ဖဲလၢ အဲရ့း (Eric) ဖိသၣ်အကတီၢ်, အတၢ်ဂ့ၢ်ကီတဖၣ်န့ၣ် မ့ၢ်ဝဲ ဖံးဘ့ၣ်ဘၣ်ပြုထီၣ်, ဘၣ်ကွၢ်ဆၢၣ်မဲာ် တၢ်ကီတၢ်ခဲတဖၣ်လၢကၠိ, ဒီးကိးမုၢ်နံၤန့ၣ် အီသံး, စူးကါကသံၣ်မူၤဘှိးအါအါကလဲာ် စးထီၣ်လၢအသးစၢ်လံၤလံၤန့ၣ်လီၤ. နီၢ်နီၢ်န့ၣ်, ပှၤလၢအစံးလီၤအသး “ပှၤအၢဖိအစီၤပၤ” တဂၤအံၤ သ့ၣ်ညါလီၤအသးလၢ အဝဲမ့ၢ် ပှၤလိာ်ကွဲ ဖျၢၣ်တီၢ် (baseball) စဲၣ်နီၤတဂၤဘၣ်ဆၣ်, မ့ၢ်လၢပှၤကွၢ်မဲာ်ကွၢ်တလီၤအီၤန့ၣ် မၤဘၣ်ဒိဆါ အသးအဃိ, စူးကွံာ်ညိကွံာ်ဝဲ တၢ်လိာ်ကွဲ ဖျၢၣ်တီၢ်န့ၣ်လီၤ. လၢတၢ်ဂ့ၢ်အံၤအဃိ, အဲရ့းဒိးန့ၢ်အါထီၣ် တၢ်ဆၢကတီၢ်လၢ ကစူးကါ, ဒီးတၢ်ပှ့ၤဆါ ကသံၣ်မူၤဘှိးတဖၣ်န့ၣ်လီၤ.
ဘၣ်ဆၣ်, ဖဲအဝဲလဲၤထီၣ်ဘါယွၤ အကတီၢ်တဘျီန့ၣ်, အသးကလၢၢ်ဘၣ်ဝဲ ကစၢ်ယ့ၣ်ရှူး, လၢအမ့ၢ် ပှၤဆီတလဲက့ၤတၢ်အိၣ်မူတဂၤန့ၣ်ဒီး, အဲရံးအတၢ်အိၣ်မူ ဆီတလဲ အသးန့ၣ်လီၤ. လၢခံတသီ, ဖဲအတၢ်ဖံးတၢ်မၤန့ၣ်, ပှၤအဲၣ်ထူအဲၣ်ယွၤလၢ အစူၢ်က့ၤနာ်က့ၤကစၢ်ယ့ၣ်ရှူးနီၢ်နီၢ်တဂၤ, ကွဲမုာ်အီၤလၢ ကလဲၤဘါသကိးယွၤ လၢခံတဘျီန့ၣ်လီၤ. ဖဲန့ၣ် အဲရ့း ဒိကနၣ်ဘၣ်ဝဲ, ကစၢ်ယွၤအကလုၢ်ကထါ ဖျါဖဲ ၂ ကရံၣ် ၅:၁၇ အပူၤ, ဒီးစံးဝဲဒၣ် “ပှၤတဂၤ မ့ၢ်အိၣ်လၢခရံာ်အပူၤဒီး, မ့ၢ်အမ့ၢ်တၢ်တ့အသီလီၤ. တၢ်လီၢ်လံၤတဖၣ်ပူၤကွံာ်ဝဲ, ကွၢ်ကွၢ်တၢ်ခဲလၢာ် ကဲလၢအသီလံ,” တမံၤအံၤ ကဲထီၣ်တၢ်န့ၢ်ဂံၢ်န့ၢ်ဘါ, ဘၣ်ဃးဒီးအတၢ်စူၢ်တၢ်နာ်အသီလၢ အဃုထံၣ်န့ၢ်ဝဲလၢအဂီၢ်န့ၣ်လီၤ. အဲရ့း အတၢ်အိၣ်မူန့ၣ် တမ့ၢ်ဝဲဒၣ် ဒ်အပူၤကွံာ်အသိးလၢၤဘၣ်န့ၣ်လီၤ.
ဒ် အဲရ့း အသိး, ပှၤတၢ်စူးဖိ စီၤစီလူး (ဘၣ်တၢ်သ့ၣ်ညါအီၤဒ် စီၤပီလူး) စ့ၢ်ကီး, ကဘၣ်တၢ်ပာ်ပနီၣ်အီၤ ဒ်အမ့ၢ် “ပှၤအကီအခဲ” တဂၤအသိးန့ၣ်လီၤ. ၁ တံၤ ၁:၁၅ အပူၤန့ၣ် စီၤပီလူး စံးဝဲဒၣ် “ပှၤတၢ်ဒဲးဘးဖိ, လၢယမ့ၢ်အဒိၣ်ကတၢၢ်တဂၤ” န့ၣ်လီၤ. အဆၢဖိ ၁၃ န့ၣ် အဝဲစံးလီၤအသးလၢ “ယဲဒၣ်အံၤလၢအခီၣ်ထံးန့ၣ်, ယမ့ၢ်ပှၤဒုၣ်ဒွဲၣ်တၢ်, ဒီးပှၤမၤအၢမၤသီတၢ်, ဒီးပှၤအဒူ” န့ၣ်လီၤ. ဒ်စီၤစီလူးအသိး, အဲရ့း မ့ၢ် ပှၤအကြၢးအဘၣ်နီၢ်နီၢ် လၢကစၢ်ယ့ၣ်ရှူးအဂီၢ်န့ၣ်လီၤ. ဒ် ရိမ့ၤ ၃:၂၃ ပာ်ဖျါဝဲအသိး, မ့ၢ်လၢ “ပှၤဟီၣ်ခိၣ်ဖိလၢာ် မၤတၢ်ဒဲးဘးဒီးတချုးန့ၢ်ထီၣ်ဘးကစၢ်ယွၤ အတၢ်လၤကပီၤဘၣ်” အဃိ, ပအိၣ်လၢ တၢ်အပတီၢ် တမံၤဃီအပူၤဒၣ်လဲာ်န့ၣ်, ပဝဲနၤယၤစ့ၢ်ကီး, ပမ့ၢ်ဒၣ် ဒ်စီၤစီလူး မ့တမ့ၢ် အဲရ့း အသိး, ပတထံၣ်လီၤပသးဘၣ်န့ၣ်လီၤ. လၢကစၢ်ယ့ၣ်ရှူးအဂီၢ် ပဝဲနၤယၤကိးဂၤဒဲးန့ၣ် ပမ့ၢ်ပှၤအကြၢး အဘၣ်နီၢ်နီၢ်န့ၣ်လီၤ.
