လၢတၢ်ကတိၤကပုာ်လုးဖိအပူၤန့ၣ် ဖဲပှၤတဲဘၣ်ယဖံလၢ ဆူမဲာ်ညါစှၤနံၤစှၤသီ အတီၢ်ပူၤ, ယဖုကလဲၤပူၤကွံာ်ဟီၣ်ခိၣ်သ့ၣ်သ့ၣ်လီၤန့ၣ်, ပဘၣ်ယိၣ်တၢ်လၢ အဝဲအသးကဘၣ်ဒိ, ဒီးကသူၣ်ကိၢ်သးဂီၤဝဲဒၣ်န့ၣ်လီၤ. ပှၤတဂၤ ဆိကမိၣ်ဝဲဒၣ်လၢ မ့ၢ်ယဖံကအိၣ်ဒီးတၢ်သံကွၢ်, ဘၣ်ဃးဒီးအဝၤသးဘိ အနီၢ်ခိအတၢ်အိၣ်အသး (မ့) လၢအနီၢ်ကစၢ်ဒၣ်ဝဲအဂီၢ် မ့ၢ်ကလိၣ်ဘၣ်တၢ်မၤစၢၤဧါန့ၣ်ဒီး, ဒီးသံကွၢ်ယဖံလၢ “မ့ၢ်နဘၣ်ယိၣ်တၢ်ဧါ” န့ၣ်လီၤ. လၢတၢ်ပာ်သးမုာ်မုာ်အပူၤန့ၣ် ယဖံစံးဆၢက့ၤဝဲလၢ “ယတကိၢ်ဘၣ်. အဝဲကလဲၤဖဲလဲၣ်န့ၣ် ယသ့ၣ်ညါ, ဒီးယွၤအိၣ်ဒီးအီၤဖဲန့ၣ်လီၤ”.
ယဖံအတၢ်ပာ်ဖျါထီၣ်ဝဲ ယွၤအိၣ်ဒီးအဝၤသးဘိန့ၣ် ဒုးသ့ၣ်နီၢ်က့ၤပှၤ တၢ်ဂ့ၢ် တမံၤဃီ, ဒ်ပှၤကွဲးထါ စီၤဒၤဝံး ပာ်ဖျါဝဲဒၣ် ဖဲ စံး ၁၃၉:၈ အပူၤ, ဒီးစံးဝဲဒၣ်လၢ “ယမ့ၢ်လဲၤထီၣ်ဘးလၢ မူခိၣ်ဒီးနအိၣ်ဖဲန့ၣ်လီၤ. ယမ့ၢ်ဒါလီၤယလီၢ်မံလၢပျုၤပူၤဒီး, ကွၢ်ကွၢ်, နအိၣ်ဖဲန့ၣ်လီၤ.”
ထါစံးထီၣ်ပတြၢၤ ၁၃၉ ပာ်ဖျါဝဲဒၣ် ကစၢ်ယွၤအိၣ်ဒီးပှၤသပှၢ်တၢၢ်လီၤန့ၣ် ပာ်ဃုာ်ဒီးတၢ်ဟ့ၣ်ပလီၢ်ပှၤတဆံးတက့ၢ်, ဒီးတၢ်အံၤန့ၣ်မ့ၢ်ဝဲဒၣ် ဖဲပလဲၤတၢ်တပူၤလၢ်လၢ်န့ၣ် ပဃ့ၢ်ပူၤဖျဲးဒီးယွၤအသးစီဆှံတသ့ဘၣ်န့ၣ်လီၤ. အဆၢဖိ ၇ ပာ်ဖျါဝဲ “ယကလဲၤပူၤကွံာ်လၢနသးဆူလဲၣ်. ဒီးယကဃ့ၢ်ပူၤကွံာ်လၢ နမဲာ်ညါဆူလဲၣ်” န့ၣ်လီၤ. ဘၣ်ဆၣ်, ပှၤလၢအအဲၣ်ကစၢ်ယွၤ, ဒီးပှၤလၢအသးအိၣ် မၤလီၤတံၢ်ဝဲလၢ ယွၤအိၣ်ဒီးအဝဲသ့ၣ်တဖၣ်အဂီၢ်, တၢ်ပာ်ဖျါအံၤ ဒုးအိၣ်ထီၣ်ဝဲ တၢ်မၤမုာ်ထီၣ်က့ၤ ပသးဒိၣ်ဒိၣ်ကလဲာ်စ့ၢ်ကီးန့ၣ်လီၤ. ဒ်ပမ့ၢ်ယွၤအပှၤဂီၢ်မုၢ်တဖၣ်, လၢအဘၣ်တၢ်ပှ့ၤက့ၤပှၤအသိး, အဆၢဖိ ၁၀ ပာ်ဖျါဝဲလၢ ယွၤကနဲၣ်ဆှၢပှၤ ဖဲပအိၣ်တပူၤလၢ်လၢ်, ဒီးကဟံးဃာ်ပှၤလၢအစုအဃိ, ပသးမံသးမုာ်သ့ဝဲဒၣ်န့ၣ်လီၤ.
ဖဲပဘၣ်လဲၤခီဖျိ တၢ်ကီတၢ်ခဲ, တၢ်အိၣ်အသးလၢအလီၤဘၣ်ယိၣ်တဖၣ်, ဒီးဖဲပသးကလၢၢ်ဘၣ် ယွၤတအိၣ်ဒီးပှၤအကတီၢ်, ကစၢ်ယွၤန့ၣ် အိၣ်ဝဲဒၣ်ဒီးကယဲၢ်ပှၤလၢအအဲၣ်ဝဲတဖၣ်, ဒီးပှၤလၢအအဲၣ်အီၤတဖၣ်လီၤန့ၣ် ပနာ်သန့ၤအီၤလီၤတံၢ်လီၤဆဲးသ့ဝဲဒၣ်န့ၣ်လီၤ. တနံၤအံၤ, တၢ်သ့ၣ်ညါ ကစၢ်ယွၤအိၣ်ဒီးပှၤသပှၢ်တၢၢ်လီၤန့ၣ် မ်ကဟဲစိာ်န့ၢ်ဝဲ တၢ်မၤမုာ်ထီၣ်က့ၤနၤ, ဒီးတၢ်မုၢ်လၢ်လၢ နလိၣ်ဘၣ်န့ၣ်တက့ၢ်.
