ယသူၣ်ကိၢ်သးဂီၤအဃိ, ယပညိၣ်ပာ်ဖှိၣ်ယသးလၢ တၢ်မၤအတၢ်တိာ်ကျဲၤတမံၤန့ၣ် တန့ၢ်ဝဲဘၣ်. ယတၢ်ရဲၣ်တၢ်ကျဲၤတမံၤအံၤ ယဘၣ်ယိၣ်လၢ တၢ်မၤတကဲထီၣ်လိၣ်ထီၣ်ဘၣ်န့ၣ်လီၤ. ယတၢ်သူၣ်ကိၢ်သးဂီၤန့ၣ် အိၣ်ဟဲကဲထီၣ်အသး ခီဖျိလၢတၢ်ပာ်ထီၣ်ထီ ယသးန့ၣ်လီၤ. ယနာ်ယဲလၢ ယတၢ်ပာ်ပနီၣ်တၢ်ဆၢကတီၢ်, ဒီးတၢ်တိာ်ကျဲၤတဖၣ်န့ၣ် မ့ၢ်ဝဲတၢ်အဂ့ၤကတၢၢ်န့ၣ်လီၤ. လၢတၢ်န့ၣ်အဃိ, ယအဲၣ်ဒိးစးထီၣ်မၤအီၤ ပူၤဖျဲးဒီးတၢ်မၤတံာ်တာ်န့ၣ်လီၤ. ဘၣ်ဆၣ်, လၢယတၢ်ဆိကမိၣ်တဖၣ်အပူၤန့ၣ် တၢ်သံကွၢ်တမံၤ ဟဲထီၣ်ဝဲလၢ- “နတၢ်တိာ်ကျဲၤတဖၣ်န့ၣ် ဘၣ်ကမ့ၢ်ယွၤအတၢ်တိာ်ကျဲၤတဖၣ်ဧါ” န့ၣ်လီၤ.
ယတၢ်တိာ်ကျဲၤန့ၣ် တမ့ၢ်တၢ်ဂ့ၢ်ကီဘၣ်. ဘၣ်ဃးဒီးပတၢ်ဆၢကတီၢ်, ခွဲးယာ်တဖၣ်, ဒီးစုလီၢ်ခီၣ်ခိၣ်ဂံၢ်ခီၣ်ထံးတဖၣ်န့ၣ် ယွၤမၤလိာ်ပှၤလၢ ပကမ့ၢ် ပှၤပၢၤတၢ်ဖိလၢအကူၣ်တၢ်သ့တဖၣ်န့ၣ်လီၤ. မ့မ့ၢ်တၢ်ပာ်ဒိၣ်ပာ်ထီယသးန့ၣ် မ့ၢ်ဝဲဒၣ်တၢ်ဂ့ၢ်ကီန့ၣ်လီၤ. သးလၢအသ့ၣ်ညါနၢ်ပၢၢ် တၢ်ရဲၣ်တၢ်ကျဲၤတဖၣ်, ဒီးတၢ်ကဘၣ်ကဲထီၣ်ဝဲ ဒ်ယအဲၣ်ဒိးဝဲအသိး, တၢ်ပာ်ထီၣ်ထီသးအံၤ အိၣ်ဂၢၢ်ကျၢၤပာ်ဝဲလၢယသးပူၤန့ၣ်လီၤ. ယသးတအိၣ်လၢ ယွၤအတၢ်တိာ်ကျဲၤတဖၣ်, ဒီးယွၤအဲၣ်ဒိး ယတၢ်တိာ်ကျဲၤတဖၣ် ကဲထီၣ်လိၣ်ထီၣ်ဝဲဒၣ်ဒ်လဲၣ်န့ၣ် ယတဆိကမိၣ်ဘၣ်.
ယၤ ၄:၁၅ န့ၣ် စီၤယၤကိာ် ဟ့ၣ်ဂံၢ်ဟ့ၣ်ဘါပှၤလၢ, “မ့ၢ်ဘၣ်ကစၢ်အသးဒီး ပမ့ၢ်မူဒီး, ပကမၤတၢ်ဒ်အံၤဒ်နုၤ” န့ၣ်လီၤ. ပကူၣ်ကျဲၤတၢ်န့ၣ် တဘၣ်မ့ၢ်ဝဲဒ် သးလၢအမၤဆူၣ်တၢ်အပူၤ, သးလၢအဆိကမိၣ် ပသ့ၣ်ညါတၢ်ကိးမံၤဒဲး, ဒီးသးလၢအပၢဆှၢန့ၢ်ပတၢ်အိၣ်မူအပူၤန့ၣ်ဘၣ်. ကဘၣ်မ့ၢ်ဝဲဒ် သးလၢအဟ့ၣ်လီၤအးလီၤအသးဆူ ယွၤအတၢ်စိကမီၤအလၢအပှဲၤ, ဒီးလၢတၢ်ကူၣ်သ့အပူၤန့ၣ်လီၤ. နီၢ်နီၢ်န့ၣ်, အဆၢဖိ ၁၄ စံးဘၣ်ပှၤလၢ “တၢ်ကမၤအသး ခဲဂီၤတနံၤန့ၣ်, သုတသ့ၣ်ညါဘၣ်. မ့ၢ်တၢ်ဘှ့ၣ်လၢအအိၣ်ဖျါတစိၢ်ဖိ, ဒီးလၢအလီၢ်ခံန့ၣ်ဒံကွံာ်ဝဲ” န့ၣ်လီၤ. ဒ်ပမ့ၢ်ပှၤဟီၣ်ခိၣ်ဖိတဖၣ်အသိး, ပမၤတၢ်လၢပနီၢ်ကစၢ်ဒၣ်ဝဲတသ့, ဒီးပမ့ၢ်ပှၤဂံၢ်စၢ်ဘါစၢ်တဖၣ်န့ၣ်လီၤ.
ကယဲၢ်တၢ်ကိးမံၤဒဲးလၢပတၢ်အိၣ်မူအပူၤ, ပှၤလၢအန့ၢ်စိန့ၢ်ကမီၤ, ဒီးဒိၣ်စိဒိၣ်ကမီၤဝဲန့ၣ် မ့ၢ်ဒၣ်ထဲယွၤတဂၤဧိၤန့ၣ်လီၤ, တအိၣ်လၢပစုပူၤန့ၣ်ဘၣ်. ခီဖျိလၢကစၢ်ယွၤအကလုၢ်ကထါတဖၣ်, ဒီးပှၤကညီတဖၣ်, တၢ်စုလီၢ်ခီၣ်ခိၣ်ဂံၢ်ထံးတဖၣ်, ဒီးတၢ်အိၣ်အသးတဖၣ်အပူၤန့ၣ် ယွၤပျဲပလဲၤခီဖျိမုၢ်နံၤမုၢ်သီတနံၤဘၣ်တနံၤ, နဲၣ်လိပှၤ ဒ်သိး ပကအိၣ်မူဟ့ၣ်လီၤအးလီၤပသး, လၢအတၢ်ဘၣ်သး, ဒီးအကျဲတဖၣ်အပူၤန့ၣ်လီၤ. ပတၢ်တိာ်ကျဲၤတဖၣ်န့ၣ် တဘၣ်အိၣ်ဟဲခီဖျိလၢ တၢ်လူၤပိာ်ထွဲ ပနီၢ်ကစၢ်အသးဒၣ်ဝဲဘၣ်. မ့မ့ၢ်ကဘၣ်အိၣ်ဟဲခီဖျိလၢ တၢ်လူၤပိာ်ထွဲကစၢ်ယွၤအကျဲန့ၣ်လီၤ.
