လၢဟီၣ်ခိၣ်ချၢ, ၦၤဒ့တနၢ် အမံၤဟူသၣ်ဖျါကတၢၢ်တနီၤ, ဃုာ်ဒီး ဘဲ ကလဲဘါ (Van Cliburn) ဒီး ဘဲ(လ)ဒမဲယၤ ဟၤရဝၢး (Vladimir Horowitz) တဖၣ်, ဘၣ်ဒိးသန့ၤအသးလၢ ဖရဲး(စ) မိ(ရ) (Franz Mohr), လၢ ဝ့ၢ် နယူးယီး (New York) ၦၤသ့ၦၤဘၣ်အခိၣ်စဲၣ်နီၤ, လၢ (Steinway & Sons) တနၢ် အခီပနီၣ်, ဒ်သိးကမၤလီၤတံၢ် အဝဲသ့ၣ် အတနၢ် ဖံၣ်အဲနိၣ်တဖၣ် ကအိၣ်ကတဲာ်ကတီၤ အသးလၢ တၢ်ဒုးနဲၣ်ကမျၢၣ်တဖၣ်အမဲာ်ညါအဂီၢ်န့ၣ်လီၤ. သရၣ်ဖးဒိၣ် မိ(ရ) မ့ၢ်ပှၤလၢအထိၣ်လိၤမၤဂ့ၤ ဖံၣ်အဲနိၣ် သီၣ်အကလုၢ်တဂၤအံၤ ဘၣ်ဃုမၤလိန့ၢ် တနၢ် ဖံၣ်အဲနိၣ်အဂ့ၢ် လီၤတံၢ်လီၤဆဲး, ဒီးနံၣ်လၢအဆံတဖၣ်အတီၢ်ပူၤန့ၣ် မၤဒိၣ်ထီၣ်အါထီၣ် အတၢ်သ့တၢ်ဘၣ်တဖၣ်န့ၣ်လီၤ. မိ(ရ) နာ်ဝဲဒၣ်လၢ အတၢ်သ့တၢ်ဘၣ် တဖၣ်န့ၣ် ကမ့ၢ်ကျိၤကျဲလၢ ကမၤကစၢ်ယွၤ အတၢ်မၤအဂီၢ်, ဒီးညီနုာ်ဟ့ၣ်ခီနီၤလီၤ အတၢ်စူၢ်တၢ်နာ်လၢ ၦၤဒ့တနၢ်တဖၣ်, ဒီးၦၤမၤသကိးတၢ်တဖၣ်န့ၣ်လီၤ.

၂ မိၤ ၃၁:၇-၁၁ ပာ်ဖျါဝဲလၢ ၦၤအံၣ်စရ့လးဖိတဖၣ် ကသူၣ်ထီၣ် ဒဲလၢ တၢ်အိၣ်ဖှိၣ်ရိဖှိၣ်အဂီၢ်, ဒီးလၢတၢ်ဘူၣ်တၢ်ဘါအဂီၢ် ပိးလီအါမံၤလၢ အလိၣ်တဖၣ်အဂီၢ်, ကတဲာ်ကတီၤအသးအကတီၢ်န့ၣ် အဝဲသ့ၣ်လိၣ်ဘၣ် ၦၤလၢအသ့လီၤတံၢ်လီၤဆဲး စဲၣ်နီၤတဖၣ်န့ၣ်လီၤ. ဒ်သိးတၢ်မၤကကဲထီၣ်အဂီၢ်, အဆၢဖိ ၃-၄ စံးဘၣ်ပှၤလၢ ကစၢ်ယွၤ ဟ့ၣ်လီၤမူဒါဆူ ၦၤမၤစုသ့အတၢ်မၤစဲၣ်နီၤခံဂၤႇ စီၤဘစၤလအ့လး ဒီးစီၤအၤဟလံအာ်, “ဒီးယမၤၦဲၤအီၤဒီးယွၤအသးႇ ဒီးတၢ်ကူၣ်ဘၣ်ကူၣ်သ့ႇ ဒီးအသးဆးႇ ဒီးတၢ်သ့ၣ်ညါႇ ဒီးကယဲၢ်တၢ်မၤတမံၤလၢ်လၢ်, ဒ်သိးအကကူၣ်တၢ်ဘၣ်” န့ၣ်လီၤ. ကစၢ်ယွၤ ဟ့ၣ်လီၤ တၢ်သ့တၢ်ဘၣ်လၢအဝဲသ့ၣ်အဂီၢ်, တကးဒံးဘၣ်န့ၣ် ကစၢ်ယွၤ ဟ့ၣ်စိဟ့ၣ်ကမီၤ အဝဲသ့ၣ်လၢ ယွၤအသးဒ်သိးကနဲၣ်ဆှၢတၢ်ဖံးတၢ်မၤအဂီၢ်န့ၣ်လီၤ. ယွၤအပှၤဂီၢ်မုၢ် သူၣ်အိၣ်သးအိၣ် ဒိးစူးကါ အတၢ်သ့တၢ်ဘၣ်လီၤဆီတဖၣ်လၢ တၢ်မၤယွၤအတၢ်မၤန့ၣ် ဒုးကဲထီၣ် ၦၤအံၣ်စရ့လးဖိတဖၣ် ကဘူၣ်ထီၣ်ဘါထီၣ်ယွၤလၢ ကျိၤကျဲအကြၢးအဘၣ်န့ၣ်လီၤ.

ပဆိကမိၣ်လီၤပသးလၢ ပတၢ်သ့တၢ်ဘၣ်အိၣ်ဂ့ၤ, တအိၣ်ဂ့ၤ, ရိ ၁၂:၆ စံးဘၣ်ပှၤလၢ ပဝဲတဂၤလၢ်လၢ်န့ၣ် ပအိၣ်ဒီးယွၤအတၢ်ဟ့ၣ်လီၤဆီတဖၣ်, ဒ်သိးပကစူးကါအီၤ ကသ့ဝဲလၢ ၦၤဂၤအဂီၢ်န့ၣ်လီၤ. မ့ၢ်လၢသးစီဆှံကစၢ်ဟ့ၣ်စိဟ့ၣ်ကမီၤၦၤအဃိႇ ပမၤကစၢ်ယွၤအတၢ်မၤ, ဒီးဘူၣ်ထီၣ်ဘါထီၣ်ယွၤ, ခီဖျိလၢတၢ်စူးကါ ပတၢ်ဖံးတၢ်မၤတဖၣ်န့ၣ်, လၢတၢ်ကူၣ်သ့ႇ ဒီးလၢတၢ်သ့ၣ်ညါ, ဒ်ယွၤဟ့ၣ်ၦၤအသိးန့ၣ်လီၤ.