အခီၣ်ထံးန့ၣ်, ယထံၣ်ထွဲ စးခိအတီၢ်ဖိတက့ လီၤတဲာ်ဆူ ဟီၣ်ခိၣ်လိၤန့ၣ် ယတပာ်သ့ၣ်ညါယသးဘၣ်န့ၣ်လီၤ. တၢ်အက့ဖိအံၤ ကလီၤတဲာ်တ့ၢ်ဝဲလၢ ပိၢ်မုၣ်ဖိသၣ်ဖိတဂၤဒီး အပၢ်န့ၣ်လီၤ. အဝဲသ့ၣ်အိၣ်စီၤစုၤဒီးယၤန့ၣ် ကအိၣ်ဝဲဒၣ် ခံဆံခီၣ်ယီၣ်, ဒီးမ့မ့ၢ်ယၤန့ၣ်, ယကလဲၤတၢ်မၤအဂီၢ် စဲၤခံလံန့ၣ်လီၤ. ယစံးလၢယသးပူၤ, အဝဲသ့ၣ် အတၢ်လီၤတဲာ်တ့ၢ်ဝဲန့ၣ် ကသ့ၣ်ညါဝဲနီၢ်နီၢ်န့ၣ်လီၤ. ဘၣ်ဆၣ်အဝဲသ့ၣ် လဲၤကဒီးတၢ်ဆူညါန့ၣ်လီၤ. ယသးအခီၣ်ရှ့ၣ်သဆၣ်ထီၣ်ယၤ, ဒီးယလဲၤထၢထီၣ်အီၤန့ၣ်လီၤ. တၢ်အက့ဖိန့ၣ် မ့ၢ် တၢ်ပျဲဒိး သိလ့ၣ်လၢအဘၣ်တၢ်ပှ့ၤဆိပာ်စၢၤန့ၣ်လီၤ. ဖဲယလဲၤဟ့ၣ်က့ၤ အဝဲသ့ၣ်ဝံၤန့ၣ်ဒီး, စံးဘျုးဆၢက့ၤယၤလၢ သူၣ်ဒီဖျၢၣ်သးဒီဖျၢၣ်န့ၣ် လၢတၢ်တဆိကမိၣ်အပူၤ ဒုးကဲထီၣ်တၢ်သူၣ်မံသးမံလၢယဂီၢ်န့ၣ်လီၤ. ယဆိကမိၣ်ထီၣ်ယဲ ခီဖျိလၢတၢ်မၤဂ့ၤအတၢ်မၤ ဆံးဆံးဖိတမံၤအဃိ, ဘၣ်မနုၤအဃိ ယသးမုာ်သးခုဒိၣ်ဒိၣ်ကလဲာ်အဂ့ၢ်န့ၣ်လီၤ.

ဖဲပသးအိၣ်မၤစၢၤပှၤဂၤအကတီၢ်န့ၣ်, တၢ်မၤအသးတမံၤလၢ ပှၤကညီအနီၢ်ကစၢ် ပျဲဒုးဟဲထီၣ် ဂာ်အစီအသံးအကာ်, ဒီးမၤဂ့ၤထီၣ် တၢ်လၢပသးကလၢၢ်ဘၣ်တဖၣ်န့ၣ်လီၤ. ဖဲပမၤတၢ်ဂ့ၤန့ၣ်ဒီး, ပသးကကလၢၢ်ဘၣ်တၢ်ဂ့ၤန့ၣ်လီၤ. မ့မ့ၢ် ယွၤလၢအဂ့ၢ်အဝါတဂၤန့ၣ် ဒ်သိးပကလီၤဂာ်ဒီးအီၤအဂီၢ် တ့လီၤပှၤအဃိ, တၢ်မၤအသးအံၤန့ၣ် တမ့ၢ်တၢ်လၢအလီၤကမၢကမၣ်တမံၤဘၣ်န့ၣ်လီၤ.

တၢ်ဆိၣ်ဂ့ၤပှၤဂၤန့ၣ် မ့ၢ်တၢ်ပညိၣ်လၢ ယွၤတ့လီၤပၣ်လီၤပှၤတဖၣ်အကျါတမံၤအဃိ, အ့း ၂:၁၀ ပာ်ဖျါထီၣ်ဝဲလၢ “အဂ့ၢ်ဒ်အံၤ, ပမ့ၢ်အတၢ်မၤ လၢအတ့လီၤဝဲလၢ ယ့ၣ်ရှူးခရံာ်အပူၤ, ဒ်သိးပကမၤတၢ်ဂ့ၤတဖၣ် လၢယွၤကတဲာ်ကတီၤပာ်လၢ ပကလဲၤတၢ်လၢအပူၤ” န့ၣ်လီၤ. လံာ်စီဆှံတဆၢအံၤ တမ့ၢ်ဟ့ၣ်ပှၤ တၢ်နဲၣ်လိညီကဒၣ်ဖိလၢ ပကမၤတၢ်ဂ့ၤအဂီၢ်ဘၣ်. မ့မ့ၢ်ပကအိၣ်မူကျိၤကျဲလၢ ဆဲးကပီၤဖျါထီၣ်က့ၤ ပန့ဆၢၣ်လၢ အဘၣ်ထွဲဒီးယွၤအတၢ်ဘၣ်တ့န့ၣ်လီၤ. တမ့ၢ်လၢ ပကဘၣ်မၤတၢ်မၤအဒိၣ်အထီတဖၣ် ကိးဆၢကိးကတီၢ်ဒဲးန့ၣ်ဘၣ်. လၢပတၢ်အိၣ်မူ ကိးမုၢ်နံၤဒဲးအပူၤန့ၣ်, ဒ်သိးပကမၤစၢၤပှၤဂၤအဂီၢ်, ပမ့ၢ်မၤတၢ်ဆံးဆံးဖိတမံၤန့ၣ်ဒီး, တမ့ၢ်ထဲလၢပကဒိးန့ၢ်ဘၣ်က့ၤ တၢ်သးမံသးမုာ်အခိၣ်ဖး, ဒီးတကတီၢ်ဃီန့ၣ် ပကသ့ၣ်ညါလၢ ပမၤမုာ်ကစၢ်ယွၤအသး, ဒ်တၢ်ပညိၣ်လၢယွၤတ့လီၤပၣ်လီၤပှၤအသိး, ပကမၤလီၤတံၢ်လီၤဆဲးန့ၣ်လီၤ.