ကသံၣ်သရၣ် အဲး(စ)ဒဲ (Ezdan) လၢဝ့ၢ်ဆံးဖိန့ၣ် ဒုးအိၣ်ထီၣ် တၢ်မံမီၢ်ဖးဒိၣ် လၢအဖိမုၣ်ဖိ အဲလံၣ်နီ (Eleanor) အဂီၢ်န့ၣ်လီၤ. အဖိမုၣ်န့ၣ် မ့ၢ် ဖိမုၣ်လီၤဆီ, ဒီ (Down Syndrome)ဖိတဂၤ, ဒီးမုၢ်လၢ်ဝဲလၢကဒုးအိၣ်ထီၣ် ပနံာ်ကၤအတၢ်မၤ, ဒ်သိးကကတဲာ်ကတီၤန့ၢ်ဝဲ တၢ်ဖံးတၢ်မၤလၢ ခါဆူညါ ကျိာ်စ့ကဟဲနုာ်လီၤလၢအဖိမုၣ်အဂီၢ်န့ၣ်လီၤ. ကစးထီၣ်မၤဝဲ အတၢ်မံမီၢ်အဂီၢ်, အသးကလၢၢ်ဘၣ် တၢ်ပျံၤတၢ်ဖုးအဃိ, မၤလိန့ၢ်ဝဲ “တၢ်ကဘၣ်စးထီၣ် ပနံာ်ကၤအတၢ်မၤဒ်လဲၣ်” အတၢ်မၤလိလၢ ပှာ်ဘျးစဲန့ၣ်လီၤ. ဝံၤ, အဲး(စ)ဒဲဒီးအမါ န့ၣ် ဒုးအိၣ်ထီၣ်ဝဲဒၣ် ဟံၣ်ဖိဃီဖိ တၢ်တ့ကိၣ်အတၢ်မၤ, လၢအဝဲသ့ၣ် ဝၣ်ယိမ့ၣ် (Wyoming) အဝ့ၢ်ဖိ, ဒီးတၢ်ဖံးတၢ်မၤန့ၣ် ဂုၤထီၣ်ပသီထီၣ်ဝဲဒၣ်န့ၣ်လီၤ. အဲး(စ)ဒဲ စံးဝဲလၢ, “တၢ်မၤအံၤ ကဲထီၣ်ပနံာ်ကၤအတၢ်မၤနီၢ်နီၢ်, အိၣ်ဒီးပှၤမၤတၢ်ဖိ” န့ၣ်လီၤ. မ့မ့ၢ် ခဲကနံၣ်အံၤ, အဲလံၣ်နီန့ၣ် ဒိၣ်ထီၣ်လံ, ဒီးမၤဝဲဒ်အမ့ၢ်ပှၤတူၢ်လိာ်စ့, ဒီးဆဲးကျိးဆါဝဲကိၣ်တဖၣ်ဆူ အီၣ်လဲ (online) ပှၤပှ့ၤတၢ်တဖၣ်န့ၣ်လီၤ. အဲး(စ)ဒဲ စံးဝဲဒၣ်လၢ, “ကယဲၢ်ပှၤအိၣ်ဆိးလၢဝ့ၢ်တဖၣ်သ့ၣ်ညါအီၤ” န့ၣ်လီၤ. အဲး(စ)ဒဲ အတၢ်စူၢ်တၢ်နာ်အဒိၣ်အထီ, လၢတၢ်ရဲၣ်ကျဲၤန့ၢ် ခါဆူညါအဖိမုၣ် အဲလံၣ်နီ အဂီၢ်န့ၣ်, ဆဲးကပီၤဖျါထီၣ်က့ၤဝဲဒၣ်လၢ အတၢ်ဃုထၢန့ၣ် မ့ၢ်တၢ်လၢအဂ့ၤအဘၣ်တမံၤန့ၣ်လီၤ.
