တၢ်အိၣ်မူခါဆူညါန့ၣ် ထံၣ်စိဝဲထဲတၢ်ကီတၢ်ခဲအဃိ, နဲစံၣ် (Nancy) ပျံၤတၢ်န့ၣ်လီၤ. ဖဲအလဲၤဟးထီၣ်ကစၢၢ်လၢ မ့း ကီၢ်စဲၣ် (Maine) အပှၢ်လၢ်ကျါအကတီၢ်, အဝၤ ထီ(မ်) (Tom) သ့းပ့ၤနီၣ်အသးသၢဘျီန့ၣ်လီၤ. ဘၣ်ဆၣ်, ကသံၣ်သရၣ်တဖၣ်လၢ တၢ်ဆါဟံၣ်ဆံးဖိ လၢအအိၣ်ဘူးတဖျၢၣ်န့ၣ် တထံၣ်တၢ်ဆါလီၤဆီနီတမံၤဘၣ်. ကသံၣ်သရၣ်တဖၣ်လၢ တၢ်ဆါဟံၣ်ဖးဒိၣ်တဖျၢၣ်စ့ၢ်ကီး, မၤကွၢ်ကဒီးတၢ်မၤကွၢ်တဖၣ်ဘၣ်ဆၣ်, တထံၣ်န့ၢ် တၢ်ဆါနီတမံၤဘၣ်. နဲစံၣ် ပာ်ဖျါထီၣ်ဝဲလၢ “ယပျံၤတၢ်ဒိၣ်မး” န့ၣ်လီၤ. ဖဲအဝၤစံၣ်လီၤတၢ်ဆါဟံၣ်န့ၣ်ဒီး, သံကွၢ်ဝဲ သးဖျၢၣ်တၢ်ဆါ အကသံၣ်သရၣ် လၢခံကတၢၢ်တဘျီ, “အခဲအံၤပကဘၣ်မၤတၢ်မနုၤလဲၣ်” န့ၣ်လီၤ. ကသံၣ်သရၣ် စံးဘၣ်အီၤလၢ “အိၣ်မူအိၣ်ဂဲၤဒံးဆူညါ,” တၢ်ကတိၤလၢ ကသံၣ်သရၣ် ဟ့ၣ်ကူၣ်အီၤအံၤ ဆီတလဲကွံာ် နဲစံၣ် အတၢ်ထံၣ်တစိၤသးန့ၣ်လီၤ. နဲစံၣ် ပာ်ဖျါထီၣ်က့ၤဝဲလၢ “တမ့ၢ်အဝဲစံးကတိၤမၤဖှံထီၣ်ပသးန့ၣ်ဘၣ်. မ့ၢ်ဝဲအတၢ်ဟ့ၣ်ကူၣ်လၢပဂီၢ်” န့ၣ်လီၤ.
တၢ်နဲၣ်ကျဲဒ်သိးအံၤန့ၣ်, ပကထံၣ်ဘၣ် ကစၢ်ယ့ၣ်ရှူး သိၣ်လိဝဲလၢ ကစၢၢ်ဒီခိၣ် အတၢ်စံၣ်တဲၤတဲလီၤအပူၤန့ၣ်လီၤ. မး ၆:၂၅ အပူၤန့ၣ် စံးဝဲဒၣ် “မ့ၢ်သုကအီၣ်ဘၣ်ဒ်လဲၣ်, မ့ၢ်သုကအီဘၣ်ဒ်လဲၣ်န့ၣ် သုတဘၣ်ယိၣ်လၢသုသးသမူအဂီၢ်တဂ့ၤ, မ့ၢ်သုကကူဘၣ်သိးဘၣ်ဒ်လဲၣ်ဒ်လဲၣ်န့ၣ် သုတဘၣ်ယိၣ်လၢ သုနီၢ်ခိအဂီၢ်တဂ့ၤ. ပသးသမူအံၤဂ့ၤန့ၢ် တၢ်အီၣ်တၢ်အီ, ဒီးပနီၢ်ခိအံၤဂ့ၤန့ၢ် တၢ်ကူတၢ်သိးတမ့ၢ်ဘၣ်ဧါ” န့ၣ်လီၤ. ကစၢ်ယ့ၣ်ရှူး အတၢ်နဲၣ်ကျဲအံၤ, တမ့ၢ်လၢ ပကဘၣ်စူးကွံာ်ညိကွံာ် ကသံၣ်ကသီ (မ့) တၢ်ဂ့ၢ်ကီခဲအဂၤ, (မ့) တၢ်ဆါအတၢ်ပနီၣ်တဖၣ်န့ၣ်ဘၣ်. လၢအလီၢ်န့ၣ်, အဆၢဖိ ၂၅ န့ၣ် ကစၢ်ခရံာ် စံးဝဲဒၣ်, “သုတဘၣ်ယိၣ်တၢ်တဂ့ၤ” န့ၣ်လီၤ. ဝံၤန့ၣ်ဒီး, အဆၢဖိ ၂၇ န့ၣ် သံကွၢ်ဝဲဒၣ် “မ့ၢ်မတၤလၢသုကျါ လၢအဘၣ်ယိၣ်တၢ်အဃိဒီး, ထုးထီထီၣ်အယုာ်တပျၢ်ဧိၤသ့တဂၤလဲၣ်” န့ၣ်လီၤ.
ယရှါ ၃၅:၄ န့ၣ် ဝံယရှါယၤ ဟ့ၣ်ထီၣ် တၢ်ကူၣ်သ့ဒ်သိးအံၤ, “စံးဘၣ်ပှၤလၢအပျံၤတၢ်, အိၣ်ဆူၣ်တက့ၢ်. ပျံၤတၢ်တဂ့ၤ. ကွၢ်ကွၢ်,သုကစၢ်လီၤ. တၢ်မၤဆၢတၢ်ဟဲဝဲ, ယွၤကဟ့ၣ်ကၣ်တၢ်လီၤ. အဝဲဒၣ်ဟဲဝဲဒီး ကအုၣ်က့ၤခီၣ်က့ၤသု” န့ၣ်လီၤ. ခဲကနံၣ်အံၤ, နဲစံၣ်ဒီးထီ(မ်) ခံဂၤ အသူၣ်ဆူၣ်သးဂဲၤဝဲလၢ ကလဲၤဟးကျဲ တနံၤန့ၣ် အါန့ၢ်ယဲၢ် မံးလာ်န့ၣ်လီၤ.အဝဲသ့ၣ်ခါထီၣ်အခီၣ်လၢတၢ်သးခု, ဒီးတမ့ၢ်လၢတၢ်ဘၣ်ယိၣ်အပူၤလၢၤဘၣ်န့ၣ်လီၤ.
