၤလိာ်လၢ ယမၤလိာ်နၤလၢ မုၢ်မဆါတနံၤအံၤ” (၅ မိၤ ၁၅:၄-၅) န့ၣ်လီၤ. တၢ်ဂ့ၢ်တၢ်ကျိၤအံၤ, ကမ့ၢ်တၢ်လၢ ကစၢ်ယ့ၣ်ရှူး သိၣ်ဃီၣ်တၢ်အဂ့ၢ်အကျိၤ အဂၤတမံၤသ့ၣ်သ့ၣ်န့ၣ်လီၤ. မ့ၢ်လၢ ပှၤအံၣ်စရ့လးဖိတဖၣ် တဒိကနၣ် ကစၢ်ယွၤ အတၢ်မၤလိာ်တဖၣ်အဃိ, ပှၤဖှီၣ်ပှၤယာ်ဖိ အိၣ်ဝဲဒၣ်န့ၣ်လီၤ. ခဲကနံၣ်အံၤ, ဒ်သိးတၢ်ကမၤဒံဝ့ၤဒံဝီၤဝဲဒၣ် ကစၢ်ယ့ၣ်ရှူး, ပှၤအံၣ်စရ့လးဖိအမ့ၢ်အတီ, လၢကဒိကနၣ် ယွၤလၢလၢပှဲၤပှဲၤ တုၤတၢ်အကတၢၢ်တဂၤအဂီၢ်, တၢ်စူးကါ ပှၤဖှီၣ်ဖိယာ်ဖိတဖၣ်န့ၣ်လီၤ.

တလိၣ်လၢ ပကဘၣ်ဃုထၢ ကစၢ်ယ့ၣ်ရှူးဒီးပှၤဖှီၣ်ပှၤယာ်ဖိအဘၢၣ်စၢၤန့ၣ်ဘၣ်. ပအဲၣ် ကစၢ်ယ့ၣ်ရှူး အဒိၣ်ကတၢၢ်န့ၣ်, မ့ၢ်ဒၣ်ပအဲၣ် ပှၤကညီတဖၣ်အဂ့ၤကတၢၢ်, ဒီးတၢ်အဲၣ်ကစၢ်ယ့ၣ်ရှူး အဒိၣ်ကတၢၢ်န့ၣ် ထိၣ်ဟူးထိၣ်ဂဲၤပှၤလၢ ပကအဲၣ်ပှၤဂုၤပှၤဂၤ အဂ့ၤကတၢၢ်န့ၣ်လီၤ.