ပှၤတ့ခဲၣ်တၢ်ဂီၤဖိ ဒူၣ်ကး (Degas) တဂၤ ဒိးန့ၢ် မဲာ်ချံတၢ်ဆါန့ၣ် ယံာ်တ့ၢ်လံလၢ အနံၣ် ယဲၢ်ဆံ, ဒီးတၢ်ကထံၣ်ဖျါဟီၣ်ခိၣ်ဝါအကျိၤတဖၣ်န့ၣ် ညီဒိၣ်ဝဲလၢအဂီၢ်အဃိ, လၢကသံၣ်ခဲၣ်တၢ်တဖၣ်အလီၢ်န့ၣ် ဘၣ်စူးကါက့ၤဝဲ နီၣ်ခဲၣ်ဘိလၢအိၣ်ဒီးအလွဲၢ် န့ၣ်လီၤ. ပှၤဘၣ်ပာ်လီၤ နီၣ်ခဲၣ်ဘိတဖၣ်လၢ ရ့နွါ (Renoir) အစုမုၢ်စုနၢတဖၣ် အကဆူး, မ့ၢ်လၢစုခီၣ်ကမဲာ်ဆၢညိးအတၢ်ဆါ မၤက့ၣ် အစုမုၢ်စုနၢတဖၣ်အဃိ န့ၣ်လီၤ. ခီဖျိလၢတၢ်ကွဲးကါယါဘျါအသးအဃိ, မထံး(စ) (Matisse) တဂၤ ဟူးတသ့ဂဲၤတသ့ဝဲဒၣ်အဃိ, က့ၤဝဲဆူ ခီလ့ၣ်ကၠိ, ဒီးမၢဝဲ ပှၤလၢအမၤစၢၤအီၤတဖၣ်လၢ ကဘျးစဲထီန့ၢ်အီၤ စးခိက့ဖိတဖၣ်လၢအိၣ်ဒီးအလွဲၢ်, လၢလံာ်က့ဖးလဲၢ်တဘ့ၣ် အလိၤ, ဖဲတၢ်ဒူၣ်အကပၤန့ၣ်လီၤ. တၢ်ဂ့ၢ်တမံၤစူၢ်စူၢ်အပူၤ, တၢ်လၢအပိာ်ထွဲကဲထီၣ် အသးန့ၣ် မ့ၢ်တၢ်လဲၤခီဖျိမၤနၢၤတၢ်တဖၣ် လၢအအိၣ်ပှဲၤဒီးတၢ်သ့ဒုးအိၣ်ကဲထီၣ်တၢ်, လၢအမ့ၢ်- ဒူၣ်ကး အတၢ်ဂီၤတ့ခဲၣ် “ပှၤဂဲၤကလံာ်တၢ်ဖိလါအဲးတဖၣ်” (Blue Dancers), ရ့နွါ အတၢ်ဂီၤတ့ခဲၣ် “ပိာ်မုၣ်ဖိတဖၣ်ဖဲဖံၣ်အဲနိၣ်” (Girls at the Piano), မထံး(စ) အတၢ်ဂီၤတ့ခဲၣ် “စီၤပၢ်အတၢ်သးအုးတဖၣ်” (Sorrows of the King), ဒီးတၢ်ဂီၤတ့ခဲၣ်အဂ့ၤဒိၣ်ဒိၣ်ကလဲာ်အဂုၤအဂၤတဖၣ်န့ၣ်လီၤ.

ဒ်န့ၣ်အသိး, လၢသီန့ၣ် စီၤပီလူး စးထီၣ်ဝဲ အတၢ်သးခုကစီၣ်အတၢ်လဲၤန့ၣ် တတိာ်ပာ်လဲၤဝဲဆူ ကလၤတံ အဝ့ၢ်န့ၣ်ဘၣ်. ကလၤ ၄:၁၃ ပာ်ဖျါဝဲလၢ တၢ်ဆိးက့ တၢ်ဆါတမံၤမၤဆူၣ်အီၤ ဒ်သိးကလဲၤဝဲဆူ ကလၤတံန့ၣ်လီၤ. လၢဝ့ၢ် ကလၤတံ န့ၣ် ဖျါလၢ စီၤပီလူး တူၢ်ဘၣ် မူခိၣ်ကလံၤသီၣ်ဂီၤလၢအလီၤဆီ, ဒီးလၢတၢ်ဆူးတၢ်ဆါအပူၤဒၣ်လဲာ် စးထီၣ်စံၣ်တဲာ်တဲလီၤ တၢ်သးခုကစီၣ်န့ၣ်လီၤ. လၢတၢ်တဆိကမိၣ်အပူၤန့ၣ်, ကလၤ ၃:၂-၅ ပာ်ဖျါဝဲ, သးစီဆှံမၤတၢ်လီၤလးတဖၣ် ခီဖျိစီၤပီလူး, ဒီးကလၤတံ အတၢ်အိၣ်ဖှိၣ် အိၣ်ဖျဲၣ်ထီၣ်ဝဲဒၣ်န့ၣ်လီၤ. မ့တမ့ၢ်ဘၣ်လၢ စီၤပီလူး ဆိးက့အဃိဘၣ် န့ၣ်ဒီး, တမ့ၢ်လၢတၢ်လီၤလိၢ်လီၤလးအံၤ လ့ၤတက့ၤ ကဲထီၣ်ဝဲတသ့ဘၣ်န့ၣ်လီၤ.

မ့ၢ်နဘၣ်ကွၢ်ဆၢၣ်မဲာ်ဒီး တၢ်မၤကွၢ်မနုၤတမံၤလဲၣ်, ဒီးတၢ်မၤကွၢ်အံၤ ဆီတလဲ နတၢ်အိၣ်မူဒ်လဲၣ်. ခီဖျိလၢတၢ်ပညိၣ်ပာ်ဖှိၣ်ကွၢ်ကဒါက့ၤ တၤလၣ်လၢ ယွၤဟ့ၣ်လီၤဝဲတဖၣ်န့ၣ်ဒီး, နၤစ့ၢ်ကီးနကထံၣ်န့ၢ်နဲလၢ ယွၤဟဲစိာ်န့ၢ်နၤ တၢ်အဃံအလၤ သ့ဝဲဒၣ် ခီဖျိလၢတၢ်ဆိးက့တၢ်ဂံၢ်ဘါစၢ်အပူၤန့ၣ်လီၤ.