ကီၢ် အမဲရကၤ, ဝံစိာ်တီဆှၢဝဲၤကျိၤ ပာ်ဖျါထီၣ်ဝဲဒၣ်လၢ ၂၀၂၁ အတီၢ်ပူၤ, ကဘီယူၤခီပနံာ်တဖၣ် သုးကျဲၤကမၣ် ထၢၣ်အဖျၢၣ်ခံကကွဲၢ်န့ၣ်လီၤ. တၢ်လၢပကဘၣ်စံးဘျုးဝဲန့ၣ် ထၢၣ်အါဖျၢၣ် ဟဲတုၤစဲၤခံ, မ့တမ့ၢ် လီၤမၢ်ဒၣ်ထဲ တၢ်ဆၢကတီၢ်တစိၢ်တလီၢ်ဖိဧိၤန့ၣ်လီၤ. ဘၣ်ဆၣ်, ထၢၣ်အဖျၢၣ်လၢအကထိတဖၣ်န့ၣ် လီၤမၢ်ကွံာ်ဝဲဒၣ်တစိၤသးန့ၣ်လီၤ. မ့ၢ်လၢ တၢ်ဘျးစဲထီ GPS စဲးဧိၤဖီဧိၤဃုာ်ဒီးတၢ်ပိးတၢ်လီတဖၣ်အဃိ, ထၢၣ်လၢကဘီယူၤခီပနံာ် ပျၢ်စုပျၢ်ခီၣ်အီၤတဖၣ်န့ၣ် တၢ်လူၤပိာ်ထွဲဃုထံၣ်က့ၤသ့ဝဲဒၣ်န့ၣ်လီၤ. လၢတၢ်လူၤပိာ်ထွဲက့ၤ ပိးလီလၢအကါဒိၣ်တဖၣ်အခံအဂီၢ်န့ၣ် တၢ်ဘၣ်ယိၣ်အလီၢ်အိၣ်ဝဲလၢ ပှၤဘၣ်မူဘၣ်ဒါတဖၣ်န့ၣ် ပကနာ်န့ၢ်အီၤတသ့ဘၣ်န့ၣ်လီၤ.

ပှၤအံၣ်စရ့လးဖိတဖၣ် ဘၣ်ယိၣ်ဝဲလၢ ကစၢ်ယွၤ ကပျၢ်စုပျၢ်ခီၣ်အဝဲသ့ၣ်န့ၣ်လီၤ. ပှၤဂီၢ်မုၢ်တဖၣ် ကနုာ်လီၤဝဲဒၣ်ဆူ ထံသီကီၢ်သီအဂီၢ် အိၣ်ကတဲာ်ကတီၤအသးအကတီၢ်, စီၤမိၤရှ့ စံးဘၣ်တၢ်ကစီၣ်လၢ အမၤဘၣ်ယိၣ်ပှၤဂီၢ်မုၢ်တဖၣ်န့ၣ်, မ့ၢ်ဒၣ်တၢ်ဟံးစုနဲၣ်ကျဲအဝဲသ့ၣ် တသ့လၢၤဘၣ်အဂ့ၢ်န့ၣ်လီၤ. ၅ မိၤ ၃၁:၂ အပူၤန့ၣ် စီၤမိၤရှ့ တဲနၢ်ပၢၢ်ပှၤဂီၢ်မုၢ်လၢ အဝဲအသးပှၢ်လံ, ဒီးစံးဝဲဒၣ် “ယကကဲထီၣ်သုခိၣ်သုနၢ်ဆူညါန့ၣ် ယမၤတသ့လၢၤဘၣ်” န့ၣ်လီၤ. ဖျါလၢပှၤဂီၢ်မုၢ်တဖၣ် ဖုးသံပျီၢ်သံဘၣ်အသးန့ၣ်လီၤ. စီၤမိၤရှ့ မ့ၢ်တၢ်ပနီၣ်လၢ ယွၤအိၣ်ဒီးအပှၤဂီၢ်မုၢ်, ဒီးဟ့ၣ်လီၤ အတၢ်စံးတၢ်ကတိၤတဖၣ် ခီဖျိလၢစီၤမိၤရှ့န့ၣ်လီၤ. ခဲကနံၣ်အံၤ, မ့ၢ်ယွၤကသးပ့ၢ်နီၣ်ကွံာ်အဝဲသ့ၣ်ဧါ. မ့ၢ်ယွၤကပျၢ်စုပျၢ်ခီၣ် အပှၤဂီၢ်မုၢ်တဖၣ် ဖဲပှၢ်မုၢ်ကနၢအံၤန့ၣ်ဧါ.

အဆၢဖိ ၆ န့ၣ် စီၤမိၤရှ့ စံးဘၣ်ပှၤဂီၢ်မုၢ်လၢ “ဘၣ်ယိၣ်တၢ်တဂ့ၤ. ဒီးပျံၤအီၤတဂ့ၤ. အဂ့ၢ်ဒ်အံၤ, ယွၤနကစၢ်မ့ၢ် ပှၤလၢအလဲၤတၢ်ဒီးနၤလီၤ. တညိကွံာ်ဘၣ်နၤဘၣ်, ဒီးတလဲၤသဒၣ်ဘၣ်နၤဘၣ်” န့ၣ်လီၤ. စီၤမိၤရှ့ အၢၣ်လီၤဝဲလၢ ကစၢ်ယွၤ ကအိၣ်ဒီးအပှၤဂီၢ်မုၢ်ထီဘိ, ဒီးမၤလီၤတံၢ်ဝဲလၢ ကစၢ်ယွၤတပျၢ်စုပျၢ်ခီၣ်အပှၤဂီၢ်မုၢ်နီတစုဘၣ်န့ၣ်လီၤ. ခီဖျိလၢ ကစၢ်ယ့ၣ်ရှူးန့ၣ် ကစၢ်ယွၤဟ့ၣ်လီၤပှၤ တၢ်အၢၣ်လီၤတမံၤဃီ, တၢ်အၢၣ်လီၤလၢအအိၣ်ဂၢၢ်ဆိးကျၢၤ, ဒီးတၢ်အၢၣ်လီၤလၢအတဟးဂီၤဘၣ်န့ၣ်လီၤ. မး ၂၈:၂၀ ပာ်ဖျါဝဲဒၣ်လၢ ကစၢ်ခရံာ်ကအိၣ်ဒီးပှၤ “တုၤတၢ်အစိၤကတၢၢ်” န့ၣ်လီၤ. တမ့ၢ်လၢယွၤကပျၢ်စုပျၢ်ခီၣ်ပှၤနီတစု, နီတစုဘၣ်.