တၢ်မုၢ်တၢ်ဘိလၢအဘံဝးတရံးမဲထီၣ်တၢ်တဖၣ် မဲထီၣ်လုၣ်ဘၢဝဲဒၣ် ယတၤသၣ်လီၢ် အကရၢၢ်န့ၣ်လီၤ. အဝဲသ့ၣ် မဲထီၣ်လၢတၢ်လဲၤလၢၢ်အကျဲဖီခိၣ်, မဲထီၣ်လၢကရၢၢ် အဒူၣ်လိၤ, ဒီးအနးကတၢၢ်န့ၣ် အဝဲသ့ၣ် ဂုာ်ကျဲးစၢး ဘျးစဲမဲထီၣ်ဝးတရံး ယတၢ်ဒိး တၢ်လၣ်အမုၢ်တဖၣ်လၢ ယဘၣ်သးဒိၣ်မးန့ၣ်လီၤ. ယမ့ၢ်တမၤ တၢ်တမံၤမံၤန့ၣ်ဒီး, ယတၢ်မုၢ်တၢ်ဘိလၢ ယကရၢၢ်အပူၤတဖၣ် တမ့ၢ်ကဒိၣ်ထီၣ်ဝဲဒၣ်လၢၤဘၣ်န့ၣ် ယသ့ၣ်ညါန့ၣ်လီၤ. လၢတၢ်န့ၣ်အဃိ, ဖဲမုၢ်ဃ့ၢ်လီၤတဟါန့ၣ် ယလဲၤပဲာ်စီ သ့ၣ်တပှီာ်အကမျိၤ တဖၣ် လၢယတၢ်မုၢ်တၢ်ဘိအထူၣ်မိၢ်ပှၢ်, ဒီးလၢအလၣ်တဖၣ်အလိၤန့ၣ်လီၤ. ဖဲအကမျိၤကွီၤတဖၣ် မ့ၢ်ဟဲထီၣ်ကဒါက့ၤတဘျီလၢ်လၢ်န့ၣ်, ယပဲာ်စီကွံာ်တလီၢ်လီၢ်, တုၤအကတီၢ်လၢ ယတၢ်မုၢ်တၢ်ဘိတဖၣ်ဒိၣ်တုာ်, ဒီးသၣ်ထီၣ်ဝဲဒၣ် တကီၤဆံၣ်သၣ်တဖၣ်, ဒီးမိၢ်ဟဲသၣ်တဖၣ်တစုန့ၣ်လီၤ.

ဒ်သ့ၣ်တပှီာ်အမုၢ်တဖၣ် ဂုာ်ကျဲးစၢးဒိၣ်စိလုၣ်ဘၢ ယတၤသၣ်လီၢ်အကရၢၢ်အသိး, တၢ်ဒဲးဘးတဖၣ် ဒ်အမ့ၢ် တၢ်သူၣ်လီသးကွံ, တၢ်သူၣ်ကတၢသးကတၢ, ဒီးတၢ်သူၣ်ဟ့သးကါတဖၣ်န့ၣ် ဒိၣ်စိလုၣ်ဘၢ ပတၢ်အိၣ်မူ သ့ဝဲဒၣ်န့ၣ်လီၤ. ပမ့ၢ်တပလီၢ်သူၣ်ပလီၢ်သးဘၣ်န့ၣ်, တၢ်ဆိကမိၣ်လၢအကမၣ် အချံအသၣ်န့ၣ် ဒိၣ်ထီၣ်အါထီၣ်ဝဲဒၣ် တုၤအပၢဆှၢ ပတၢ်မိၣ်န့ၢ်သးလီတဖၣ်, ဒီးပတၢ်ဖံးတၢ်မၤတဖၣ်, ဒ် ဧ့ၤဘြံၤ ၁၂:၁ ပာ်ဖျါဝဲ “တၢ်ဒဲးဘးလၢ အိၣ်စဲဘူးဒီးပှၤတဖၣ်” အသိးန့ၣ်, တြီဃာ် ပနီၢ်သးအတၢ်ဒိၣ်ထီၣ် သ့ဝဲဒၣ်န့ၣ်လီၤ.

ပှၤကွဲးလံာ်ဧ့ၤဘြံၤ ဟ့ၣ်ဂံၢ်ဟ့ၣ်ဘါပှၤလၢ “မ်ပဝဲဒၣ်စ့ၢ်ကီးပာ်လီၤကွံာ် ကယဲၢ်တၢ်အဃၢတမံၤလၢ်လၢ်.., ဒီးတၢ်ဃ့ၢ်သတြီၤအိၣ်လၢပမဲာ်ညါန့ၣ်, မ်ပဃ့ၢ်လၢတၢ်သးစူၤတက့ၢ်” (:၁) န့ၣ်လီၤ. ပကပူၤဖျဲးထီၣ်လၢ တၢ်စၢဃာ်အဂီၢ်န့ၣ်, ပလိၣ်ဘၣ် တၢ်မၤစၢၤလၢ တၢ်ကပဲာ်စီ ပတၢ်ဒဲးဘးလီၤန့ၣ် ပကဘၣ်အၢၣ်လီၤတူၢ်လိာ်ဝဲဒၣ်န့ၣ်လီၤ. ပမ့ၢ်စံးလီၤက့ၤပသးဃုာ်ဒီး, စံးဘၣ်ပှၤအဂုၤအဂၤတဖၣ်လၢ တၢ်တမ့ၢ် တၢ်ဂ့ၢ်ဒိၣ်ဒိၣ်မုၢ်မုၢ်ဘၣ်န့ၣ်ဒီး, တၢ်အံၤကီခဲသ့ ဝဲဒၣ်န့ၣ်လီၤ.

လၢတၢ်သူၣ်တီသးလိၤအပူၤ, ပမ့ၢ်အၢၣ်လီၤတူၢ်လိာ် တၢ်ဂ့ၢ်ကီအံၤန့ၣ်ဒီး, ၁ ယိၤ ၁:၉ ပာ်ဖျါဝဲလၢ ကစၢ်ယ့ၣ်ရှူး ကတူၢ်လိာ်မုာ် ပတၢ်ထုကဖၣ်အၢၣ်လီၤပတၢ်ကမၣ်, ဒီးကပျဲပျၢ်ကွံာ် ပတၢ်သရူးကမၣ် တကီၢ်ခါန့ၣ်လီၤ. ပကဘၣ်ဆီတလဲပတၢ်အိၣ်မူ က့ၢ်ဂီၤကျိၤကျဲတဖၣ်ဒ်လဲၣ်န့ၣ် ခီဖျိလၢသးစီဆှံ, အဝဲနဲၣ်လိပှၤသ့ဝဲဒၣ်, ဒ်သိးပကမၤနၢၤ တၢ်စၢဃာ်တဖၣ်လၢ အတြီဃာ် ပတၢ်ဂုၤထီၣ်ပသီထီၣ်အဂီၢ်, ကမၤစၢၤပှၤန့ၣ်လီၤ.