ဘရိး (Brock) ဒီး ဒဲန့း (Dennis) မ့ၢ်တံၤသကိးလၢဖိသၣ်လံၤလံၤ, ဘၣ်ဆၣ်ဖဲအဝဲသ့ၣ်ခံဂၤဒိၣ်ထီၣ်န့ၣ်ဒီး, ဘရိး တကနၢ်ဃုာ်ဝဲဒၣ် ဒဲန့း အတၢ်နာ်ကစၢ်ယ့ၣ်ရှူးလၢၤဘၣ်န့ၣ်လီၤ. ဒဲန့းသ့ၣ်ညါဝဲဒၣ် ကျဲလၢ ဘရိး လူၤပိာ်ဝဲန့ၣ် ခံးသူ, ဒီးတူၢ်ဘၣ်ဝဲ တၢ်သးအုး, တၢ်သးဟးဂီၤန့ၣ်လီၤ. မ့ၢ်လၢ ဒဲန့း အဲၣ်ဘၣ် အတံၤသကိးအဃိ, ဃ့ထုကဖၣ်ဝဲဒၣ်လၢ ဘရိးအဂီၢ်န့ၣ်လီၤ. လၢဘရိးအဂီၢ်, အတၢ်ထုကဖၣ်အပူၤန့ၣ် ဒဲန့း ဟံးန့ၢ်စူးကါဝဲဒၣ် ဝံယဃ့းစက့လး အတၢ်ကတိၤ, ဖျါဖဲ ယဃ့း ၁၁:၁၉ အပူၤ, “ကစၢ်ယွၤဧၢ ဝံသးစူၤ ထုးထီၣ်ကွံာ် ဘရိး အသးလၢၢ်လၢအပူၤ, ဒီးဟ့ၣ်လီၤဘၣ်အီၤလၢအသးညၣ်တက့ၢ်” န့ၣ်လီၤ. ဒ်သိး ဘရိး ကလဲၤတၢ်လၢ ကစၢ်ယွၤ အကျဲအကပိၤ, ဒီးကဂုၤထီၣ်ပသီထီၣ် ချ့ချ့အဂီၢ်န့ၣ် ဒဲန့း အသးအိၣ်ဆၢန့ၢ်ဘၣ်ဝဲန့ၣ်လီၤ.
လၢတၢ်သူၣ်တီသးလိၤအပူၤ, ဒဲန့း ဃ့ဘါထုကဖၣ်ဝဲန့ၣ် အနံၣ်တဆံလဲၤပူၤကွံာ်လံန့ၣ်လီၤ. လၢခံန့ၣ်, ဘရိး ကိးကတိၤတၢ်, ခီဖျိလၢကွဲၤဒီနၢ်, ဒီးစံးဘၢ် ဒဲန့းလၢ “ယဟ့ၣ်လီၤယသးသမူဆူ ကစၢ်ယ့ၣ်ရှူး ဝံၤလံ” န့ၣ်လီၤ. ဒဲန့း အသူၣ်ခုသးခု, အမဲာ်ချံန့ၣ် အိၣ်ပှဲၤဝဲဒီးမဲာ်ထံမဲာ်နိ, ဖဲအနၢ်ဟူ အတံၤသကိး ဒုးသ့ၣ်ညါအီၤလၢ အကတၢၢ်န့ၣ် အဝဲဟ့ၣ်လီၤတ့ၢ်လံအသးသမူဆူယွၤအစုပူၤ, ဒီးစူၢ်က့ၤနာ်က့ၤကစၢ်ယွၤအဂ့ၢ်န့ၣ်လီၤ.
ဒဲန့း ပညိၣ်ထိၣ်လိၤက့ၤ အတၢ်ထုကဖၣ်တဖၣ်ဆူ ယွၤအတၢ်အၢၣ်လီၤ အပှၤဂီၢ်မုၢ် အိၣ်ဟဲခီဖျိလၢ ဝံယဃ့းစက့လးန့ၣ်လီၤ. ယွၤအပှၤဂီၢ်မုၢ်တဖၣ် စူးကွံာ်ညိကွံာ် ကစၢ်ယွၤ, ဒီးလူၤပိာ်ထွဲမၤ လုၢ်လၢ်လၢအလီၤသးဘၣ်အၢ ဘၣ်ဆၣ်, ယဃ့း ၁၁:၁၉ ပာ်ဖျါဝဲလၢ ကစၢ်ယွၤ ကဆီတလဲကွံာ်အပှၤဂီၢ်မုၢ်အသးအဂ့ၢ်, ဒီးစံးဝဲဒၣ် “ယကဟ့ၣ်လီၤအီၤလၢ အသးတဖျၢၣ်ဃီ, ဒီးယကဒၢနုာ်အသူၣ်သီအသးသီလၢအပူၤ, ဒီးယကထုးထီၣ်ကွံာ် အသးလၢၢ်လၢအပူၤ, ဒီးယကဟ့ၣ်လီၤအီၤလၢ အသးညၣ်“ န့ၣ်လီၤ. အဆၢဖိ ၂၀ စံးဘၣ်ပှၤလၢ, ယွၤအပှၤဂီၢ်မုၢ်တဖၣ် လၢသူၣ်အသီသးအသီတဖၣ်အပူၤန့ၣ် ကလဲၤတၢ်လၢယွၤအတၢ်သိၣ်တၢ်သီတီတီလိၤလိၤန့ၣ်လီၤ.
ပစူးကွံာ်ညိကွံာ် ကစၢ်ယွၤန့ၣ် ကယံၤဝဲဒၣ် ထဲလဲၣ်ဂ့ၤ, ထဲလဲၣ်ဂ့ၤန့ၣ်, ကစၢ်ယွၤ မုာ်လၤသးခုဝဲလၢ ကဟ့ၣ်ပှၤ သးဖျၢၣ်လၢအလၢၤဒီးအကပုာ်, ဒီးအလီၤအဲၣ်လီၤကွံတဖၣ်န့ၣ်လီၤ. တၢ်ထဲတမံၤဧိၤလၢ ပကဘၣ်မၤန့ၣ် မ့ၢ်ဒၣ်ပကဘၣ်ဃၣ်က့ၤပသးဆူ ယွၤအအိၣ်လၢတၢ်စူၢ်တၢ်နာ်, ဒီးလၢတၢ်ပီၢ်ယၢ်လီၤက့ၤပသး, ခီဖျိလၢပစူၢ်က့ၤနာ်က့ၤ ကစၢ်ယ့ၣ်ရှူး ဒ်သိးကအုၣ်က့ၤခီၣ်က့ၤပှၤလၢ ပတၢ်ဒဲးဘးတဖၣ်အဂီၢ်န့ၣ်လီၤ.
