ဘဲးထံၣ် (Betty) အိၣ်ကတဲၥ်ကတီၤပာ်အသးလံ. ဖဲဘဲးထံၣ် အသးစၢ်လံၤလံၤန့ၣ် စးထီၣ်ပိၥ် ကစၢ်ယ့ၣ်ရှူးအခံ, ဒီးဂုာ်ကျဲးစၢးဟံးန့ၢ် ခွဲးယၥ်တဖၣ်လၢ အသးသမူဒီတစိၤ, ဒ်သိးကမၤယွၤအတၢ်, ဒီးကမၤမံမၤမုၥ်ယွၤအသးအဂီၢ်န့ၣ်လီၤ. အဝဲထီၣ်ဝဲဒၣ် တၢ်သိၣ်လိ လံၥ်စီဆှံတဖၣ်, တၢ်ဘါတၢ်ရဲၣ်တၢ်ကျဲၤတဖၣ်, ဒီးတၢ်ထုကဖၣ်ကရၢတဖၣ်န့ၣ်လီၤ. ဘဲးထံၣ် သိၣ်လိဝဲဒၣ် လံၥ်စီဆှံ, လဲၤဟးအိၣ်သကိး တၢ်သးခုကစီၣ်အပျီတဖၣ်, ဖံးတၢ်မၤတၢ်လၢ တီၤဘျီကၠိ, မၤသဃဲၤတၢ်ဒီးအဝၢ်တၢ်အိၣ်ဖှိၣ်သရၣ်, ဒီးဖဲအဒိးန့ၢ်ဝဲဒၣ် ခွဲးယၥ်တဘျီလၢ်လၢ်န့ၣ် အသးအိၣ်ဖံးသကိးမၤသကိးတၢ်ဒီးယွၤအၦၤဂီၢ်မုၢ်တဖၣ်န့ၣ်လီၤ. တၢ်လၢအလီၤဆီတမံၤန့ၣ် ဘဲးထံၣ် အသးအနံၣ်အလါ အိၣ်ဝဲဒၣ် ၁၀၂ နံၣ်လံ, ဒီးထီဘိန့ၣ် အိၣ်ကတဲၥ်ကတီၤပာ်အသးလၢ ကမၤတၢ်တမံၤလၢ်လၢ်, ဒ်သိးကမၤမံမၤမုၥ် ကစၢ်ယွၤအသးအဂီၢ်န့ၣ်လီၤ. မုၢ်နံၤတဖၣ်လၢ ၦၤအါဂၤ အတအဲၣ်ဒိး ထံၣ်လိၥ်ရ့လိာ်အသးဒီး ၦၤစူၢ်က့ၤနၥ်က့ၤတၢ်အဂုၤအဂၤတဖၣ်ဖဲ တၢ်ဘါသရိာ်အခါ, ဘဲးထံၣ် ကဲထီၣ်ဝဲ ပှၤလၢ
အထိၣ်ဟူးထိၣ်ဂဲၤအဝဲသ့ၣ်အသးန့ၣ်လီၤ. ဒီးပှၤသ့ၣ်တဖၣ်အံၤ သ့ၣ်နီၣ်ထီၣ်ဝဲလၢ, ဘဲးထံၣ် ကအိၣ်ဝဲဒၣ်ဖဲန့ၣ်, ဒီးယကဘၣ်လဲၤယဲဖဲန့ၣ်သၦၢ်တၢၢ်န့ၣ်လီၤ. ခဲကနံၣ်အံၤ, ဘဲးထံၣ် ပာ်ဖျါဝဲဒၣ်လၢ အတၢ်သူၣ်ဆူၣ်သးဂဲၤဝဲလၢ ကလဲၤထီၣ်ဆူမူခိၣ်, ဒီးကအိၣ်ဆိးဝဲဒၣ်လၢ အတၢ်အုၣ်က့ၤခီၣ်က့ၤကစၢ်န့ၣ်လီၤ. အဝဲစံးဝဲ, “ဒ်သိးယကထံၣ်ဘၣ်ကစၢ်ယ့ၣ်ရှူး, လၢယအဲၣ်အီၤဒိၣ်မးတဂၤအဂီၢ်, ယကတဲၥ်ကတီၤပာ်ယသးလံန့ၣ်လီၤ.”
ပှၤတၢ်မၢဖိ စီၤပီလူး စံးဝဲဒၣ်လၢ, “ပအိၣ်ဒီးပသးခူတလ့ၢ်, ဒီးဘၣ်သးလၢပအိၣ်ယံၤဒီးပနီၢ်ခိ, ဒီးအိၣ်ဒီးကစၢ်” (၂ ကရံၣ် ၅:၈) န့ၣ်လီၤ. ဘၣ်ဆၣ်, ယွၤဟ့ၣ်အီၤတၢ်ဖံးတၢ်မၤ, ဒ်သိးကဘၣ်ဟ့ၣ်ဂံၢ်ဟ့ၣ်ဘါ ၦၤစူၢ်က့ၤနၥ်က့ၤတၢ်ဖိတဖၣ်လၢ တၢ်အိၣ်ဖှိၣ်တဖၣ် (ဖံး ၁:၂၃-၂၄) န့ၣ် စီၤပီလူး သ့ၣ်ညါဝဲဒၣ်န့ၣ်လီၤ. လၢတၢ်န့ၣ်အဃိ, အဝဲမၤ ကစၢ်ယွၤအတၢ်မၤဆူညါကွ့ၢ်ကွ့ၢ်, ဒီးအိၣ်မူဝဲဒၣ်လၢ “တၢ်နၥ်,” ဒီး “တမ့ၢ်ဘၣ်လၢ ထံၣ်တၢ်ဘၣ်” (၂ကရံၣ် ၅:၇) န့ၣ်လီၤ. စီၤပီလူး အိၣ်ကတဲၥ်ကတီၤအသး, ဒီးမၤဝဲဒၣ်ယွၤအတၢ်မၤဆူညါကွ့ၢ်ကွ့ၢ်, ဒ်ယွၤအတၢ်နဲၣ်ဆှၢအီၤအသိးန့ၣ်လီၤ.
ပသးအနံၣ်အလါ, ဒီးပတၢ်အိၣ်မူအပတီၢ်, ကမ့ၢ်ဒၣ်ဝဲ တမံၤဂ့ၤတမံၤဂ့ၤ, မ်ပကဃ့ယွၤ ဒ်သိးကမၤစၢၤၦၤလၢ တၢ်ဒုးအိၣ်ထီၣ် ပသးသမူအဖီတၢၣ်လၢအမ့ၢ် “တၢ်ဘၣ်ကစၢ်အသး” (:၉), ဒီးအိၣ်ကတဲၥ်ကတီၤပသးထီဘိန့ၣ်တက့ၢ်. ဘဲးထံၣ် အိၣ်ကတဲၥ်ကတီၤတ့ၢ်လံအသး. ဒီးမ့ၢ်တအိၣ်ကတဲၥ်ကတီၤအသး လၢအမုၢ်တနံၤန့ၣ်ဒီး, ကမ့ၢ်ဝဲဒၣ်လၢ အထံၣ်ဘၣ် ကစၢ်ယ့ၣ်ရှူး လၢမဲၥ်သကိးမဲၥ်လံန့ၣ်လီၤ.
