လၢ မ့(န) (Maine) အမဲရကၤခိခိၣ်တကပၤန့ၣ်, ပှၤဃိးနံၣ် ပိာ်ခွါဖိသၣ်ခံဂၤ, ကူသိးဝဲ ပှၤမၤပနံာ်ကၤတၢ်မၤအကူအသိးလီၤဆီဆူ ကၠိ, ဒ်အမ့ၢ် အနီၤကစၢ်ဒၣ်ဝဲ အတၢ်ပနီၣ် ဖဲ မုၢ်ပျဲၤနံၤကိးနွံဒဲးန့ၣ်လီၤ. တယံာ်ဘၣ်န့ၣ်, မ့ၢ်လၢ အတံၤသကိးကၠိဖိတဖၣ်, ဒီးကၠိအၦၤမၤတၢ်ဖိတဖၣ် ဟဲကူကၤဝဲဂ့ၤဂ့ၤဘၣ်ဘၣ်အဃိ, “ကူသိးဂ့ၤဂ့ၤ မုၢ်ပျဲၤနံၤ” (Dap- per Wednesday) ကဲထီၣ် မုၢ်နံၤတနံၤလၢ ၦၤကိးဂၤဘၣ်သူၣ်ဘၣ်သးအဒိၣ်ကတၢၢ်န့ၣ်လီၤ. ပှၤလၢအစးထီၣ်ကူသိးတၢ် ကၠ့(စ) (James) တဂၤနၢ်ဟူဝဲ တၢ်စံးကတိၤပတြၢၤအီၤန့ၣ် ဘၣ်သူၣ်ဘၣ်သးဒိၣ်မးန့ၣ်လီၤ. “တၢ်အံၤ မၤမုာ်ယသးဒိၣ်မး” န့ၣ်လီၤ. မုၢ်ပျဲၤနံၤ အတၢ်ကူတၢ်သိးအံၤ ကဲထီၣ် တၢ်ပာ်လီၤဆီ ဖိသၣ်တဖၣ်, ဒ်တၢ်ပာ်ကဖၢလၢအသးလၢ အကစၢ်ဒၣ်ဝဲအကၠိအဂီၢ်န့ၣ်လီၤ.

ပနီၢ်သးအတၢ်ကူတၢ်သိးန့ၣ် ကမ့ၢ်တၢ်လၢ အမၤလီၤဆီၦၤ, ဒ်ယွၤအတၢ်, ဒီးကမၤမုာ်ထီၣ်ပသးစ့ၢ်ကီးန့ၣ်လီၤ. ယၡါ ၆၁:၁ဝ အပူၤန့ၣ် ဝံယၡါယၤ ပာ်ဖျါဝဲလၢႇ “ယသးသူၣ်ဖှံသးညီဒိၣ်မးလၢ ယွၤအပူၤလီၤ. မ်ယသးပိၢ်လၢ ယကစၢ်အပူၤတက့ၢ်. အဂ့ၢ်ဒ်အံၤႇ ဒုးသိးလံယၤလၢ တၢ်အုၣ်က့ၤခီၣ်က့ၤအဆ့ႇ ဒီးဒုးသိးလံယၤလၢ တၢ်တီတၢ်လိၤအဆ့ဖးထီန့ၣ် ဒ်တလးမူးပိာ်ခွါကယၢအသးဒီး အခိၣ်သလုးဒ်ၦၤလုၢ်တၢ်အဒိၣ်အသိးန့ၣ်, ဒီးဒ်တလးမူးပိာ်မုၣ်ကယၢအသးလၢ အကယၢကယဲအသိးန့ၣ်လီၤ.”

ၦၤအံၣ်စရ့လးဖိတဖၣ် ဘၣ်တၢ်စိာ်မၢကဲကုၢ်အကတီၢ်, အဝဲသ့ၣ် နီၢ်သးဒီးနီၢ်ခိ အတၢ်ကူတၢ်သိး, တၢ်ကံးညာ်တဖၣ် လီၤလံၤႇ ဒီးဟးဂီၤကွံာ်လံန့ၣ်လီၤ. အဆၢဖိ ၃ န့ၣ် ပှၤဂီၢ်မုၢ်တဖၣ်အဂီၢ်, ဝံယၡါယၤ ဟ့ၣ်ထီၣ် တၢ်အၢၣ်လီၤ အိၣ်ၦဲၤဒီးတၢ်မုၢ်လၢ်, ဒီးစံးဝဲဒၣ် ယွၤအသးစီဆှံ “ကပာ်လီၤတၢ်လၢၦၤအသူၣ်အုးအသးအုးလၢစံယိၣ်အပူၤအဂီၢ်, ဒ်သိးယကဟ့ၣ်လီၤအခိၣ်သလုးလၢဖၣ်ဆါအလီၢ်, တၢ်သးခုအသိလၢတၢ်သးအုးအလီၢ်, တၢ်စံးထီၣ်ပတြၢၤအဆ့လၢ တၢ်သးဃၢအလီၢ်န့ၣ်လီၤ.”

တုၤမုၢ်မဆါတနံၤအံၤန့ၣ် တၢ်အၢၣ်လီၤတမံၤဃီအံၤ အိၣ်ဂၢၢ်ဆိးကျၢၤဒံးအဖၢမုၢ်လၢ ယွၤအၦၤဂီၢ်မုၢ်အဂီၢ်န့ၣ်လီၤ. လူၤ ၂၄:၄၉ အပူၤန့ၣ် ကစၢ်ယ့ၣ်ၡူး စံးဝဲဒၣ် ခီဖျိလၢသးစီဆှံန့ၣ် ပကဘၣ်တၢ် “သိးထီၣ်လၢ တၢ်စိတၢ်ကမီၤလၢထး” န့ၣ်လီၤ. ကလီး ၃:၁၂ စံးဘၣ်ပှၤ, ကစၢ်ခရံာ် ဟ့ၣ်လီၤၦၤ တၢ်ကူတၢ်သိးလၢအမ့ၢ် “တၢ်သးကညီၤႇ တၢ်မၤဂ့ၤတၢ်, တၢ်ဆီၣ်လီၤသးႇ တၢ်သးစူၤႇ တၢ်ဝံသးစူၤသ့ၣ်တဖၣ်” န့ၣ်လီၤ. ပကကူထီၣ်သိးထီၣ် ကစၢ်ခရံာ်, ဒီးဆဲးကပီၤဖျါထီၣ်က့ၤ အတၢ်အဲၣ်ဆူ ဟီၣ်ခိၣ်ဒီဘ့ၣ်န့ၣ်လီၤ.