ဒဲ လးစ် (Dan Les), အသးသမူဒီစိၤ မ့ၢ်ပှၤတ့သပၢၤတဂၤ, ဒီးတ့ဝဲ လီခီကိ, ဒီးတၢ်ဂီၤစိးပျၤ အဃံအလၤတဖၣ်န့ၣ်လီၤ. ပိးလီလၢအတ့ဝဲတဖၣ်န့ၣ် မၤန့ၢ်ခိၣ်ဖးလၤကပီၤ, ဒီးတၢ်လၢအထိၣ်ဟူးထိၣ်ဂဲၤထီၣ် အတၢ်ဘၣ်တ့တဖၣ်န့ၣ် မ့ၢ်ဝ့ၢ်ဖိလၢ အိၣ်ဆိးဝဲဒၣ်, ဖဲ ရိၣ်မ့နံယါထံကီၢ်အပူၤန့ၣ်လီၤ. အဝဲမၤလိန့ၢ် စုသ့အတၢ်မၤတမံၤအံၤ လၢအပၢ်အအိၣ်, ဒီးပာ်ဖျါထီၣ် အတၢ်ဖံးတၢ်မၤအဂ့ၢ်လၢ “[ကပံာ်န့ၣ်] ကဘၣ်တၢ်ပၣ်အီၤ တၢ်ဆၢကတီၢ်ဒီတနံၣ် လၢတၢ်ချၢ, ဒ်သိးကကဲထီၣ်အသံးအစီ, မူခိၣ်ထံကဘၣ်လီၤလၢအလိၤ, တၢ်ကဘၣ်ပာ်ခုၣ်လီၤသကၤအီၤ, ဒီးမၤလၢၤမၤဃ့ထီၣ်က့ၤအီၤန့ၣ်လီၤ. ဒ်သိးနကတ့န့ၢ်က့ၢ်ဂီၤ, ဒီးနစုကကလၢၢ်ဘၣ်ဝဲလၢ ကပံာ်န့ၣ်တၢ်ဒိကနၣ်နကလုၢ်န့ၣ်လီၤ.”

ဖဲကပံာ် “ဒိကနၣ်တၢ်” န့ၣ်ဒီး, တၢ်ကမၤအသးမနုၤတမံၤလဲၣ်. ကလူၤပိာ်ထွဲ, ဒ်ပှၤတ့သပၢၤတဂၤ အတၢ်တ့ဒုးအိၣ်ထီၣ်က့ၢ်ဂီၤအသိးန့ၣ်လီၤ. ဖဲဝံယံးရမံယၤ လဲၤဟးဝဲဆူ ပှၤတ့သပၢၤတဂၤအဟံၣ်အကတီၢ်, ထံၣ်ထွဲသ့ၣ်ညါဝဲဒၣ် တၢ်ဂ့ၢ်အံၤန့ၣ်လီၤ. ယံး ၁၈:၄ ပာ်ဖျါဝဲလၢ ဝံခိးကွၢ်ဝဲ ပှၤတ့သပၢၤတဂၤအံၤ ကျဲးစၢးတ့ဝဲဒၣ်သပၢၤတဖျၢၣ်, ဒီးအကတၢၢ်န့ၣ် တ့ဒုးအိၣ်ထီၣ် သပၢၤက့ၢ်ဂီၤအသီတမံၤန့ၣ်လီၤ. အဆၢဖိ ၆ န့ၣ် ကစၢ်ယွၤ စံးဘၣ်တဲဘၣ် ဝံယံးရမံယၤလၢ “ဒ်ကပံာ်အိၣ်ဝဲလၢ ပှၤတ့သပၢၤအစုပူၤအသိးန့ၣ် သုအိၣ်ဝဲလၢယစုပူၤ ဒ်န့ၣ်အသိး” န့ၣ်လီၤ.

ယွၤ အိၣ်ဒီးအတၢ်သ့တၢ်ဘၣ်လၢ ကသူၣ်ထီၣ်ပှၤ, ဒီးမၤလီၤပှီၢ်ပှၤဘၣ်ဆၣ်, အဆၢဖိ ၇-၁၀ စံးဘၣ်ပှၤ, အတၢ်ပညိၣ်အဒိၣ်ကတၢၢ်နီၢ်နီၢ်န့ၣ် တမ့ၢ်လၢ ကဒိၣ်စိဒိၣ်ကမီၤပှၤ, မ့တမ့ၢ် ကမၤဟးဂီၤပှၤဘၣ်. လၢတၢ်အံၤအလီၢ်န့ၣ်, ယွၤမ့ၢ် ပှၤစုသ့လၢအမၤတၢ်သ့စဲၣ်နီၤတဂၤ, ဒီးသ့ၣ်ညါပဲာ်ဖးဝဲ တၢ်လၢအတဂိၢ်တသီၣ်တဖၣ်, ဒီးတ့ဂ့ၤဝဲ ကပံာ်တမံၤဃီအံၤဆူ တၢ်အဃံအလၤ, ဒီးကဲဘျုးကဲဖှိၣ်တမံၤ သ့ဝဲဒၣ်န့ၣ်လီၤ.

ကပံာ်လၢအဒိကနၣ်တၢ်န့ၣ် တၢ်ကတဲအီၤအဂ့ၢ် အလီၢ်တအိၣ်အါအါဘၣ်. ဖဲတၢ်ဆဲးတိၢ်အီၤန့ၣ်ဒီး, လဲၤဝဲဒၣ် ကျိၤကျဲလၢတၢ်ဘၣ်ပှၤတ့သပၢၤအသးန့ၣ်လီၤ. ဖဲတၢ်တ့ဒုးအိၣ်ထီၣ်က့ၢ်ဂီၤအကတီၢ်, အိၣ်ဂၢၢ်ကျၢၤဝဲ ဒ်တ့ပာ်အီၤအသိးန့ၣ်လီၤ. တၢ်သံကွၢ်လၢပဂီၢ်န့ၣ်- ဒ်သိးကစၢ်ယွၤ ကတ့ဒုးအိၣ်ထီၣ် ပတၢ်အိၣ်မူတဖၣ်ဆူ တၢ်အိၣ်မူလၢအဘၣ်ယွၤအသး ကသ့ကန့ၢ်ဝဲအဂီၢ်, ဒ် ၁ ပ့း ၅:၆ ပာ်ဖျါဝဲအသိး, မ့ၢ်ပသူၣ်ဆူၣ်သးဆူၣ် “ဆီၣ်လီၤပသး လၢယွၤအစုလီၤလိၢ်လီၤလးအဖီလာ်ဧါ” န့ၣ်လီၤ.