ပှၤနွံနံၣ်ဖိ တီ(မ) (Tom) တဂၤ, ဘၣ်သူၣ်ဘၣ်သးဝဲဒၣ် တၢ်မၤနၢၤခိၣ်ဖးကပြုၢ်ကပြီၤ လၢစိၤပိာ်ခိၣ်အလိၤတဖၣ် တၢ်လၢအပၢ်ဒိးန့ၢ်ဝဲလၢ ကၠိအတၢ်ဃ့ပြၢတဖၣ်န့ၣ်လီၤ. လၢအသးပူၤန့ၣ် စံးဝဲဒၣ်, ယအဲၣ်ဒိးပာ်ခိၣ်ဖးတခါလၢ ယလီၢ်မံဒၢးအပူၤန့ၣ်လီၤ. လၢတၢ်န့ၣ်အဃိ, သံကွၢ်ဝဲဒၣ်အပၢ်, “ပါပၢ်ဧၢ, လၢနခိၣ်ဖးတဖၣ်အကျါ မ့ၢ်ယဟံးန့ၢ် တခါကသ့ဧါ” န့ၣ်ဒီး, လၢတၢ်လီၤကမၢကမၣ်အပူၤန့ၣ် အပၢ်စံးဆၢဝဲဒၣ် “တသ့ဘၣ်. ဖိခွါဧၢ, ခိၣ်ဖးတဖၣ်အံၤ မ့ၢ်ယတၢ်လီၤ. ယဘၣ်ဂုာ်ကျဲးစၢးမၤန့ၢ်အီၤ, ဒီးနၤစ့ၢ်ကီးနမၤန့ၢ်နကစၢ်ဒၣ်နဲသ့ဝဲန့ၣ်လီၤ.” ဖဲန့ၣ်အဝဲသ့ၣ်ရဲၣ်ကျဲၤထီၣ်လၢ တီ(မ) မ့ၢ်ဃ့ၢ်ဝဲဒၣ် ကဝီၤဒ့တဝီ လၢတၢ်ပာ်ပနီၣ် တၢ်ဆၢကတီၢ်တကတီၢ်အပူၤန့ၣ် (အပၢ်သ့ၣ်ညါလၢအဖိခွါဃ့ၢ်ဝဲကန့ၢ်), အပၢ်ကဟ့ၣ်အီၤအခိၣ်ဖးတဖၣ်အကျါတခါန့ၣ်လီၤ. ဒ်အပၢ်သိၣ်လိနဲၣ်ဆှၢအီၤအသိး တီ(မ) မၤလိန့ၢ်တၢ်, ဒီးတနွံပူၤကွံာ်အလီၢ်ခံန့ၣ်, အပၢ်ကိးပသူဟ့ၣ်ဂံၢ်ဟ့ၣ်ဘါအီၤ ဖဲတီ(မ) ဃ့ၢ်တၢ်ဃ့ၢ် ဘၣ်ဆၢဘၣ်ကတီၢ်အပူၤန့ၣ်လီၤ. တၢ်မၤလိလၢ တီ(မ) မၤန့ၢ်ဝဲဒၣ်န့ၣ်, လၢတၢ်သိၣ်လိဃံးလီၤက့ၤသး, ဒီးလၢတၢ်ဂုာ်ကျဲးစၢးဆူၣ်ဆူၣ်အပူၤန့ၣ်, ဒိးန့ၢ်ဝဲဒၣ် ခိၣ်ဖးတခါလၢ အပၢ်မၤလၤကပီၤအီၤန့ၣ်လီၤ.
လံာ်ကတိၤဒိ ၁:၈ ဟ့ၣ်ဂံၢ်ဟ့ၣ်ဘါဖိသၣ်တဖၣ်လၢ “ကနၣ်နပၢ်အသိၣ်တၢ် တက့ၢ်” န့ၣ်လီၤ. တီ(မ) အပၢ်စ့ၢ်ကီး သိၣ်လိနဲၣ်လိအဖိခွါလၢ သးသမူအတၢ်ဃ့ၢ်, ဃုာ်ဒီးကစၢ်ယ့ၣ်ရှူး, ဒီးတၢ်ဒိကနၣ်ကစၢ်ယ့ၣ်ရှူးအတၢ်ဆှၢအပူၤန့ၣ်လီၤ. ဒ်လံာ်ကတိၤဒိအပူၤ ပၢ်တဂၤမၤတ့ၢ်ဝဲ (:၃) အသိး, တီ(မ) အပၢ် နဲၣ်လိအဖိခွါ ဒ်သိးကဃုထၢ “တၢ်တီတၢ်လိၤ, ဒီးတၢ်စံၣ်ညီၣ်တီ, ဒီးတၢ်အသးစၢၢ်ဆၢတဖၣ် အတၢ်သိၣ်လိ” န့ၣ်လီၤ. ပၢ်တဂၤ သိၣ်လိနဲၣ်လိတၢ်တဖၣ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်, ဒ်အဆၢဖိ ၉ ပာ်ဖျါဝဲ “တၢ်အဃံအလၤအခိၣ်ကျီၤလၢနခိၣ်အလိၤ, ဒီးဖဲတဝီၤလၢနကိာ်လိၤ” အသိးန့ၣ်လီၤ.
ဘၣ်သ့ၣ်သ့ၣ်, တမ့ၢ်လၢနကအိၣ်ဒီးဟီၣ်ခိၣ်အပၢ်တဂၤ, ဒ်သိးကနဲၣ်ဆှၢဝဲဒၣ်နၤလၢနသးသမူအတၢ်ဃ့ၢ်,ဃုာ်ဒီးကစၢ်ခရံာ်ဘၣ်ဆၣ်, ကစၢ်ယွၤ နဲၣ်ဆှၢနၤသ့ဝဲဒၣ်ဆူ ပှၤဟ့ၣ်ကူၣ်ဟ့ၣ်ဖးတၢ်တဂၤလၢ အကဟ့ၣ်ခီဟ့ၣ်နီၤလီၤ အတၢ်ကူၣ်သ့တဖၣ်န့ၣ်လီၤ. (မ့) ကစၢ်ယွၤ ကိးနၤသ့ၣ်သ့ၣ် ဒ်သိးနကဟ့ၣ်ကူၣ်သိၣ်လိနဲၣ်ယုၤ ပှၤတဂၤဂၤအဂီၢ် န့ၣ်လီၤ. ယွၤကဟ့ၣ်လီၤနၤတၢ်နဲၣ်ကျဲ ဖဲနအိၣ်မူအိၣ်ဂဲၤသကိးတၢ်ဒီးပှၤဂၤ, လၢနသး သမူအတၢ်ဃ့ၢ်ပြၢအကတီၢ်န့ၣ်လီၤ.
