စတံး (Steve) ဟံးထီၣ်ဖီၣ်ထီၣ် ထးသွဲနီၣ်ဘူးကဟၣ် (chainsaw), ဒီးလဲၤနုၥ်ဆူ ၦၢ်ပူၤန့ၣ်လီၤ. အကတီၢ်ဖဲန့ၣ်, နၢ်ဟူဝဲဒၣ် အဖိခွါ ပှၤယဲၢ်နံၣ်ဖိ အီကၢး(စ) အကလုၢ်, “ပါပၢ်ဧၢ, အိၣ်ခိးယၤ. ယအဲၣ်ဒိးလဲၤပိၥ်နခံလီၤ.” ဖီၣ်တဃာ်ဝဲ အတၢ်လိၣ်ကွဲ နီၣ်ဘူးကဟၣ်ဖိ, ဖျီၣ်တဃာ်ဝဲစုဖျီၣ်,ဃုာ်ဒီးတၢ်မၤဘၢနၢ်, ဒီးပိၥ်ထီၣ်ဝဲဒၣ် စတံး အခံန့ၣ်လီၤ. လၢအဖိခွါအဂီၢ်, စတံး ကတဲာ်ကတီၤန့ၢ် သ့ၣ်တကျီၣ်, ခံကျီၣ်, ဖဲတၢ်လီၢ်လၢအပူၤဖျဲးဒီး တၢ်ကဘၣ်ဒိဘၣ်ထံးအလီၢ်န့ၣ်လီၤ. အမံးနံး တဆံ လဲၤပူၤကွံာ်ဝံၤန့ၣ်ဒီး, အီကၢး(စ) လီၤဘှံးလီၤတီၤဝဲဒၣ်န့ၣ်လီၤ. တၢ်ဒီၣ်တဲၥ် သ့ၣ်ဖုတဖၣ်လၢ အတၢ်လိၣ်ကွဲ နီၣ်ဘူးကဟၣ်ဖိန့ၣ် မ့ၢ်တၢ်မၤလၢအကီအခဲတမံၤန့ၣ်လီၤ. ဘၣ်ဆၣ်, မ့ၢ်လၢအမၤစၢၤဘၣ် အပၢ် အဃိ, အသူၣ်ခုသးခုဝဲဒၣ်, ဒီးအပၢ်စ့ၢ်ကီး, မ့ၢ်လၢမၤလၢၥ်ဘၣ်အတၢ်ဆၢကတီၢ်လၢ အဖိခွါဖိအဃိ, မုၥ်လၤသးခုဝဲဒၣ်န့ၣ်လီၤ.

ပပၢ်အိၣ်လၢမူခိၣ်အဂီၢ်စ့ၢ်ကီး, တၢ်ကမၤအသးဒ်သိးအံၤ တမံၤဃီတမ့ၢ်ဘၣ်ဧါ. မ်ပကဆိကမိၣ်လၢ ပကမၤစၢၤအီၤန့ၣ်တက့ၢ်. “ပါပၢ်ဧၢ, အိၣ်ခိးယၤ. ယကလဲၤဟံးန့ၢ် ယနီၣ်ဘူးကဟၣ်ဒံး.” ဘၣ်ဆၣ်, ပနီၣ်ဘူးကဟၣ်န့ၣ် မ့ၢ်တၢ်လၢအကါဒိၣ်အဆံးကတၢၢ်လၢပဂီၢ်န့ၣ်လီၤ. ဒ်ပဆိကမိၣ်အသိး, တမ့ၢ်လၢ ပမၤစၢၤ ကစၢ်ယွၤဒိၣ်ဒိၣ်အါအါဘၣ်. ကစၢ်ယွၤ ဘၣ်သူၣ်ဘၣ်သး အါဒိၣ်ဝဲလၢ, ပတၢ်ကတိၤအခီၣ်ထံးတပတီၢ်, လၢအမ့ၢ် “ပါပၢ်ဧၢ, အိၣ်ခိးယၤ” န့ၣ်လီၤ. ပကမၤစၢၤအီၤအဂီၢ်, ကစၢ်ယွၤ တလိၣ်ဝဲဒၣ်ဘၣ်.

နမ့ၢ်အဲၣ် အဖိခွါ, ကစၢ်ယ့ၣ်ရှူးန့ၣ်ဒီး, ကစၢ်ယွၤ ကတူၢ်လိာ်နၤလၢ အဟံၣ်ဒူၣ်ဃီထၢအပူၤ, ဒီးကဟ့ၣ်လီၤနၤ အသးစီဆှံန့ၣ်လီၤ. ရိမ့ၤ ၈:၁၅ စံးဘၣ်ပှၤ “အဂ့ၢ်ဒ်အံၤ, သုတဒိးန့ၢ်ကုၢ်အသး ဒ်သိးသုကဘၣ်ပျံၤဘၣ်ဖုးကဒီးန့ၣ်ဘၣ်. မ့ၢ်သုဒိးန့ၢ်ဖိအသးလၢ ပကိးထီၣ် အးဘၤ ပၢ်ဧၢ, လၢအီၤလီၤ” န့ၣ်လီၤ. ဒ်သိးနကန့ၢ်ဘၣ်တၢ်လီၢ်တၢ်လၤလၢ ယွၤအမဲာ်ညါအဂီၢ်, နတမ့ၢ်ကုၢ်လၢ အဘၣ်ဂုာ်ကျဲးစၢးတၢ်တဂၤန့ၣ်ဘၣ်. နကမ့ၢ်ဒၣ်ဝဲ ဒ်လဲၣ်ဂ့ၤဒ်လဲၣ်ဂ့ၤန့ၣ် နမ့ၢ်ဖိလၢ အပၢ်အဲၣ်ဘၣ်အီၤတဂၤန့ၣ်လီၤ. ၁ ယိၤ ၃:၁ ပာ်ဖျါဝဲ “ကွၢ်တက့ၢ်. ပၢ်ဟ့ၣ်လံၦၤ လၢတၢ်အဲၣ်တၢ်ကွံဒ်လဲၣ်ဒ်လဲၣ်, လၢတၢ်ကကိးၦၤလၢယွၤအဖိန့ၣ်လီၤ.”

ပမ့ၢ်မၤအတၢ်မၤန့ၣ်ဒီး, ပပၢ်အိၣ်လၢမူခိၣ်တဂၤ ကမုၥ်လၤသးခုဝဲန့ၣ်လီၤ. ဘၣ်ဆၣ်, ကစၢ်ယွၤ တလိၣ်ဝဲဒၣ်ပတၢ်မၤစၢၤဘၣ်. မ့မ့ၢ်ကစၢ်ယွၤ အသးအိၣ်လိၣ်ဘၣ်ထဲဒၣ်ၦၤယိယိဖိန့ၣ်လီၤ.