ယပၢ်စိာ်ဖး အလံာ်စီဆှံလၢအအဲၣ်ဘၣ်ဝဲတဘ့ၣ်န့ၣ် ကအိၣ်လၢ အနံၣ်သၢဆံဘျဲၣ် တုၤဒၣ်လဲာ် တၢ်စၢဆးဃာ်အီၤန့ၣ် နီၤဖးအသးခံခီန့ၣ်လီၤ. ဒ်သိးတၢ်ကဘှီဂ့ၤထီၣ်အီၤအဂီၢ်, ပလဲၤစိာ်ဆူ ၦၤစၢဆးက့ၤလံာ်စဲၣ်နီၤတဂၤအအိၣ်န့ၣ်ဒီး, ၦၤစုသ့တဂၤအံၤ အဲၣ်ဒိးသ့ၣ်ညါဝဲလၢ တၢ်လၢအမၤလီၤဆီ လံာ်တဘ့ၣ်အံၤဒိၣ်ဒိၣ်ကလဲာ်န့ၣ် ကမ့ၢ်တၢ်မနုၤလဲၣ်န့ၣ်လီၤ. လံာ်တဘ့ၣ်အံၤ တမ့ၢ်ပီးလီလုၢ်ဒိၣ်ၦ့ၤဒိၣ်လၢပျၢၤန့ၣ်ဘၣ်, ဒီးလံာ်ကဘျံးပၤတဖၣ်န့ၣ် အိၣ်ၦဲၤဝဲဒီးတၢ်ကွဲးနီၢ်လၢစုတဖၣ်န့ၣ်လီၤ. အတၢ်သံကွၢ်ဘၣ်ဃးဒီးလံာ်စီဆှံအဂ့ၢ်န့ၣ် ဒုးအိၣ်ထီၣ်ခွဲးယာ်လၢ ပဟံၣ်ဖိဃီဖိတဖၣ်ကဟ့ၣ်ခီနီၤလီၤ တၢ်သးခုကစီၣ်, ဒီးဃ့ထုကဖၣ်သကိးတၢ်ဒီးအီၤအဂီၢ်န့ၣ်လီၤ.
မ့ၢ်ဝဲလီၤႇ လံာ်စီဆှံ န့ၣ်အကါဒိၣ်န့ၢ်ဒံး ဖိလံၤစၢၤသွဲၣ်အတၢ်န့ၢ်သါတမံၤ, မ့တမ့ၢ် တၢ်ကယၢကယဲအဃံအလၤတမံၤဧိၤဘၣ်. အလံာ်ကဘျံးပၤတဖၣ်န့ၣ် ယိၤ ၆:၆၈ ပာ်ဖျါဝဲလၢ “တၢ်မူအထူအယိာ်အတၢ်ကတိၤ,” ဒ်ကစၢ်ယွၤ လီၣ်ဖျါထီၣ်အသးဆူ ပှၤဟီၣ်ခိၣ်ဖိခီဖျိလၢအဖိခွါန့ၣ်လီၤ. လံာ်တၢ်သးခုကစီၣ် လံာ်ယိၤဟၣ် ၁:၁ န့ၣ် ဘၣ်တၢ်အိးထီၣ်အီၤလၢ ကစၢ်ယ့ၣ်ၡူး မ့ၢ် “တၢ်ကလုၢ်အိၣ်ဝဲဒီးယွၤႇ …ဒီးတၢ်ကလုၢ်န့ၣ်မ့ၢ်ယွၤ” န့ၣ်လီၤ. အဆၢဖိ ၁၄ ပာ်ဖျါဝဲ ကစၢ်ယ့ၣ်ရှူး ဒ်အမ့ၢ် “တၢ်ကလုၢ်အိၣ်ဝဲဆိးဝဲလၢပကျါ” န့ၣ်လီၤ. လံာ်စီဆှံအပူၤ, ပထံၣ်ဘၣ်တဖၣ်န့ၣ် တမ့ၢ်ထဲ ကစၢ်ယ့ၣ်ၡူး အသးသမူအဂ့ၢ်န့ၣ်ဘၣ်. ကစၢ်ယွၤ အတၢ်ဟူးတၢ်ဂဲၤ တစိၤဘၣ်တစိၤ, စးထီၣ်လၢတၢ်ဘၣ်တ့, တုၤအကတၢၢ် တၢ်အုၣ်က့ၤခီၣ်က့ၤအကတီၢ်န့ၣ်လီၤ.
ဖဲကစၢ်ယ့ၣ်ၡူး အိၣ်မူအိၣ်ဂဲၤလၢဟီၣ်ခိၣ်ချၢအကတီၢ်, ယိၤ ၆:၆၃ န့ၣ် စံးကတိၤဝဲတၢ်ကတိၤတဖၣ်န့ၣ် မ့ၢ်ဝဲ “သးဒီးတၢ်မူ” အဂ့ၢ်န့ၣ်လီၤ.အဆၢဖိ ၆၆ ပာ်ဖျါဝဲလၢ ဖဲကစၢ်ယ့ၣ်ရှူး ဟ့ၣ် တၢ်သိၣ်လိအကီအခဲတဖၣ်န့ၣ်ဒီး, ၦၤဂီၢ်မုၢ်တဖၣ် ကဒူးကဒ့ၣ်, ဒီးပှၤပိာ်အခံအါတက့ၢ်န့ၣ် “တပိာ်လၢၤဘၣ်အခံဘၣ်. ဒီးက့ၤကဒါက့ၤဆူ အလီၢ်ခံတကူၢ်သ့ၣ်” ဘၣ်ဆၣ်, အပျဲၢ်အဘီၣ်တဖၣ်န့ၣ် ဃုထၢဝဲလၢ ကအိၣ်ဆိးဝဲလၢအကစၢ်န့ၣ်လီၤ. တၢ်ကတိၤအဂုၤအဂၤတဖၣ်န့ၣ် မၤမံသူၣ်မံသးအဝဲသ့ၣ်တသ့ဘၣ်န့ၣ် အပျဲၢ်အဘီၣ်တဖၣ် သ့ၣ်ညါနၢ်ပၢၢ်ဝဲဒၣ်န့ၣ်လီၤ. ဘၣ်ဃးဒီးအလံာ်စီဆှံန့ၣ် ယပၢ်အသးကလၢၢ်ဘၣ်ဝဲဒ်သိးအံၤန့ၣ်လီၤ. လၢအတၢ်အိၣ်မူအပူၤန့ၣ် ဘၣ်လဲၤခီဖျိဝဲ ကစၢၢ်ကလိ, ဒီးတြီၤလာ်တဖၣ်အါမးအကတီၢ်, ကစၢ်ယွၤ ကတဲာ်ကတီၤန့ၢ်အီၤ တၢ်မုၢ်လၢ်, တၢ်နဲၣ်ကျဲႇ တၢ်သူၣ်မံသးမုာ်, ဒီးတၢ်မ့ၢ်တၢ်တီတဖၣ် ခီဖျိလၢအကလုၢ်ကထါန့ၣ်လီၤ.
