စၤရါ (Sarah) ထီၣ်လိာ်ကွဲ ပှၤထီၣ်လိာ်ကွဲတၢ်အဒူၣ်လိၤ, ဒီးဖဲအထီၣ်တုၤဝဲဒၣ်ဆူတၢ်လီၤဖးထီအကတီၢ်, မ့ၢ်လၢအစုလီၢ်စၢ်လီၤ, ဒီးဖီၣ်တၢ်ဃံးဃံးတန့ၢ်လၢၤဘၣ်အဃိ, တၢ်ပျံၤတၢ်ဖုး ဟဲနုာ်လီၤလၢ အသးပူၤန့ၣ်လီၤ. ဒီးဆိကမိၣ်ထီၣ်ဝဲလၢ, ယမ့ၢ်လီၤတဲာ်ဆူတၢ်ဖီလာ်န့ၣ် ကနးဒိၣ်ဝဲထဲလဲၣ်န့ၣ်လီၤ.

ဘၣ်ဆၣ်, သရၣ်နဲၣ်လိတၢ်တဂၤ အိၣ်လၢတၢ်ဖီလာ်ဒီး, တဲလီၤတံၢ်အီၤလၢအသုတဘၣ်ယိၣ်တၢ်တဂ့ၤန့ၣ်လီၤ. မ့ၢ်လၢတၢ်စၢဃာ်ပျံၤလၢ စၤရါ အပျံၤဂီၤကၢ်အလိၤန့ၣ် မ့ၢ်ပျံၤတဘိဃီဒီးပှၤဖီၣ်ဃာ် “တၢ်ဘံၣ်တၢ်ဘၢအပျံၤ” လၢအတကပၤ, ဒီးဘၣ်တၢ်ဘျးစဲဝဲဒၣ်လၢ ပၣ်ရံးသၣ်တခါအဃိ, အဝဲမ့ၢ်လီၤတဲာ်ဒၣ်လဲာ်န့ၣ် ပှၤတဂၤအံၤ အနီၢ်ခိအတယၢၢ် ကစိာ်ထီၣ်အီၤန့ၣ်လီၤ. ပှၤတဂၤအံၤ ကိးပသူထီၣ်ဝဲ “ယနီၢ်ကစၢ်အတယၢၢ် ဃၢဒိၣ်န့ၢ်ဒံးနၤလီၤ.” “ပျၢ်လီၤကွံာ်နစုတက့ၢ်” န့ၣ်လီၤ.

လၢတၢ်န့ၣ်အဃိ, စၤရါ ပျၢ်လီၤကွံာ်အစု, ဒီးထူၣ်ဖျဲးဝဲဒၣ်လၢ တၢ်အဒူၣ်, ထိၣ်လီၤစဲၤဟူးဝးယဲၤယီၤအသးလၢကလံၤကျါ, ပူၤဖျဲးဝဲလၢတၢ်ဘၣ်ဒိဘၣ်ထံးန့ၣ်လီၤ.

လၢ စၤရါ အဂီၢ်, တၢ်မၤအသးတမံၤအံၤ ဟ့ၣ်ထီၣ်ဝဲဒၣ် ကစၢ်ယွၤ အက့ၢ်အဂီၤ လၢတၢ်ထံၣ်အသီ, ဒ် စံး ၁၈:၂ ပာ်ဖျါဝဲ- “ယွၤမ့ၢ်ယလ့, ဒီးယတိာ်, ဒီးယတၢ်မၤပူၤ မၤဖျဲးယၤ, ယကစၢ်, ယလၢၢ်, . . . ယတၢးထီၣ်ထီ” အသိးန့ၣ်လီၤ. စၤရါ သ့ၣ်ညါနၢ်ပၢၢ်ဝဲဒၣ်လၢ, “ကစၢ်ယွၤန့ၣ် ဒိၣ်န့ၢ်ဃၢန့ၢ်ဒံး ယတၢ်ကီတၢ်ခဲတဖၣ်န့ၣ်လီၤ. ယပျဲပျၢ်ကွံာ် ယတၢ်ဘၣ်ယိၣ်, ဒီးယတၢ်ပျံၤတၢ်ဖုးတဖၣ် သ့ဝဲဒၣ်, ဒီး,ယွၤကဟံးဃာ်ဖီၣ်ဃာ်ဝဲဒၣ်ယၤန့ၣ်လီၤ.”

ဖဲကစၢ်ယွၤမၤပူၤမၤဖျဲး စီၤဒၤဝံးလၢ ဒုၣ်ဒါတဖၣ်အစုပူၤဝံၤ, သးဝံၣ်စံးဘျုးစံးဖှိၣ်ကစၢ်ယွၤန့ၣ် ဖျါဖဲ စံး ၁၈:၁၆-၁၈ အပူၤ, “ထုးထီၣ်ယၤလၢထံဒိၣ်အကျါ,” တၢ်လၢ အမ့ၢ် “ဒုၣ်ဒါလၢအဂံၢ်ဆူၣ်အဘါဆူၣ်,” လၢအကဟဲစိာ်န့ၢ် “တၢ်နးတၢ်ဖှီၣ် အမုၢ်နံၤ” တဖၣ်လၢအဂီၢ်န့ၣ်လီၤ. စီၤဒၤဝံး သ့ၣ်ညါဝဲဒၣ်လၢ အတၢ်ကီတၢ်ခဲတဖၣ် မ့ၢ်တလီၤမၢ်ကွံာ်ဝဲဒၣ်ခဲလၢာ်ဒၣ်လဲာ်, နာ်သန့ၤအသးလၢ ကစၢ်ယွၤ သ့ဝဲဒၣ်န့ၣ်လီၤ. ကစၢ်ယွၤ အဂံၢ်ဆူၣ်ဘါဆူၣ်လၢတၢ်ကိးမံၤအပူၤ, လၢအအုၣ်က့ၤခီၣ်က့ၤအီၤတဂၤန့ၣ်, ဟံးဃာ်ဖီၣ်ဃာ်အီၤဃံးဃံးန့ၣ်လီၤ.