“တိၤတဘိလၢထံကျိကွ့အဖီခိၣ်” (The Bridge on the River Kwai) န့ၣ်မ့ၢ်ဝဲ ၁၉၅၇ အတၢ်ဒုးတၢ်ယၤ တၢ်ဂီၤမူလၢ အမံၤဟူသၣ်ဖျါဒိၣ်မးအဃိ, ပှၤလဲၤဆူ ယိၤကီၢ် ခၣ်ခၠနၣ်ဘူၣ်ရံၣ် (Kanchanaburi) အါအါဂီၢ်ဂီၢ်, ဒ်သိးကလဲၤထံၣ်န့ၢ် ထးတိၤတဘိအံၤနီၢ်နီၢ်န့ၣ်လီၤ. ကမျၢၢ်တဖၣ် ထံၣ်ဝဲဒၣ် တိၤတဘိအံၤဘၣ်ဆၣ်, ထံကျိန့ၣ် တမ့ၢ် ကွ့ (Kwai) ဘၣ်. တၢ်ယုၢ်န့ၢ် တၢ်ဂီၤမူအမံၤ, ခီဖျိလၢအကိးကမၣ်ဝဲ ထံကျိတဘိအံၤအမံၤအဃိန့ၣ်လီၤ. ဘၣ်ဆၣ်, တယံာ်ဘၣ်န့ၣ်, မဲၣ်ကလီၣ် (Mae Klong) အထံကျိတကူၣ်တဝာ်န့ၣ် ဘၣ်တၢ်ယုၢ်န့ၢ်အမံၤလၢ ကွ့ၢ်ယၣ် (Kwae Yai) ကွ့ (Kwai), ဒ်သိးကလီၤပလိာ်အသးဒီးကမျၢ်တဖၣ် ဆၢမုၢ်လၢ်ထံၣ်ဝဲဒၣ်အဂီၢ်န့ၣ်လီၤ.

ပှၤဂုၤပှၤဂၤအတၢ်ဆၢမုၢ်လၢ်တဖၣ်အဃိ, ကစၢ်ယ့ၣ်ရှူး တပျဲအကစူးကွံာ်ညိကွံာ်ဝဲဒၣ် တၢ်မၤလၢကစၢ်ယွၤမၢလီၤအီၤနီတဘျီဘၣ်န့ၣ်လီၤ. ယိၤ ၆:၂ ပာ်ဖျါဝဲလၢ “ပှၤဂီၢ်မုၢ်ဖးဒိၣ်ပိာ်ထီၣ်အခံ,” မ့ၢ်လၢကမျၢ်တဖၣ် နၢ်ဟူဝဲဒၣ် ကစၢ်ယ့ၣ်ရှူး မၤတၢ်ပနီၣ်တဖၣ်, ဒီးတၢ်လီၤလိၣ်လီၤလးတဖၣ်အဃိ, ဒ်သိးကထံၣ်ဘၣ်အီၤအဂီၢ်, လူၤပိာ်အခံန့ၣ်လီၤ. ဖဲပှၤဂီၢ်မုၢ် ထံၣ်အီၤန့ၣ်ဒီး, နာ်ဝဲဒၣ်လၢ ကစၢ်ယ့ၣ်ရှူး မ့ၢ် မ့းရှံအၤ, လၢတၢ်စံးပာ်ဆိတ့ၢ်ဝဲတဂၤ, ဒီးကအုၣ်က့ၤခီၣ်က့ၤအပှၤဂီၢ်မုၢ်လၢ ပှၤရိမ့ၤဖိ အတၢ်ပၢအဖီလာ်အဂီၢ်န့ၣ်, ကမျၢ်တဖၣ်အဲၣ်ဒိးလၢ ကစၢ်ယ့ၣ်ရှူး ကကဲထီၣ် တၢ်ဒုးတၢ်ယၤခိၣ်နၢ်န့ၣ်လီၤ. လၢအဆၢဖိ ၁၅ န့ၣ် စီၤယိၤဟၣ် စံးဝဲဒၣ်လၢ “ယ့ၣ်ၡူးသ့ၣ်ညါလၢ အဝဲသ့ၣ်ကဟဲဒီးဟံးန့ၢ်ဆူၣ်အီၤ,
ဒ်သိးအကပာ်ထီၣ်အီၤလၢစီၤပၤဒီး, လဲၤထီၣ်ကဒီးဆူကစၢၢ်အလိၤတဂၤဃီ” န့ၣ်လီၤ.

ဒ်ပှၤဂီၢ်မုၢ်တဖၣ်သးလီဝဲအသိး, ကအုၣ်က့ၤခီၣ်က့ၤတၢ်အဂီၢ်, တၢ်မၤဆူၣ်အီၤဒၣ်လဲာ်, ဒ်ပှၤဟီၣ်ခိၣ်ဖိတဖၣ် လိၣ်ဘၣ်ဝဲကျိၤကျဲအသိး, လၢတၢ်ပာ်လီၤသးကျၢၤမုဆှုအပူၤန့ၣ် ကစၢ်ခရံာ် လူၤပိာ်မၤထွဲ ယွၤအတၢ်ပညိၣ် လၢကအုၣ်က့ၤခီၣ်က့ၤ, ကမၤပူၤမၤဖျဲးဝဲဒၣ်န့ၣ်လီၤ. (ကလီး ၁:၁၃). တမ့ၢ်တၢ်မၤပူၤမၤဖျဲးဝဲဒၣ်လၢ ဟီၣ်ခိၣ်အတၢ်နးတၢ်ဖှီၣ်တဖၣ်န့ၣ်ဘၣ်. မ့မ့ၢ် ဒ် ရိမ့ၤ ၈:၂ ပာ်ဖျါဝဲအသိး, ကမၤပူၤဖျဲးဝဲလၢ “တၢ်ဒဲးဘးဒီးတၢ်သံ” အစိကမီၤန့ၣ်လီၤ.

ကစၢ်ယ့ၣ်ရှူး အတၢ်ပာ်လီၤသးကျၢၤမုဆှု လၢကဟ့ၣ်လီၤပှၤ တၢ်လၢပလိၣ်ဘၣ်တဖၣ်န့ၣ် မ့ၢ်တၢ်ဂ့ၢ်လၢပနာ်န့ၢ်အီၤသ့ဝဲဒၣ် လၢတၢ်အိၣ်အသးကိးမံၤဒဲးအပူၤန့ၣ်လီၤ. ဖဲယွၤအကျဲတဖၣ် ဖျါလၢအတလီၤပလိာ်သးဒီးပဆၢမုၢ်လၢ်ကွၢ်စိတဖၣ်အကတီၢ်, မ့ၢ်လၢကစၢ်ယွၤ အသးအိၣ်မၤပူၤမၤဖျဲးပှၤန့ၣ် တကဒံကဒါဝဲဒၣ်အဃိ, ပကဘၣ် သ့ၣ်ညါလီၤတံၢ်လီၤဆဲးလၢ ယွၤအတၢ်ပညိၣ်န့ၣ် ဂ့ၤဒိၣ်ဝဲထီဘိန့ၣ်လီၤ.