ယဖံညီနုၢ်စံးဝဲဒၣ်လၢ “တၢ်မၤဟးဂီၤစပံးမုၢ်န့ၣ်မ့ၢ်ဝဲ ထွံၣ်ဟီၣ်ခိၣ်ဖိတဖၣ်” န့ၣ်လီၤ. ယမိၢ် တဲပိာ်ထွဲတၢ်ကတိၤအံၤတမံၤဃီန့ၣ်လီၤ. ဒီးခဲကနံၣ်အံၤ, ယတဲဘၣ်ယဖိတဖၣ်န့ၣ်လီၤ. ဘၣ်ဆၣ်, တၢ်ပလီၢ်သူၣ်ပလီၢ်သးလၢ “ထွံၣ်ဟီၣ်ခိၣ်ဖိတဖၣ်” စံးတၢ်န့ၣ် ကမ့ၢ်တၢ်မနုၤလဲၣ်.
တၢ်သူၣ်လီၤ စပံးမုၢ်တဖၣ်ဝံၤအလီၢ်ခံ, ဒ်သိးစပံးမုၢ်ကသၣ်ထီၣ်အဂီၢ်န့ၣ်, တၢ်ဆၢကတီၢ် ယံာ်ဝဲဒၣ်တဘျုးနံၣ်န့ၣ်လီၤ. စပံးမုၢ်တဖၣ် လိၣ်ဘၣ်ဝဲ တၢ်သူၣ်စူၤသးစူၤ, တၢ်ကွၢ်ထွဲကဟုကယာ်အီၤ, တၢ်လူန့ၢ်အီၤထံ, တၢ်ပဲာ်စီမၤပျီအီၤ, ဒီးတၢ်ဒီတဒၢဒီဒၣ် အဝဲသ့ၣ်အါမးန့ၣ်လီၤ. ထွံၣ်ဟီၣ်ခိၣ်ဖိတဖၣ် အနီၢ်ကစၢ်ဆံးဘၣ်ဆၣ်, ခီဖျိလၢတၢ်မၤဟးဂီၤ စပံးမုၢ်အဂံၢ်တဖၣ်, အီၣ်ဝဲ စပံးသၣ်တဖၣ်, (မ့) အ့ၣ်ဘျဲးဝဲ တၢ်အမုၢ်အဘိတဖၣ်န့ၣ်, ဒုးကဲထီၣ်တၢ်ဟးဂီၤ ဒိၣ်ဒိၣ်မုၢ်မုၢ် သ့ဝဲဒၣ်န့ၣ်လီၤ.
ဖဲလံာ်တၢ်သးဝံၣ်တဖၣ်အတၢ်သးဝံၣ်, တၢ်အဲၣ်တၢ်ကွံ ထါတၢ်တဲပူအပူၤန့ၣ်, စီၤပၤစီၤရှလိၤမိၤ ဟ့ၣ်ပလီၢ်ပှၤလၢ “ဖီၣ်န့ၢ်ထွံၣ်ဟီၣ်ခိၣ်တဖၣ်, ဒီးထွံၣ်ဟီၣ်ခိၣ်ဖိတဖၣ်လၢအမၤဟးဂီၤ စပံးအလီၢ်တဖၣ်အံၤတက့ၢ်” (၂:၁၅) န့ၣ်လီၤ. ပှၤကူၣ်သ့တနီၤနီၤ ထံၣ်ဝဲတၢ်ဟ့ၣ်ကူၣ်အံၤ ဒ်အမ့ၢ် တၢ်ဂ့ၢ်ကီဖိ (မ့) လုၢ်လၢ်သကဲာ်ပဝးအဆံးဖိတဖၣ်, ဒီးတၢ်မ့ၢ်တပာ်သူၣ်ပာ်သးအီၤဘၣ်န့ၣ်ဒီး, လုၢ်လၢ်တဖၣ်အံၤ ကမၤဟးဂီၤကွံာ် ပိာ်မုၣ်ဒီးပိာ်ခွါသးစၢ်တဖၣ် အတၢ်ရ့လိာ်ဘၣ်ထွဲလိာ်သး သ့ဝဲဒၣ်န့ၣ်လီၤ.
ဒ်န့ၣ်အသိး, လၢပနီၢ်သးအတၢ်လဲၤကျဲအပူၤန့ၣ်, တၢ်ဂ့ၢ်အဆံးဖိ ဒ်အမ့ၢ် တၢ်ဂံၢ်အခၣ် (ဧ့ၤ ၁၂:၁၅), “တၢ်ကတိၤအအၢအသီ” (အ့း ၄:၂၉), (မ့) ပှၤဂၤအတၢ်ဒိၣ်ဘၢ လၢအကမၤဟးဂီၤပှၤတဖၣ် (၁ ကရံၣ် ၁၅:၃၃), လၢပတပာ်သူၣ်ပာ်သးအပူၤန့ၣ်, ဟဲနုာ်လီၤခူသူၣ်ဆူပတၢ်အိၣ်မူအပူၤသ့ဝဲဒၣ်န့ၣ်လီၤ.
တၢ်ဂ့ၢ်အဆံးဖိတဖၣ် ဒုးကဲထီၣ် တၢ်ဟးဂီၤဒိၣ်ဒိၣ်မုၢ်မုၢ်သ့ဝဲန့ၣ် ယဖံ နၢ်ပၢၢ်တ့ၢ်ဝဲဒၣ်အဃိ, အတၢ်ကူၣ်သ့အံၤ ကဲဘျုးကဲဖှိၣ်ဝဲဒၣ်လၢ အဖိအလံၤတဖၣ် အတၢ်အိၣ်မူအပူၤန့ၣ်လီၤ. ဖဲပဟံးန့ၢ်တၢ်ဆၢကတီၢ် ဃ့ထုကဖၣ်, ဒီးဖးဒိကနၣ်လံာ်စီဆှံန့ၣ်ဒီး, ဒ်သိးပ “ကဖီၣ်န့ၢ် ထွံၣ်ဟီၣ်ခိၣ်ဖိတဖၣ်” လၢအမ့ၢ် တၢ်လ့ပစီ (မ့) လုၢ်လၢ်သကဲာ်ပဝးလၢအကမၤဟးဂီၤ ပတၢ်ရ့လိာ်ဘၣ်ထွဲလိာ်သးဒီးပှၤဂၤ, ဒီးကမၤဟးဂီၤပတၢ်လဲၤတၢ်ဒီးကစၢ်ခရံာ် သ့ဝဲဒၣ်တဖၣ်အဂီၢ်န့ၣ်, သးစီဆှံ ကမၤစၢၤပှၤန့ၣ်လီၤ.