ဖဲယလဲၤသကိးတၢ်ဒီးပှၤမၤတၢ်သးခုကစီၣ်စှၤသီအကရၢတဖု ဆူကီၢ်ဘရၣ်စ့ (Brazil)အကတီၢ်, ပမၤစၢၤ တၢ်တ့သူၣ်ထီၣ်တၢ်ဘါသရိာ်တဖျၢၣ်လၢ အမ့ၤစိၣ် (Amazon) ပှၢ်လၢ်ကျါန့ၣ်လီၤ. တၢ်သူၣ်ထီၣ်အခီၣ်ထံး လၢအဘၣ်တၢ်တ့ဝံၤအီၤအဖီခိၣ်န့ၣ်, ပတ့ပာ်ဖှိၣ်ထီၣ် သရိာ်ပိးလီ တၢ်အကူာ်အက့အါကလုာ် (ဒ်ဖိသၣ်အတၢ်လိာ်ကွဲတမံၤလၢတၢ်ပာ်ဖှိၣ်ဆီထီၣ်က့ၤ ပိးလီအကူာ်အက့ဖိတဖၣ်, ဒီးဒုးကဲထီၣ်တၢ်သူၣ်ထီၣ်တမံၤမံၤအသိး), လၢအမ့ၢ် တၢ်အထူၣ်တဖၣ်, အီကတ့ၣ်တၢ်ဒူၣ်တဖၣ်, ပဲတြီဖိတဖၣ်, လၢတၢ်အခိၣ်ဒုးအဂီၢ် တၢ်တဒိထးအဘိတဖၣ်, ဒီးလၢတၢ်သူၣ်ထီၣ်အခိၣ်ဒုးအဂီၢ်ဟီၣ်ကုၢ်ဘ့ၣ်တဖၣ်န့ၣ်လီၤ. ဝံၤန့ၣ်ဒီး, ပတ့ခဲၣ်တၢ်ဒူၣ်တဖၣ်လၢ ကသံၣ်ဖှူတၢ်န့ၣ်လီၤ.

ပှၤတနီၤဆိကမိၣ်ဝဲလၢ တၢ်စူၤခါအကတီၢ် ပတ့သူၣ်ထီၣ်တၢ်ဘါသရိာ် ဘၣ်ကသ့ဧါ, ဒီးဘၣ်ယိၣ်ဝဲဒၣ်န့ၣ်လီၤ. ဘၣ်ဆၣ်, မ့ၢ်လၢယွၤအဘျုးအဃိ, တၢ်တဟဲစူၤလီၤလၢၤဘၣ်န့ၣ်လီၤ. တၢ်ဂ့ၢ်ကီအဂုၤအဂၤတဖၣ်အိၣ်အါမံၤဘၣ်ဆၣ်, လၢလီၢ်ကဝီၤပူၤပှၤတနီၤ အတၢ်မၤစၢၤအဃိ, ပမၤဝံၤ တၢ်တ့သူၣ်ထီၣ်တၢ်ဘါသရိာ် ဘၣ်ဆၢဘၣ်ကတီၢ်န့ၣ်လီၤ.

တၢ်စိာ်မၢကဲကုၢ်ဝံၤ, စီၤနဃ့မယၤဒီးပှၤအံၣ်စရ့လးဖိဟဲက့ၤဝဲဆူ အထံကီၢ်, ဒ်သိးကဘှီထီၣ်က့ၤဝ့ၢ်ယရူၤရှလ့ၣ်အခိၣ်ဒူအကတီၢ်, အဝဲသ့ၣ်ဘၣ်ကွၢ်ဆၢၣ်မဲာ် တၢ်ဂ့ၢ်ကီအါမးန့ၣ်လီၤ. နဃ့ ၄:၁-၃ စံးဘၣ်ပှၤ ဖဲလၢဒုၣ်ဒါတဖၣ် ဃုထံၣ်န့ၢ်ဝဲ တၢ်လၢအဝဲသ့ၣ်မၤဝဲတဖၣ်န့ၣ်ဒီး, အသးဒိၣ်ကဲၤထီၣ်ဒိၣ်မး, ဒီးမၤတရီတပါ အဝဲသ့ၣ်န့ၣ်လီၤ. ဘၣ်ဆၣ်, အဆၢဖိ ၆ န့ၣ် ပကထံၣ်ဘၣ် စီၤနဃ့မယၤ ဃ့ထုကဖၣ်တၢ်, ဒီးပှၤဂီၢ်မုၢ်တဖၣ် မၤသကိးတၢ်လၢသူၣ်တဖျၢၣ်ဃီသးတဖျၢၣ်ဃီအဂ့ၢ်, ဒီးပာ်ဖျါဝဲ “ဒီးပမၤတၢ်အခိၣ်ဒူ, ဒီးတၢ်အခိၣ်ဒူန့ၣ်စဲဘူးလိာ်အသးဒီဘိညါ တုၤလၢအတၢ်ဖးဖီလီၤ. အဂ့ၢ်ဒ်အံၤ, ပှၤဂီၢ်မုၢ်အသးအိၣ်လၢအကမၤတၢ်” န့ၣ်လီၤ. အဆၢဖိ ၇-၂၃ ပာ်ဖျါဝဲလၢ ဒုၣ်ဒါတဖၣ် မၤပျံၤမၤဖုးပှၤဂီၢ်မုၢ်လၢ အကဟဲဒုးဝဲဒၣ်အဃိ, ပှၤအံၣ်စရ့လးဖိတဖၣ် ဃ့ထုကဖၣ်, ဒီးဖဲအဝဲသ့ၣ်မၤတၢ်အကတီၢ်န့ၣ် ဘၣ်ပာ်လီၤပှၤခိးတၢ်တဖၣ်န့ၣ်လီၤ. အဝဲသ့ၣ်ဘှီက့ၤဝ့ၢ်အခိၣ်ဒူ လၢယဲၢ်ဆံခံသီအပူၤန့ၣ်လီၤ.

ဘၣ်တဘျီဘျီန့ၣ် တၢ်မၤလၢ ပကဘၣ်မၤဝံၤတဖၣ်န့ၣ် အိၣ်ပှဲၤဝဲဒီးတၢ်ဂ့ၢ်ကီတဖၣ်န့ၣ်လီၤ. တၢ်လၢအမၤကီမၤခဲပှၤတဖၣ် မ့ၢ်ဟဲအိၣ်ထီၣ်လၢပကျဲန့ၣ်ဒီး, ပနီၢ်ကစၢ်ဃုာ်ဒီး ပဒီပုၢ်ဝဲၢ်မုၣ်, ဒီပုၢ်ဝဲၢ်ခွါလၢ ကစၢ်ယ့ၣ်ရှူးအပူၤတဖၣ်န့ၣ် ပတၢ်မုၢ်လၢ် လီၤမၢ်သ့ဝဲဒၣ်န့ၣ်လီၤ. ဘၣ်ဆၣ်, ခီဖျိလၢကစၢ်ယွၤအတၢ်မၤစၢၤန့ၣ် တၢ်ကီတၢ်ခဲအကတီၢ်ဒ်သိးအံၤ, ကဲထီၣ် တၢ်မၤနၢၤအဒိၣ်အမုာ် သ့ဝဲဒၣ်န့ၣ်လီၤ. နာ်သန့ၤ ကစၢ်ယွၤ လၢကဆိကတီၢ်တၢ်စူၤဖးဒိၣ်, ဒ်သိးပကမၤနၢၤမၤဃၣ်တၢ်အဂီၢ်, ကွၢ်ထီၣ်ဆူယွၤအအိၣ်န့ၣ်တက့ၢ်.