အပူၤကွံာ်နံၣ်တဖၣ်န့ၣ်, ပစံးကတိၤဂ့ၢ်လိာ်ဘှီလိာ်သးဆူၣ်ဆူၣ်ကိၢ်ကိၢ်ဝံၤ, ကဲရိၤလ့ (Carolyn) ဒီးယၤ ပဘှါဆှဲမၤဂ့ၤထီၣ် ပတၢ်ဂ့ၢ်လိာ်သးတဖၣ်, ဒီးလၢအလီၢ်န့ၣ် ပဒုးအိၣ်ထီၣ် တၢ်သူၣ်ကညီၤသးကညီၤ, ဒီးတၢ်အဲၣ်တၢ်ကွံလိာ်သးကဒဲကဒဲန့ၣ်လီၤ. ယအၢၣ်လီၤ ယတၢ်ကမၣ်, ဒီးအဝဲဃ့ထုကဖၣ်တၢ်လၢယဂီၢ်, ဒီးပာ်ဖျါထီၣ်ဝဲ ဝံအတၢ်ကတိၤ ဖျါဖဲ ယဃ့း ၃၆:၂၆ အပူၤ, “ဒီးယကဟ့ၣ်လီၤသုသးသီ, ဒီးသုသးဆိကမိၣ် တၢ်အသီ ယကပာ်လၢသုပူၤ, ဒီးယကဟံးထီၣ်ကွံာ် သုသးလၢၢ် လၢသုဖံးသုညၣ်အပူၤ, ဒီးယကဟ့ၣ်လီၤသုသးညၣ်” န့ၣ်လီၤ. ယသးကလၢၢ်ဘၣ်လၢ ကစၢ်ယွၤ မၤဝဲ နီၢ်သး
အတၢ်ကွဲးကါကူစါတၢ်လၢယဂီၢ်, ဟံးထီၣ်ကွံာ် ယတၢ်ပျံၤတၢ်ဖုး, ယတၢ်သးဆါ, ဒီး ဟံးဃာ်ပၢၤဃာ်ယၤ လၢအတၢ်အဲၣ်န့ၣ်လီၤ.
ဒ်ပမၤတ့ၢ်ဝဲအသိး, တၢ်ဒိးသန့ၤထီၣ်ပသး လၢလံာ်စီဆှံအဆၢန့ၣ် ကစၢ်ယွၤ အဲၣ်ဝဲဘၣ်ဆၣ်, ပကဘၣ်ပာ်သူၣ်ပာ်သးလၢ လံာ်စီၤဆှံအဆၢ အခီၣ်ထံးခီၣ်ဘိန့ၣ် မ့ၢ်တၢ်လၢ အကါဒိၣ်ဝဲဒၣ်တမံၤန့ၣ်လီၤ. လၢယွၤအခၢၣ်စးန့ၣ် ဝံယဃ့းစက့လး စံးကတိၤလီၤတၢ်ဆူ ယွၤအပှၤဂီၢ်မုၢ်အအိၣ်, ဘၣ်ထွဲဒီးယွၤအၢၣ်လီၤဝဲလၢ ကမၤကဆှီထီၣ်အပှၤဂီၢ်မုၢ်န့ၣ်လီၤ. ဘၣ်မနုၤအဃိလဲၣ်. အဆၢဖိ ၂၂ န့ၣ် ပကထံၣ်ဘၣ် “ကစၢ်ယွၤ စံးဒ်အံၤ. အံၣ်စရ့လး အပှၤဟံၣ်ဖိသ့ၣ်ဧၢ, ယမၤတၢ်အံၤလၢသုဃိတမ့ၢ်ဘၣ်, မ့ၢ်လၢယမံၤစီဆှံ… အဃိ” န့ၣ်လီၤ. လၢအပှၤဂီၢ်မုၢ်အကျါန့ၣ် ယွၤကမၤဝဲ တၢ်ပဲာ်ကဆှီတၢ်အတၢ်မၤ, ဒ်သိးကယဲၢ်ပှၤကလုာ် ခဲလၢာ် ကပာ်ဒိၣ်ပာ်ကဲအီၤ, ဒီးကသ့ၣ်ညါဝဲလၢအမ့ၢ် ကစၢ်ယွၤ န့ၣ်လီၤ.
ကစၢ်ယွၤ မၤလၢပှဲၤဝဲ အတၢ်ပညိၣ်တဖၣ် ခီဖျိလၢပတၢ်အိၣ်မူအပူၤန့ၣ်, တမ့ၢ်ထဲလၢ ကမၤစၢၤပှၤ ဒ်သိးပကဂုၤထီၣ်ပသီထီၣ်အဂီၢ်န့ၣ်ဘၣ်. မ့မ့ၢ်ဒ်သိးပကမၤလၤကပီၤအီၤအဂီၢ်န့ၣ်လီၤ. ကစၢ်ယွၤ တၢ်အၢၣ်လီၤဝဲဒၣ် ပှၤအံၣ်စရ့လးဖိတဖၣ်လၢ ကဟ့ၣ်သးအသီ, ဒီးသးအတၢ်ဆိကမိၣ်အသီဒၣ်လဲာ်, ခီဖျိလၢသးစီဆှံအတၢ်မၤန့ၣ် ကစၢ်ယွၤ ဟံးထီၣ်ကွံာ် ပသးလၢအခုၣ်ကိၤ, ဒီးအလီၢ်န့ၣ်တ့ၢ်နုာ်ဝဲသးဖျၢၣ် လၢကဒိးန့ၢ်တၢ်, ဒီးဟ့ၣ်ခီဟ့ၣ်နီၤလီၤ ကစၢ်ယွၤအတၢ်အဲၣ်, ဒီးတၢ်မူန့ၣ်လီၤ.
