ဖဲလၢန့ၣ်ကယၤခံဆံ အကတီၢ်ဆိတဖၣ်န့ၣ်, ဝ့ၢ်နယူယီး (New York) မ့ၢ် တၢ်လီၢ်တၢ်ကျဲ, အိၣ်ပှဲၤဒီးတၢ်သီၣ်တၢ်သဲလၢ အတမုာ်တလၤတဖၣ်န့ၣ်လီၤ. လီလ့ၣ်မ့ၣ်အူတဖၣ် ဃ့ၢ်ဝဲဒၣ်လၢတၢ်ဖးဖီ, ဒီးလၢဟီၣ်ခိၣ်လိၤ, သိလ့ၣ်သ့ၣ်တဖၣ်, ပှၤဆါတၢ်ပရၢပစၢၢ်သ့ၣ်တဖၣ် အတၢ်ကိးပသူ, ဒီးကမျၢၣ်သ့ၣ်တဖၣ် လၢအဂုာ်တၢ်ဆၢကတီၢ် ဒီးလဲၤက့ၤဖံးမၤတၢ်တဖၣ်အဃိ, တၢ်အိၣ်မူအိၣ်ဂဲၤတဖၣ် သီၣ်ထီၣ်သဲထီၣ်ဒိၣ်ဒိၣ်ကလဲာ်န့ၣ်လီၤ. ဘၣ်ဖဲမုၢ်တနံၤ, ဖဲ ဘရီးဝ့ (Broadway) အကျဲဒီးကျဲ ၃၄ ဘိတဘိ ထံၣ်လိာ်သးတၢ်လီၢ်တတီၢ်န့ၣ်, ပှၤတဂၤ, အမံၤလၢ ခၠါ ခဲလိး (Charles Kellogg) န့ၣ် တဲဝဲအတံၤသကိးလၢ “ကနၣ်တထံၣ်, ယနၣ်ဟူ သကံၤမၤသီၣ်မၤသဲအကလုၢ်” န့ၣ်လီၤ.
အတံၤသကိး စံးဆၢဝဲလၢ “ဘၣ်ကမ့ၢ်ဧါ, တၢ်သီၣ်တၢ်သဲဒိၣ်ဒိၣ်အါအါအပူၤန့ၣ် တမ့ၢ်လၢနကနၢ်ဟူ တၢ်ကလုၢ်ဆံးဖိဒ်သိးအံၤန့ၣ်ဘၣ်.” ဘၣ်ဆၣ်, ခဲလိး န့ၣ် တဲဝဲကျၢၤမူဆှူ, ဒီးအကတၢၢ်န့ၣ် ဃုထံၣ်န့ၢ်ဝဲသကံၤ, လၢမၤသီၣ်အကလုၢ် ဖဲပှၤကုၤကိၣ်အလီၢ်အပဲတြီန့ၣ်လီၤ. အတံၤသကိး တဲအီၤလၢ “နနၢ်ဟူတၢ်ဒ်သိးအံၤန့ၣ် မ့ၢ်တၢ်လၢအလီၤကမၢကမၣ်” န့ၣ်လီၤ. ခဲလိး စံးဆၢဝဲလၢ “တမ့ၢ်ထီဘိဘၣ်, တၢ်မၤအသးဒ်သိးအံၤန့ၣ် ဘၣ်ဃးဒီးတၢ်ပာ်ဖှိၣ်ပညိၣ်နတၢ်သးစဲလၢတၢ်တမံၤမံၤအဖီခိၣ်” န့ၣ်လီၤ.
၁ စီၤ ၁၉:၁-၉ ပာ်ဖျါဝဲလၢ စီၤအ့ၤလံယၤ မ့ၢ်ယွၤအဝံတဂၤ, လၢအထံၣ်ဘၣ် ကစၢ်ယွၤ ဒုးနဲၣ် အစိအကမီၤ လၢအလီၤကမၢကမၣ်ဘၣ်ဆၣ်, ခဲကနံၣ်အံၤ, မ့ၢ်လၢ အပျံၤဘၣ် နီၣ်ပၤမုၢ် လၢတသ့ၣ်ညါယွၤတဂၤအဃိ, ဘၣ်အိၣ်ခူသူၣ်ဝဲလၢ လၢၢ်လ့အကိပူၤန့ၣ်လီၤ. ဘၣ်ဆၣ်, တကတီၢ်အံၤ, ကစၢ်ယွၤ တအဲၣ်ဒိး ဒုးနဲၣ်ဝဲဒၣ်လၢတၢ်စိတၢ်ကမီၤအကျိၤအကျဲဘၣ်. အဆၢဖိ ၁၁-၁၂ န့ၣ် ကစၢ်ယွၤ ဆှၢလီၤဝဲဒၣ် ကလံၤမုၢ်ဆူၣ်ဆူၣ်, ဟီၣ်ခိၣ်ဟူးဝး, ဒီးမ့ၢ်အူလၢအကဲၤထီၣ်ဘၣ်ဆၣ်, ခဲကနံၣ်အံၤ, မ့ၢ်တၢ်ဆၢကတီၢ်လၢ စီၤအ့ၤလံယၤ ကဘၣ်ရ့လိာ်အသးဒီးကစၢ်ယွၤ ဘူးဘူးတံၢ်တံၢ်, လၢတၢ်ဘှ့ၣ်တၢ်ဘှီၣ်အပူၤန့ၣ်လီၤ. ဒ်အဆၢဖိ ၁၂ ပာ်ဖျါဝဲအသိး, ကစၢ်ယွၤ အဲၣ်ဒိး ကတိၤတၢ်ဒီးဝံ ခီဖျိလၢ “တၢ်ကတိၤကပုာ်လုးကသွံဒံဖိ” န့ၣ်လီၤ.
ခ့ခါအကတီၢ်, လၢပတၢ်အိၣ်မူတဖၣ်န့ၣ် တၢ်ကလုၢ်တမုာ်တလၤအိၣ်ဘျဲၣ်အိၣ်စဲၢ် အါမးဘၣ်ဆၣ်, ကစၢ်ယွၤ ကတိၤဒံးတၢ်ဒီးပှၤ လၢအကလုၢ်ဘှ့ၣ်ဘှ့ၣ်ဘှီၣ်ဘှီၣ်, ခီဖျိလၢအကလုၢ်ကထါ, ဒီးသးစီဆှံန့ၣ်လီၤ. တၢ်ဟံးန့ၢ်တၢ်ဆၢကတီၢ်, ဃ့ထုကဖၣ်သပှၢ်ပှၢ်, လၢတၢ်ပာ်ပညိၣ်ပတၢ်သးစဲ ဒ်သိးပကနၢ်ဟူ ကစၢ်ယွၤ ကမၤစၢၤပှၤ ခီဖျိအကလုၢ်လၢ အမၤမုာ်ထီၣ်က့ၤပှၤ, ဒီးလၢအနဲၣ်ဆှၢပှၤန့ၣ်လီၤ.