လၢလံာ်စီဆှံအပူၤ, တၢ်ရဲၣ်ကျဲၤကူၣ်ထီၣ်တၢ်အဂ့ၤအဘၣ်န့ၣ် မ့ၢ်လုၢ်လၢ်ကံၢ်စီ အဃံအလၤတမံၤန့ၣ်လီၤ. တၢ်ရဲၣ်ကျဲၤကူၣ်ထီၣ်တၢ်အဂ့ၤအဘၣ်န့ၣ် မ့ၢ်တၢ်ကူၣ်သ့တမံၤလၢ ကစၢ်ယွၤ စံၣ်ညီၣ်တဲာ်ဆိပာ်ဝဲလၢ ခ့ခါ,ဒီးခါဆူညါပတၢ်ရဲၣ်တၢ်ကျဲၤတဖၣ်အဂီၢ်န့ၣ်လီၤ. ကတိၤ ၁၄:၈ စံးဘၣ်ပှၤလၢ “ပှၤကူၣ်တၢ်ဘၣ်အတၢ်ကူၣ်သ့န့ၣ် မ့ၢ်လၢအနၢ်ပၢၢ်အကျဲလီၤ. မ့မ့ၢ် ပှၤဟးဂီၤဖိအတၢ်ဟးဂီၤန့ၣ် မ့ၢ်လီတၢ်” န့ၣ်လီၤ. တၢ်ဘၣ်ယိၣ်တၢ်လၢ ခါဆူညါအဂီၢ်မ့ၢ်ဂ့ၤ, ပမ့ၢ်တမၤတၢ်နီတမံၤမ့ၢ်ဂ့ၤအလီၢ်န့ၣ်, ပှၤကူၣ်ထီၣ်တၢ်အဂ့ၤအဘၣ်တဖၣ်န့ၣ် ဒ်သိးကရဲၣ်ကျဲၤတၢ် အဂီၢ်, ကွၢ်ထီၣ်ဝဲဆူ ကစၢ်ယွၤ အတၢ်ကူၣ်သ့န့ၣ်လီၤ.
နီၢ်နီၢ်န့ၣ်, တၢ်ကတိၤ တၢ်ကူၣ်ထီၣ်တၢ်အဂ့ၤအဝါစံးတၢ်န့ၣ် အိၣ်ဟဲဝဲလိၤလိၤလၢ လၤတ့ၣ် အလံာ်မဲာ်ဖျၢၣ် “ပရူၤဒဲရှါ” (prudentia), ဒီးအခီပညီန့ၣ် “တၢ်ထံၣ်ဆိ” န့ၣ်လီၤ. အဆၢဖိ ၁၅ ပာ်ဖျါဝဲ, “ပှၤလၢအတမၤလိဘၣ်တၢ်ဘၣ်န့ၣ် နာ်တၢ်ကတိၤကိးထံၣ်ဒဲးလီၤ. မ့မ့ၢ်ပှၤအကူၣ်တၢ်ဘၣ်န့ၣ် ကွၢ်ဆိကမိၣ်အထွဲတၢ်” န့ၣ်လီၤ. ဒ်သိးကတ့ဒုးအိၣ်ထီၣ် တၢ်လီၢ်အဘံၣ်အဘၢအဂီၢ်, တၢ်သ့ၣ်ညါဆိ ခါဆူညါတၢ်ကမၤအသးတမံၤမံၤ, ဒီးမၤတၢ်လၢတၢ်သူၣ်ဆးသးဆးအပူၤန့ၣ်, လၢပှၤကူၣ်သ့တဖၣ်အဂီၢ်, မ့ၢ်ဒၣ်တၢ်လဲၤကျဲအဂၢၢ်အကျၢၤန့ၣ်လီၤ.
လၢတၢ်စူၢ်တၢ်နာ် အတၢ်ထံၣ်ဆှံဆှံဖိအပူၤန့ၣ် မ်ပကအိၣ်မူအိၣ်ဂဲၤ ကူၣ်ထီၣ်မၤတၢ် အဂ့ၤအဝါ, ဒီးလူၤပိာ်ထွဲယွၤအကျဲန့ၣ်တက့ၢ်.
